ජාතික ජන බලවේගය ඡන්ද – 6,863,186ක් – මන්ත්‍රී ධුර 159ක්
සමගි ජන බලවේගය ඡන්ද – 1,968,716ක් – මන්ත්‍රී ධුර 40ක්
නව ප්‍රජාතන්ත්‍රවාදී පක්ෂය ඡන්ද – 500,835ක් – මන්ත්‍රී ධුර 05ක්
ශ්‍රී ලංකා පොදුජන පෙරමුණ ඡන්ද –350,429ක් – මන්ත්‍රී ධුර 03ක්
ශ්‍රී ලංකා දේශපාලන ඉතිහාසයේ එතෙක් මෙතෙක් පිහිටුවා නොතිබූ වාර්තා රැසක් පිහිටුවමින් ජාතික ජන බලවේගය මෙවර මහමැතිවරණයෙන් ඡන්ද 6,863,186ක් ලබා පාර්ලිමේන්තුවේ තුනෙන් දෙක ඉක්මවා යන බහුතර බලයක් සමඟ ඓතිහාසික ජයග්‍රහණයක් දිනා ගැනීමට සමත් වී තිබේ. ජාතික ජන බලවේගය ප්‍රතිශතයක් ලෙස සියයට 61.56ක ජයග්‍රහණයක් හිමිකර ගත් අතර දිස්ත්‍රික්ක මට්ටමින් 141 ක් හා ජාතික ලැයිස්තුවෙන් 18 ක් වශයෙන් මන්ත්‍රී ධුර 159 ක් දිනා ගෙන ඇත. ජාතික ජන බලවේගය මෙවර වාර්තා රැසක් පිහිටුවමින් මෙම ජයග්‍රහණයට හිමිකම් කියූ අතර තනි පක්ෂයක් ලෙස මෙසේ පාර්ලිමේන්තුවේ තුනෙන් දෙක ඉක්මවා යන බහුතර බලයක් ලබා ගැනීමට ජාතික ජන බල වේගයට හැකියාව ලැබීම ඉන් විශේෂත්වයකි.
ජාතික ජන බලවේගය මෙවර ලබාගත් ඡන්ද ප්‍රතිශතය මෙතෙක් මහමැතිවරණයකදී පක්ෂයක් ලබා ගත් වැඩිම ඡන්ද ප්‍රතිශතය වේ. මින් පෙර 2010 වසරේදී එක්සත් ජනතා නිදහස් සන්ධානය සියයට 60.33 ක ප්‍රතිශතයක් ලබා ගෙන තිබිණි.
එමෙන්ම මහමැතිවරණයක ජයගත් වැඩිම ඡන්ද කොට්ඨාස ගණන හිමි කර ගැනීමට ද ජාතික ජන බලවේගයට හැකියාව ලැබුණු අතර එම වාර්තාව මින් පෙර එක්සත් ජනතා නිදහස් සන්ධානය 2010 වසරේදී තැබූ අතර ඒ ආසන 136කි.
එමෙන්ම මහමැතිවරණයක ජයග්‍රහණය කළ වැඩිම දිස්ත්‍රික්ක ගණන ද මෙවර ජාතික ජන බලවේගය දිනා ගත් අතර එය දිස්ත්‍රික්ක 21කි. මින් පෙර එම වාර්තාව ද තබා ඇත්තේ එක්සත් ජනතා නිදහස් සන්ධානය වන අතර ඒ දිස්ත්‍රික්ක 19 ක් වශයෙනි.
එමෙන්ම මහමැතිවරණයකදී ලබා ගත් වැඩිම ඡන්ද සංඛ්‍යාව වන්නේ ද මෙවර ජාතික ජන බලවේගය දිනා ගනු ලැබූ ඡන්ද 6,863,186 ප්‍රමාණය වේ. මීට පෙර එය 2020 දී ශ්‍රී ලංකා පොදුජන පෙරමුණ තැබූ වාර්තාවක් වන අතර ඒ ඡන්ද 6853960ක් වශයෙනි.
එමෙන්ම දිස්ත්‍රික්ක මට්ටමින් දිනා ගත් වැඩිම මන්ත්‍රී ධුර ගණනට හිමිකම් කියන්නේ ද ජාතික ජන බලවේගයයි. මෙවර ජාතික ජන බලවේගය දිස්ත්‍රික්ක මට්ටමින් මන්ත්‍රී ධුර 141 ක් හිමි කර ගෙන තිබේ. මින් පෙර ඒ වාර්තාව තබා ඇත්තේ 2020 වසරේදී ආසන 128 ක් ලබා ගනිමින් ශ්‍රී ලංකා පොදුජන පෙරමුණයි.
එමෙන්ම මහමැතිවරණයකදි ජයග්‍රහණය කළ වැඩිම මන්ත්‍රී ධුර ගණන ලෙස මන්ත්‍රී ධුර 159 ක් ලබා ගෙන වාර්තාවක් පිහිටුවීමට ද ජාතික ජනබලවේගය සමත්ව තිබෙන අතර මින් පෙර ශ්‍රී ලංකා පොදුජන පෙරමුණ මන්ත්‍රී ධුර 145ක් ජයග්‍රහණය කර තිබිණි.
එමෙන්ම සමානුපාතික ක්‍රමය යටතේ පාර්ලිමේන්තුවේ ආසන 225න් 2/3ක් තනි පක්ෂයක් දිනා ගත් පළමු අවස්ථාව මෙය වන අතර එම වාර්තාව තැබීමට ද ජාතික ජන බලවේගය මෙවර සමත්ව තිබේ.
