සෞඛ්‍ය බලධාරීන්ට අනුව නව යොවුන් වියේ දරුවෙකු වෛරසය සඳහා ධනාත්මක බව පරීක්ෂා කිරීමෙන් පසු කැනඩාව සිය පළමු කුරුළු උණ රෝගියා තහවුරු කර තිබේ.
බ්‍රිටිෂ් කොලොම්බියාවේ බටහිර පළාතේ සිට පැමිණි මෙම නව යොවුන් වියේ දරුවාට කුරුල්ලෙකුගෙන් හෝ සතෙකුගෙන් H5 කුරුළු උණ වැළඳී ඇතැයි විශ්වාස කෙරෙන බව පළාතේ සෞඛ්‍යය බලධාරීන් පසුගිය සෙනසුරාදා ප්‍රකාශ කළේය. ආසාදිත දරුවා ළමා රෝහලක ප්‍රතිකාර ලබමින් ඇත.
ආසාදනයේ මූලාශ්‍රය හඳුනා ගැනීම සඳහා සෞඛ්‍යය අංශ දරුවාගේ සම්බන්ධතා සොයා පරීක්ෂණ සිදුකරමින් සිටින බව පළාත් බලධාරීන් පැවසීය.“මෙය දුර්ලභ සිදුවීමක්,” බ්‍රිටිෂ් කොලොම්බියා සෞඛ්‍ය නිලධාරි බොනී හෙන්රි නිවේදනයක් නිකුත් කරමින් කියා සිටියේය. “මෙහි නිරාවරණය වීමේ මූලාශ්‍රය සම්පූර්ණයෙන් අවබෝධ කර ගැනීම සඳහා අපි ගැඹුරු පරීක්ෂණයක් පවත්වමු.”යනුවෙන් පුකාශ කර තිබිණි.මේ අතර කැනඩාවේ සෞඛ්‍ය අමාත්‍ය මාර්ක් හොලන්ඩ් ප්‍රකාශ කලේරෝගය වැළදීම මහජනතාවට අවදානම අඩු මට්ටමක පවතින බවයි.
H5 කුරුළු උණ ලොව පුරා වල් පක්ෂීන් තුළ බහුලව පැතිරී ඇති අතර කුකුළු මස් සහ එක්සත් ජනපදයේ කිරි එළදෙනුන් තුළ පැතිර ඇත. එක්සත් ජනපද කිරි සහ කුකුළු ගොවිපොලවල කම්කරුවන් අතර මෑත කාලීන මෙවැනි සිද්ධීන් කිහිපයක් වාර්ථා වී ඇත.තවද මෙම රෝගය පුද්ගලයාගෙන් පුද්ගලයාට පැතිර ගිය බවට මෙතෙක් කිසිදු සාක්ෂියක් නොමැත. නමුත් එය එසේ සිදු වුවහොත් වසංගතයක් ලෙස පැතිර යා හැකි බව විද්‍යාඥයින් අනතුරු අඟවා ඇත.
නොවැම්බර් මස මුලදී, එක්සත් ජනපදයේ රෝග පාලනය සහ වැළැක්වීමේ මධ්‍යස්ථාන (CDC) ඉල්ලා සිටියේ කුරුළු උණ ඇති සතුන්ට නිරාවරණය වී ඇති ගොවිපල සේවකයින්ට රෝග ලක්ෂණ නොමැති වුවද වෛරසය සඳහා පරීක්ෂා කරන ලෙසයි.
මාර්තු මාසයේ සිට එක්සත් ජනපදයේ ප්‍රාන්ත 15 ක කිරි ගොවිපලවල් 450 කට ආසන්න ප්‍රමාණයකට කුරුළු උණ ආසාදනය වී ඇති අතර අප්‍රේල් මාසයේ සිට CDC විසින් කුරුළු උණ රෝගීන් 46 ක් හඳුනාගෙන ඇත.
කැනඩාවේ, බ්‍රිටිෂ් කොලොම්බියාව ඔක්තෝබර් මාසයේ සිට අවම වශයෙන් ආසාදිත කුකුළු ගොවිපළවල් 22 ක් හඳුනාගෙන ඇති අතර, පළාතට අනුව, පක්ෂීන් ගණනාවක් ධනාත්මක බව හදුනාගෙන‍ෙ ඇත.කැනඩාවේ කිරි ගවයින් සම්බන්ධයෙන් කිසිදු රෝගයක් වාර්තා වී නොමැති අතර කිරි සාම්පලවල කුරුළු උණ පිළිබඳ සාක්ෂි නොමැත.
