ශ්‍රී ලංකාවේ වසරකට අඩු ළමුන්ගෙන් ආසන්න වශයෙන් සියයට 25 කට පමණ යම් ආකාරයක නින්ද ආශ්‍රිත ගැටලු ඇති බව සෞඛ්‍ය ප්‍රවර්ධන කාර්යාංශය පවසයි.එය හොඳ නින්දක් නොලැබීම හේතුවෙන් විවිධ කායික හා මානසික සෞඛ්‍ය ගැටලුවලට තුඩුදිය හැකි බව එම කාර්යාංශයේ උපදේශක ප්‍රජා වෛද්‍ය විශේෂඥ වෛද්‍ය එනෝකා වික්‍රමසිංහ සඳහන් කරයි.
මෙරට දරුවන් අතර නින්ද පිළිබඳ වැඩි පර්යේෂණ සිදුකර නොමැති නමුත්, පවතින සීමිත දත්ත සැලකිල්ලට ගනිමින්, නව යොවුන් වියේ සහ වැඩිහිටියන්ගේ නින්ද අහිමි වීමේ ගැටළු ඇති බව ද ඇය පවසයි.ජනමාධ්‍ය හමුවක් අමතමින් නින්දේ සනීපාරක්ෂාව, සෞඛ්‍ය සම්පන්න පුරුදු, හැසිරීම් සහ නින්දට සම්බන්ධ පාරිසරික සාධක සම්බන්ධයෙන් ද ඇය සඳහන් කර ඇත.
”ඔබට හොඳ රාත්‍රී නින්දක් ලබාගැනීමට මෙම සාධක ගැන අවධානය යොමුකළ හැකියි. ඉස්සර මිනිස්සු ඉර බැස යන විට නිදාගෙන ඉර පායන විට අවදි වෙනවා. කෘත්‍රිම ආලෝකකරණයේ දිගුකාලීන භාවිතය සහ ජංගම දුරකථන, පරිගණක, ටැබ් සහ රූපවාහිනිය වැනි උපාංගවල භාවිත කරන කාලය ඉහළ යාම මිනිසුන් අවදියෙන් තැබීමට හේතුවෙනවා. එමගින් නින්දේ රටාවන්ට ද එය ඍණාත්මකව බලපානවා.” යනුවෙන් ඇය පවසයි.
නින්දේ රටාවේ වෙනස්වීම් විවිධ කායික, මානසික සහ සමාජීය ගැටලු ඇති කරන බව අධ්‍යයන කිහිපයකින් පෙන්වා දී ඇති බවත්, මේ නිසා ජනතාවගේ සෞඛ්‍යය නංවාලීම සඳහා බොහෝ ක්‍රියාමාර්ග ගෙන තිබෙන බවත් වෛද්‍ය එනෝකා වික්‍රමසිංහ සඳහන් කරයි.විශේෂයෙන්ම පාසල් දරුවන්ට ස්ථාවර මතකයක් ලබාගැනීමට හොඳ නින්දක් අවශ්‍ය බව ඇය පෙන්වාදෙයි. එබැවින් දරුවන්ට සුවදායක නින්දක් ලබාදීම දෙමාපියන්ගේ වගකීමක් බව ද ඇය අවධාරණය කරයි.
“හොඳ නින්දක් පුරුදු පුහුණු වීමට නම්, නිත්‍ය නින්දට යන සහ අවදි වන වේලාව, ඔවුන් නිදාගන්නා ස්ථානය, නිදාගන්නා ආකාරය, පාරිසරික තත්ත්වයන් සහ නින්දේ කාලසීමාව වැනි පියවර කිහිපයක් අනුගමනය කළ යුතුයි. දෙමව්පියන්ට සහ භාරකරුවන්ට තම දරුවන්ට හොඳ නින්දක් ඇති කර ගැනීමට උපකාර කළ හැකියි.”
ලෝක සෞඛ්‍ය සංවිධානය (WHO) විසින් එක් එක් වයස් කාණ්ඩ සඳහා දිනකට නිදාගත යුතු පැය ගණන පිළිබඳව නිර්දේශ ඉදිරිපත් කර ඇත. උපතේ සිට මාස තුන දක්වා ළදරුවන් දිනකට පැය 14 සිට 17 දක්වා නිදාගත යුතු බව ලෝක සෞඛ්‍ය සංවිධානය නිර්දේශ කරයි.