එමෙන්ම සියයට 3ක මනාප ප්‍රතිශතයක සිට ශ්‍රී ලංකා ඉතිහාසයේ මෙතරම් වාර්තා තබමින් මහමැතිවරණයක් ජයග්‍රහණය කළ පක්ෂය වන්නේ ද ජාතික ජන බලවේගයයි.
මෙවර මහමැතිවරණයේදී සමගි ජන බලවේගය ඡන්ද 1,968,716ක් ලබා ගනිමින් ජාතික ලැයිස්තු මන්ත්‍රී ධුර 5 ක් සමඟ සමස්ත මන්ත්‍රී ධුර 40ක් හිමි කර ගෙන තිබේ. සමගි ජන බලවේගය ලැබූ සමස්ත ඡන්ද ප්‍රමාණය ප්‍රතිශතයක් ලෙස සියයට 17.66ක් වේ.
එමෙන්ම තෙවැනි ස්ථානයට වැඩිම මන්ත්‍රී ධුර සංඛ්‍යාවක් දිනා ගැනීමට ඉලංකෙයි තමිල් අරසු කච්චි පක්ෂය සමත් වී ඇති අතර එම පක්ෂය ඡන්ද 257,813ක් හිමි කර ගෙන තිබේ. එම පක්ෂය ජාතික ලැයිස්තු මන්ත්‍රී ධුරය ද ඇතුළුව මන්ත්‍රී ධුර 8ක් හිමි කර ගැනීමට සමත්ව ඇත.
නව ප්‍රජාතන්ත්‍රවාදී පක්ෂය හිමි කර ගත් ඡන්ද සංඛ්‍යාව 500,835ක් වන අතර හිමි කර ගෙන ඇති මන්ත්‍රී ධුර සංඛ්‍යාව ජාතික ලැයිස්තු මන්ත්‍රී ධුර දෙකත් ඇතුළුව මන්ත්‍රී ධුර 5කි.
ශ්‍රී ලංකා පොදුජන පෙරමුණ ඡන්ද 350,429ක් දිනා ගනිමින් මන්ත්‍රී ධුර 3කට හිමිකම් කියන අතර ඉන් එක් මන්ත්‍රී ධුරයක් ජාතික ලැයිස්තු මන්ත්‍රී ධුරයකි. ශ්‍රී ලංකා මුස්ලිම් කොංග්‍රසය ඡන්ද 87,038ක් ලබා ගනිමින් මන්ත්‍රී ධුර තුනක් හිමි කරගෙන ඇති අතර ඉන් එක් ධුරයක් ජාතික ලැයිස්තුවෙන් හිමි කරගෙන තිබේ.
සර්වජන බලය ඡන්ද 178,008ක් ලබාගෙන එක් ජාතික ලැයිස්තු මන්ත්‍රී ධුරයක් දිනා ගෙන ඇත.
එක්සත් ජාතික පක්ෂය ද 66,234ක් ඡන්ද ලබා එක් මන්ත්‍රී ධුරයක් දිනා ගෙන තිබේ. මීට අමතරව ප්‍රජාතන්ත්‍රවාදී ද්‍රවිඩ ජාතික සන්ධානය ඡන්ද 66,382ක්, අඛිල ඉලංකෙයි තමිල් කොංග්‍රසය ඡන්ද 39,894ක්, අඛිල ඉලංකෙයි මක්කල් කොංග්‍රසය ඡන්ද 33,911ක්, යාපනය ස්වාධීන කණ්ඩායම 17 ඡන්ද – 27,855ක්, ශ්‍රී ලංකා කම්කරු පක්ෂය ඡන්ද 17710ක් ද, වශයෙන් ලබා ගෙන එක් මන්ත්‍රී ධුරයක් බැගින් හිමි කරගෙන තිබේ.
මෙවර මහමැතිවරණයේදී ලියාපදංචි ඡන්ද දායකයන් 17,140,354 දෙනකුගෙන් ඡන්දය ප්‍රකාශ කර ඇත්තේ 11,815246 දෙනකු එනම් ලියාපදිංචි ඡන්ද දායකයන්ගෙන් සියයට 68.93ක ප්‍රතිශතයකි.
එසේ ප්‍රකාශිත මනාප අතරින් 667,240 ක් ප්‍රතික්ෂේප වී තිබේ. ඒ අනුව මෙවර මැතිවරණයේ වලංගු ඡන්ද සංඛ්‍යාව වන්නේ 11,148,006කි.
මනාප වාර්ථාවක් විඡිතගෙන්….
මෙරට මැතිවරණ ඉතිහාසයේ අපේක්‍ෂකයකු ලබාගත් වැඩිම මනාප ප්‍රමාණය ලබාගනිමින්, ජාතික ජන බලවේගයේ ගම්පහ දිස්ත්‍රිත් නායක විජිත හේරත් මහතා සුවිශේෂ වාර්තාවක් පිහිටුවීමට සමත් විය.
ඔහු ලබාගත් මනාප සංඛ්‍යාව හත් ලක්ෂ දාසය දහස් හත්සිය පහළොවකි. මෙරට මැතිවරණ ඉතිහාසයේ වැඩිම දෙවැනි මනාප සංඛාව අත්පත් කරගනු ලැබුවේ ජාතික ජන බලවේගයෙන් කොළඹ දිස්ත්‍රික්කය සඳහා ඉදිරිපත් වූ අගමැතිනි ආචාර්ය හරිනි අමරසූරිය මෙණෙවිය වන අතර, මනාප ඡන්ද 655,289ක් ලබාගනිමින් කොළඹ දිස්ත්‍රික්කයේ පළමුවැනියා වීමට ඇය සමත්ව තිබේ.
හිටපු ජනපති මහින්ද රාජපක්ෂ මහතා 2020 මහ මැතිවරණයට කුරුණැගල දිස්ත්‍රිත්කයට තරග කරමින් ලබාගත් මනාප පන් ලක්ෂ විසි හත්දහස් තුන්සිය හැටහතර වැඩිම මනාප තෙවැනි ස්ථානයේ පසු වන අතර, 2015 මහ මැතිවරණයට කොළඹ දිස්ත්‍රික්කයෙන් තරග කළ හිටපු ජනාධිපති රනිල් වික්‍රමසිංහ මහතා මනාප පන් ලක්ෂ පන්සිය හැට හයක් ලබාගෙන තිබිණි.
1994 මහ මැතිවරණයේදී හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මහත්මිය පොදු පෙරමුණ යටතේ ගම්පහ දිස්ත්‍රික්කයෙන් තරග කරමින් මනාප හාර ලක්ෂ හැටහතර දහස් පන්සිය අසූඅටක් ලබාගැනීමට සමත්වූවාය.
2010 මහ මැතිවරණයේදී එක්සත් ජනතා නිදහස් සන්ධානය යටතේ ගම්පහ දිස්ත්‍රිකයෙන් තරග කළ බැසිල් රාජපක්ෂ මහතා මනාප 4 25,861ක් ලබා ගනිමින් එම මහ මැතිවරණයෙන් දිවයිනේ වැඩිම මනාපලාභියා බවට පත්විය. ඒ අනුව සමානුපාතික ඡන්ද ක්‍රමය අනුව 1989 සිට මේ දක්වා පැවති සියලු මැතිවරණ ප්‍රතිඵල අනුව වැඩිම මනාප සංඛ්‍යාවක් හිමිකර ගෙන ඇත්තේ, විජිත හේරත් මහතායි.
හිටපු 60ක් ගෙදර…
වසර ගණනාවක් තිස්සේ පාර්ලිමේන්තුව නියෝජනය කළ ප්‍රබල මැති ඇමැතිවරුන් 60කට අධික පිරිසක් මෙවර මහමැතිවරණයෙන් අන්ත පරාජයක් ලබා සිය මන්ත්‍රී ධුරය ද අහිමි කර ගෙන තිබේ.
මින් වැඩිම පිරිස හිටපු අනුප්‍රාප්තික ජනාධිපති රනිල් වික්‍රමසිංහ මහතා සමඟ එක් වූ පාර්ලිමේන්තු මන්ත්‍රීවරු වෙති. නව ප්‍රජාතන්ත්‍රවාදී පෙරමුණ නියෝජනය කරමින් මෙවර මැතිවරණයට ඉදිරිපත් වූ නිමල් සිරිපාලද සිල්වා, පවිත්‍රා වන්නිආරච්චි, මහින්ද අමරවීර, හරීන් ප්‍රනාන්දු, ජානක වක්කුඹුර, විජිත් විජයමුණි සොයියා, ප්‍රමිත බණ්ඩාර තෙන්නකොන්, රෝහණ දිසානායක, රමේෂ් පතිරණ, කංචන විජේසේකර, රංජිත් සියඹලාපිටිය, නිමල් ලංසා, ලසන්ත අලගියවන්න, මනූෂ නානායක්කර, අසංක නවරත්න, මහින්දානන්ද අලුත්ගමගේ, රාජිත සේනාරත්න යන හිටපු මැති ඇමැතිවරුන්ට මෙවර සිය මන්ත්‍රී ධුර දිනා ගැනීමට හැකියාවක් ලැබී නැත.
එමෙන්ම අනුරාධපුර දිස්ත්‍රික්කය නියෝජනය කරමින් වසර ගණනාවක් පාර්ලිමේන්තුව නියෝජනය කළ දුමින්ද දිසානායක මහතාට මෙන්ම කෑගල්ල දිස්ත්‍රික්කය නියෝජනය කරමින් පාර්ලිමේන්තුවට පත් වූ දුෂ්මන්ත මිත්‍රපාල මහතාට ද සිය මන්ත්‍රී ධුරය මෙවර අහිමි වී තිබේ. මීට අමතරව එස්.එම්. චන්ද්‍රසේන, තාරක බාලසූරිය, හිටපු නියෝජ්‍ය කථානායක අජිත් රාජපක්ෂ, ශාන්ත බණ්ඩාර මහත්වරුන්ට ද මෙවර සිය මන්ත්‍රී ධුරය අහිමි වී ඇත. අනුර ප්‍රියදර්ශන යාපා සහ චින්තක අමල් මායාදුන්න මහත්වරුන්ට ද සිය මන්ත්‍රී ධුර රැක ගැනීමට මෙවර අවස්ථාව අහිමිව ගොස් තිබේ.
මීට අමතරව සුසිල් ප්‍රේමජයන්ත, රෝසි සේනානායක, ප්‍රේමනාත් සී. දොළවත්තට ද පාර්ලිමේන්තු වරප්‍රසාද අහිමිව ගොස් තිබේ. ශ්‍රී ලංකා පොදුජන පෙරමුණ නියෝජනය කරමින් මෙවර මැතිවරණයට ඉදිරිපත් වූ ජොන්ස්ටන් ප්‍රනාන්දු, ප්‍රේමලාල් ජයසේකර, තේනුක විදානගමගේ, සංජීව එදිරිමාන්න, යූ.කේ. සුමිත්, රංජිත් බණ්ඩාර, ශෂීන්ද්‍ර රාජපක්ෂ, ඉන්දික අනුරුද්ධ, ප්‍රසන්න රණවීර, සරණ ගුණවර්ධන, ඩී.වීරසිංහ, සි.බී රත්නායක, සරත් වීරසේකර ප්‍රබලයන් රැසකට ද මෙවර මන්ත්‍රී ධුර දිනා ගැනීමට අවස්ථාව හිමිව නොමැත.
එමෙන්ම සමගි ජන බලවේගයේ චන්දිම වීරක්කොඩි, බන්දුලාල් බණ්ඩාරිගොඩ, බුද්ධික පතිරණ, අශෝක අබේසිංහ, ඩිලාන් පෙරේරා මහත්වරුන්ට ද පාර්ලිමේන්තු බලය අහිමි වී ඇත. මීට අමතරව සර්වජන බලය නියෝජනය කරමින් මෙවර මැතිවරණයට ඉදිරිපත් වූ චන්න ජයසුමන, දිලුම් අමුණුගොඩ, රොෂාන් රණසිංහ, වීරසුමන වීරසිංහ, උදය ගම්මන්පිල, චරිත හේරත් මහත්වරුන් ද මෙවර සිය මන්ත්‍රී ධුර අහිමි කර ගෙන තිබේ.
එමෙන්ම ප්‍රජාතන්ත්‍රවාදී හඬ නියෝජනය කරමින් මහමැතිවරණයට තරග කළ රංජන් රාමනායක සහ වඩුවේල් සුරේෂ් ද මෙවර තම මන්ත්‍රී අසුන අහිමිවීම විශේෂත්වයකි.
ඊළාම් ජනතා ප්‍රජාතන්ත්‍රවාදී පක්ෂයෙන් ඉදිරිපත් වූ ඩග්ලස් දේවානන්දා මහතාට ද මෙවර සිය මන්ත්‍රී ධුරය අහිමි වී ඇති අතර තමිල් මක්කල් විදුදලෛයි පුලිකල් පක්ෂයෙන් ඉදිරිපත් වූ ශිවනේෂතුරෙයි චන්ද්‍රකාන්තන් මහතා ද මෙවර සිය මන්ත්‍රී ධුරය හිමි වී තිබේ.
ඊට අමතරව ඉලංකෙයි තමිල් අරසු කච්චි පක්ෂයෙන් ඉදිරිපත් වූ එම්.ඒ. සුමන්දිරන් මහතාට ද මන්ත්‍රී අසුන අහිමි වී ඇත.
මාස ඒකහමාරක් තුල මාලිමාවේ සැලකියයුතු වර්ධනයක්….
ජනාධිපතිවරණයේ දී ජාතික ජන බලවේගය හිමිකරගත් මනාප ප්‍රමාණයට වඩා මෙවර මහමැතිවරණයේ දී මනාප සංඛ්‍යාව 1,228,271කින් ඉහළ ගොස් ඇත.
ජනාධිපතිවරණය අවසන්ව දින 54ක් වැනි කෙටි කාලයක් තුළ ජාතික ජන බලවේගය ජනතාවගේ විශ්වාසය පෙරට වඩා ශක්තිමත් කර ගැනීමට සමත්ව ඇති බව ඒ අනුව පෙනී යයි.
ජාතික ජන බලවේගයේ ජනපති ධුර අපේක්ෂකයා ලෙස ඉදිරිපත් ව ජනාධිපති ධුරයට පත්වූ අනුර කුමාර දිසානායක මහතා ජනාධිපතිවරණයෙන් ඡන්ද 5,634,915ක් ලබාගත් අතර මහමැතිවරණයේදී ජාතික ජන බලවේගය ලබාගත් මනාප ගණන 6,863,186කි.
ජනාධිපතිවරණයේදී සජිත් ප්‍රේමදාස මහතා ජනාධිපති ධුර අපේක්ෂකයෙක් ලෙස ඉදිරිපත් වූයේ සමගි ජන බලවේගයෙනි. එවර මැතිවරණයේදී සමගි ජන බලවේගය මනාප 4,363,035ක් ලබා ගත්ත ද මෙවර මහමැතිවරණයේදී සමගි ජන බලවේගයට හිමිවන්නේ මනාප 1,968,716ක් පමණි. ඒ අනුව පෙනී යන්නේ ජනාධිපතිවරණය අවසන්ව දින 54ක් වැනි කෙටි කාලයක් තුළ සමගි ජන බලවේගයේ ඡන්ද පදනම 2,394,319කින් අඩුවී ඇති බවය. සමගි ජන බලවේගය විශාල වශයෙන් පසුබෑමකට ලක්ව ඇති බව ඒ අනුව පෙනී යයි.
හිටපු ජනාධිපති රනිල් වික්‍රමසිංහ මහතා පසුගිය ජනාධිපතිවරණයට ඉදිරිපත් වූයේ නව ප්‍රජාතන්ත්‍රවාදී පෙරමුණෙනි. ජනාධිපතිවරණයේදී මනාප 2,299,767ක් මෙම පක්ෂයෙන් තරග කළ රනිල් වික්‍රමසිංහ මහතා ලබාගත්ත ද මෙවර මහමැතිවරණයේදී නව ප්‍රජාතන්ත්‍රවාදී පෙරමුණට හිමිවන්නේ මනාප 500,835ක් පමණි. ජනාධිපතිවරණයේදී ලබාගත් මනාප සංඛ්‍යාව හා සැසඳීමේදී නව ප්‍රජාතන්ත්‍රවාදී පෙරමුණේ මනාප ප්‍රමාණය දින 54ක් වැනි කෙටි කාලයක් තුළ 1,798,932කින් අඩුවී ඇත්තේ එම පක්ෂය ද විශාල පසුබෑමකට ලක් වෙමිනි.
ශ්‍රී ලංකා පොදුජන පෙරමුණෙන් ජනාධිපතිවරණයට තරග කළ නාමල් රාජපක්ෂ මහතා මනාප 342,781ක් ලබාගත්තේය. මෙවර මහමැතිවරණයේදී ශ්‍රී ලංකා පොදුජන පෙරමුණ මනාප 350,429ක් ලබාගෙන ඇත. ජනාධිපතිවරණයට සාපේක්ෂව ශ්‍රී ලංකා පොදුජන පෙරමුණ මනාප 7,648කින් සුළු වැඩිවීමක් මහමැතිවරණයේදී ළඟාකර ගැනීමට සමත්ව ඇතත් ශ්‍රී ලංකා පොදුජන පෙරමුණ යනු 2019 ජනාධිපතිවරණයේදී සිය පක්ෂය ඉදිරිපත් කළ කුලුඳුල් අපේක්ෂකයා වූ ගෝඪාභය රාජපක්ෂ මහතා ඡන්ද 6,924,255ක් ලබාගෙන ජනාධිපති ධුරයටත්, මහමැතිවරණයේදී ඡන්ද 6,853,693ක් ලබාගෙන පාර්ලිමේන්තුවේ තුනෙන් දෙකක බහුතර බලයක් හිමිකර ගත් පක්ෂයක් මේ තැනට වැටී ඇති බව අමතක නොකළ යුතුය.
2019 වසරේ ජනාධිපතිවරණයේදී සජිත් ප්‍රේමදාස මහතා අපේක්ෂකයෙක් ලෙස සමගි ජන බලවේගයෙන් ඉදිරිපත්වී ඡන්ද 5,564,239ක් ලබාගත්තත් 2020 මහමැතිවරණයේදී සමගි ජන බලවේගයට හිමිකර ගැනීමට හැකියාව ලැබෙන්නේ ඡන්ද 2,771,984ක් පමණි.
2019 ජනාධිපතිවරණයට ජාතික ජන බලවේගය සිය කුලුඳුල් අපේක්ෂකයා ලෙස අනුර කුමාර දිසානායක මහතා ඉදිරිපත් කරන අතර එහිදී ලබා ගැනීමට හැකියාව ලැබෙන්නේ ඡන්ද 418,553ක් පමණි. 2020 මහමැතිවරණයේදී ජාතික ජන බලවේගයට හිමිවන්නේ ඡන්ද 445,958කි. මෙවර මහමැතිවරණයේදී ලක්ෂ 68කට වැඩි මනාප ප්‍රමාණයක් ජාතික ජන බලවේගය හිමිකර ගන්නේ මෙයට පෙර අවසානයට ඉදිරිපත්වූ මහමැතිවරණයේ ලබාගත් ලක්ෂහතරහමාරකට ආසන්න මනාප ප්‍රමාණයජනතා විශ්වාසය තුළින් තවත් ඉහළ නංවා ගැනීමට සමත්වීම හේතු වෙනි.
ඡනපතිගෙන් සහ ටිල්වින්ගෙන් ඡනතාවට ප්‍රණාමය….
මහ මැතිවරණයේදී සුවිශේෂී ජයග්‍රහණයක් ලබාදීම සම්බන්ධයෙන් ජනාධිපති අනුර කුමාර දිසානායක මහතා ඡන්ද දායකයින් වෙත සිය ප්‍රණාමය පුදකර තිබේ.
සිය ‘X’ ගිණුමේ සටහනක් තබමින් ජනාධිපතිවරයා මෙලෙස ඡන්ද දාකයින් වෙත සිය ස්තූතිය පළකර තිබේ.
එහි ඔහු සඳහන් කර ඇත්තේ ‘ පුනරුද යුගය ඇරඹීමට උරදුන් සැමට ස්තූතියි!’ යනුවෙනි.
මේ අතර මෙවර පැවති පාර්ලිමේන්තු මහ මැතිවරණයේ දී පැරණි ප්‍රභූ පැලැන්තියේ සහ වරප්‍රසාද සහිත දේශපාලනය අවසන්ව පොදු ජනතාවගේ දේශපාලනයක් බිහිව ඇතැයි ජාතික ජන බලවේගය පක්ෂයේ ලේකම් ටිල්වින් සිල්වා මහතා පවසයි.එසේම මෙවර මැතිවරණයේදී ජාතිවාදය පරාජය වී ඇතැයි ද සදහන් කරයි.ඒ මහතා මෙම අදහස් පැවසූවේ එම පක්ෂ මූලස්ථානයේ දී අද සවස පැවති විශේෂ මාධ්‍ය හමුවේදී ය.ජනතාව ලබා දුන් තුනෙන් දෙකකට වැඩි බලයෙන් උදම්වී කටයුතු නොකර ජනතා සේවය වෙනුවෙන් කටයුතු කරන බව ද මෙම ජයග්‍රහණය බරක් බව වටහාගෙන කටයුතු කරන බව ද කීවේය.මෙවර මැතිවරණයේදී පරාජයට පත් වූයේ දේශලපාලඥයින් මිස ජනතාව නොවේ යැයි ද එනිසා රට ගොඩ නැගීමට සියලු දෙනා එක්ව කටයුතු කළ යුතු යැයිද පැවසූ ඒ මහතා ඒ සඳහා ජනාධිපති අනුර කුමාර දිසානායක මහතා ප්‍රමුඛ ජාතික ජන බලවේගය රජය උපරිම අයුරින් කටයුතු කරන බව ද සදහන් කළේය.
ඉන්දියාවත් සුබ පතයි…
මහ මැතිවරණයෙන් ජාතික ජන බලවේගය ලද විශිෂ්ට ජයග්‍රහණයට සුබපැතීම සඳහා ශ්‍රී ලංකාවේ ඉන්දීය මහ කොමසාරිස් සන්තෝෂ් ජා මහතා ජනධිපති අනුර කුමාර දිසානායක මහතා හමුවී තිබේ.
ඒ පිළිබඳ එක්ස් අවකාශයේ සටහනක් තබමින් ඉන්දීය මහ කොමසාරිස් කාර්යාලය සඳහන් කළේ, අසල්වැසි ප්‍රජාතන්ත්‍රවාදී රාජ්‍යයක් ලෙස ඉන්දියාව ජාතික ජන බලවේගය ලැබූ ජන වරමට සුබපතන අතර, දෙරටේ ජනතාවගේ සුබසෙත උදෙසා ද්වීපාර්ශ්වික සබඳතා තවදුරටත් ශක්තිමත් කරලීමට කැපවී සිටින බවය.
2024 මහමැතිවරණය යනු හේතු ගණනාවක් නිසාම සුවිශේෂී වූවකි. ලාංකේය දේශපාලනයේ දේශපාලනික හැරවුම් ලක්ෂ්‍යයක් ලෙස සුවිශේෂී වන්නා සේම මැතිවරණ දේශපාලනයට සෘජුව අදාළ වන අණපනත් කිහිපයක් නිසා ද, මෙම සුවිශේෂත්වය තීව්‍ර වන බව කිවහැකිය. පළමුකොටම මෙය පීඩාවට එරෙහිව හිස එසවූ ජනතා අරගලයේ තෙවැනි අදියරයි. පළමුවැන්න ලංකා ඉතිහාසයේ පළමුවරට මහජන විරෝධයෙන් විධායක ජනාධිපතිවරයකු ගෙදර යැවීමය. දෙවෙනි අදියර නම් ඉකුත් සැප්තැම්බර් 21 වැනිදා ලාංකේය වම ද, නිර්ප්‍රභූ දේශපාලනය ද එකවර නියෝජනය කළ අනුර කුමාර දිසානයක මෙරට පාලකයා බවට පත්වීමය. තාවකාලික ආණ්ඩු බලයක් ලබාගත්, සංක්‍රාන්තික කාලය නිමා කොට අනුර කුමාර දිසානායක ප්‍රමුඛ නිර්ප්‍රභූ දේශපාලන ව්‍යාපාරය පළමු වරට ‘රාජ්‍ය බලය‘ අත්පත් කරගන්නේ මෙම මැතිවරණයෙනි. 53 හර්තාලයෙන් පසු 1956 මහමැතිවරණය තුළින් ප්‍රජාතන්ත්‍රවාදී ලෙස අලුත් දේශපාලන පෙරළියක් සිදුවූ බව සැබෑය. එහෙත් එය පැවති වැඩවසම්, රදළ ප්‍රභූ ක්‍රමයේම පිල්මාරුවක් විනා නිර්ප්‍රභූ දේශපාලන ව්‍යාපාරයකට බලය මාරුවීමක් නොවේ. ඒ නිසාම මෙම මහමැතිවරණය සැබෑ ජනතා අරගලයේ ප්‍රකාශනයක් බැව් අමුතුවෙන් කිවයුතු නොවේ.
මහමැතිවරණයට ලබා දී ඇති සමස්ත නාමයෝජනා සංඛ්‍යාව 8888ක් වන අතර, ඉන් 527ක් ජාතික ලැයිස්තුව යටතේ භාර දී ඇත. සෙසු 8361ක් වන අපේක්ෂකයන් අතරින් අපේක්ෂකයන් 5015ක් පිළිගත් දේශපාලන පක්ෂවලින් ද ස්වාධීන අපේක්ෂකයන් ලෙස 3346ක් ද ඉදිරිපත්ව ඇති බව සඳහන්ය.
ඡනපතිගේ මැතිවරණ වේදිකාව…
මේ අතර ඡනාධිපති අනුර කුමාර දිසානායක මහතා පසුගිය සතිය පුරා මැතිවරණ රැස්වීම්වලටද සහභාගි වන අයුරු දැකගත හැකි විය. ආණ්ඩුවට ඇත්තේ කෙටි ආයුෂ කාලයක් බව විපක්ෂයේ කණ්ඩායම් පවසන්නට වීමත් සමඟ මැතිවරණ වේදිකාවේදී ඔහු ඊට පිළිතුරු බැඳ තිබුණි.
“ආණ්ඩුවට තියෙන්නෙ මාස 03 යි කියනවා. දැන් වෙන පක්ෂවල ක්‍රියාකාරිත්වයක් තිබෙනවද? අපේ ආණ්ඩුවට තියෙන්නෙ මාස 03 යි නම්, ගන්නෙ කවුද? ගන්න කෙනකුත් නැහැ. ඒ නිසා ජාතික ජනබලවේගය ආණ්ඩුව මේ රට හදලා මිසක් ආපසු හරවන්න බැරි බව මේ සියලු දෙනා තේරුම් ගත යුතුයි. මේ කතා ඔවුන් දුකට කියන කතා. ඔවුන් කවදාවත් හිතුවේ නැහැ, ඔවුන් අතින් මේ විදියට බලය ගිලිහෙයි කියලා. ඔවුන් හැමදාම හිතුවේ ඔවුන්ගේ කණ්ඩායම් අතරේ බලය තියාගන්න පුළුවන් කියලා. ඔවුන් කවදාවත් නොසිතූ දෙයක් සිදු වුණා.”
මේ අතර ජනාධිපතිවරයා දැකබලා ගැනීමට බලාපොරොත්තුවෙන් මහ මග රැඳී සිටි පිරිසක් අභිමුව සිය මෝටර් රථය නවතා දරුවන්ට සහ වැඩිහිටියන්ට කතා කර යාමට ජනාධිපතිවරයා කටයුතු තිබීම ද ඉකුත් සතියේ වාර්තා වූ සුවිශේෂී සිදුවීමක් විය. මේ පිළිබඳ වීඩියෝවක් සමාජ මාධ්‍ය පුරා සංසරණය වූයේය.
මේ අතර නුවරඑළියේ පිහිටි ජනාධිපති මන්දිරය සහිත උද්‍යානයේ කාබනික එළවළු හා පළතුරු වගා කෙරෙන්නේ රටේ ජනාධිපතිවරයාගේ පරිභෝජනය සඳහාය. සිකුරාදා සවස නුවරඑළිය ජනාධිපති මන්දිරයේ සිට එළවළු සහ පළතුරු කිලෝ ග්‍රෑම් 60 බැගින් කොළඹ ජනාධිපති මන්දිරයට එවීම වසර ගණනාවක් තිස්සේ සිදුවන්නකි. නව ජනාධිපති අනුර කුමාර දිසානායක මහතාට මෙම කරුණු වාර්තා වීමෙන් පසුව ඔහුට අපූරු අදහසක් මතු විය.
“අපේ රටේ සාමාන්‍ය මිනිස්සුන්ට පිටකොටුව එළවළු මාර්කට් එකේ එළවළු, පළතුරු කන්න හොඳ නම් ඒක මටත් පොදුයි. මාත් සාමාන්‍ය මනුස්සයෙක්.” යැයි කී ජනාධිපතිවරයා කාබනික වගාවේ එළවළු පළතුරු තමන්ට අවශ්‍ය නොවන බවත් ඒවා ආරක්ෂක අංශයට පරිභෝජනයට ගන්නා ලෙසත් අදාළ අංශවලට උපදෙස් ලබාදෙන ලදී.
මෙරට දේශපාලනයට ප්‍රමිතියක් සකස් කරන බව ජනාධිපති අනුර කුමාර දිසානායක මහතා පැවැසුවේ මහ මැතිවරණයේ ජයග්‍රහණය වෙනුවෙන් ජාතික ජන බලවේගය විසින් ඉකුත් 4 වැනිදා අම්පාරේ පැවැති ජන රැලියට සහභාගි වෙමිනි.
සිංහල, දෙමළ, මුස්ලිම් සියලු ජනතාවගේ විශ්වාසය දිනාගත් ආණ්ඩුව බවට අද ජාතික ජන බලවේගය ආණ්ඩුව පත්ව තිබෙන බවත් රටේ සහ දරුවන්ගේ අනාගතය රඳා පවතින්නේ ආර්ථික වශයෙන් අත්පත් කරගන්නා සංවර්ධනයෙන් පමණක් නොවන බවත් ජනාධිපතිවරයා එහිදී සඳහන් කළේය.
මේ අතර පාස්කු කමිටු වාර්තා, මුදල් අච්චු ගැසීම, ණය ලබා ගැනීම ඇතුළු කරුණු කිහිපයක් උපුටා දක්වමින් පසුගිය දිනවල උදය ගම්මන්පිල විසින් ආණ්ඩුවට අභියෝග කළේය. පසුගිය දිනවල පැවති කැබිනට් තීරණ දැනුම් දීමේ මාධ්‍ය හමු කිහිපයකදීම ගම්මන්පිලගේ මෙම අභියෝගය ගැන මාධ්‍යවේදීන් විජිත හේරත් අමාත්‍යවරයාගෙන් දිගින් දිගටම විමසන්නට විය.
“ඔය හැම කාරණයකටම ආණ්ඩුව විසින් ඉතා පැහැදිලි පිළිතුරු ලබා දීලා තියෙන නිසා ගම්මන්පිලගේ අභියෝගවලට තවදුරටත් පිළිතුරු දීම කාලය නාස්ති කිරීමක්. තවත් ඒ ගැන කතාකරලා වැඩක් නැහැ” යැයි විජිත හේරත් අමාත්‍යවරයා පිළිතුරු දුන්නේය.
සඡිත්ගේ උකුසු ඇස….
මේ අතර පසුගිය සතියේදී හිටපු විපක්ෂ නායක සජිත් ප්‍රේමදාස මහතා වැඩි වැඩියෙන් සමාජ මාධ්‍ය වේදිකා තුළට නිරාවරණය වීම ඉකුත් දෙසතිය පුරා සිදු කරමින් සිටියේය.
ඒ අනුව අනුර කුමාර දිසානායක ජනාධිපතිවරයාගේ සහ ජනාධිපති අපේක්ෂකයාගේ ක්‍රියා කලාප සහ ප්‍රකාශ තුළින් රටේ ජනතාව අතරමං වී ඇතැයි සමගි ජන බලවේගයේ නායක සජිත් ප්‍රේමදාස පවසා තිබුණි.
“අනුර කුමාර දිසානායක මහතා ජනාධිපතිවරණ වේදිකාවෙදි කිව්වෙ, රජයේ සේවකයන් වෙනුවෙන් මාස හයෙන් හයට වැටුප් වැඩි කරනවා, බඩු මිල, ඉන්ධන මිල, විදුලි බිල අඩු කරලා පාස්පෝට් පෝලිමට විසඳුම් ලබා දෙනවා කියල. නමුත් ඒ කිසිම දෙයක් සිද්ධ වෙලා නෑ. විදුලි බිල සියයට 33 කින් අඩු කරනවා, හොරකම අල්ලස දුෂණය නිසා විදුලි බිල වැඩි වෙනවා කියල කිව්වත් අද විදුලි බිල අඩු නොවන්නෙ මේ දූෂණය නිසාද කියල අපි දැනගන්න කැමතියි. අත්‍යාවශ්‍ය ආහාරවල මිල අඩු කරනවා කිව්වා. හැබැයි සාමාන්‍ය ජනතාව පාරිභෝජනය කරන සහල් ටිකවත් දරාගන්න පුළුවන් මිලකට දෙන්න බැරි වෙලා තියෙනවා. ඒ විතරක් නෙවෙයි, මෑත කාලයේ පොල් පෝලිම් ද ඇතිවෙලා.”
මේ අනුව පසුගිය සතිය වන විට සමගි ජනබලවේගය ද සිය මැතිවරණ යාන්ත්‍රණය වඩාත් සක්‍රීය කිරීමට උත්සාහ දරන බව පෙනී ගියේය.
මේ අතර සමගි ජන බලවේගයේ නායක සජිත් ප්‍රේමදාස මේ වන විට වැඩි අවධානයක් යොමු කරමින් සිටින්නේ සිරිකොත එක්සත් ජාතික පක්ෂයේ මුලස්ථානය වෙතය. ඊට හේතුව පසුගියදා ඔහුට ලැබුණු තොරතුරකි.
ඉන් කියැවුණේ ස.ජ.බ.යේ පිරිසක් හොර රහසේ එ.ජා.ප. නායක හිටපු ජනාධිපති රනිල් වික්‍රමසිංහ මුණ ගැසෙන බවකි. එම කපුකම එජාපයේ සභාපති වජිර අබේවර්ධන විසින් සිදු කොට ඇති බවද වාර්තා වී තිබිණි. පාර්ලිමේන්තු මහමැතිවරණයෙන් පසුව ස.ජ.බ.යෙන් තේරී පත්වන පාර්ලිමේන්තු මන්ත්‍රීවරුන් පිරිසකගෙන් රනිල් වික්‍රමසිංහට සහාය ලබා ගැනීමේ සැලසුමක් මේ වන විටත් වජිර අබේවර්ධන විසින් ආරම්භ කර තිබීම ඊට හේතුව බවද වාර්තා වේ.
රනිල්,මාලිමා ගැටුම….
හිටපු ජනාධිපති රනිල් වික්‍රමසිංහ මහතා දේශපාලනිකව සක්‍රිය වීමත් සමඟ ඉකුත් සතිය පුරාවට විවිධ කලබගෑනි වාර්තා විය. රනිල් – හරිනි ගැටුම ඒ අතරින් ප්‍රමුඛ වූයේය. පසුව රනිල් වික්‍රමසිංහ මහතා දිවයින පුරා රැස්වීම්වලට සහභාගි වීමද අරඹා තිබුණි. ඒ අනුව පසුගිය සතියේදී රනිල් වික්‍රමසිංහ මහතා ප්‍රකාශ කර තිබුණේ වත්මන් ආණ්ඩුවට එරෙහිව නඩු දෙකක් පැවරීමට නීතිඥයන් ඇතුළු පිරිසක් යෝජනා කළත් තමන් එය වළක්වාලූ බවයි.
“පැරදුණු අපේක්ෂකයෙක් පාර්ලිමේන්තුවේ දිවුරුම් දෙනතුරු ඇමැති කෙනෙක් ලෙස පත් කරන්නට බැරි බව හෝඩිය පන්තියේ කෙනෙක් වුණත් දන්නවා. ඉතින් මේ අය ලක්ෂ්මන් නිපුණආරච්චි පත් කළත් හොඳ වෙලාවට ඒක නතර වුණා. අගමැතිගේ පත් කිරීම සම්බන්ධවත් ඇතැමුන් අධිකරණයට යන්න සූදානම් වුණත් මම එය නතර කළා. අගමැති ලෙස පත් කළ යුත්තේ මේ රටේ පාර්ලිමේන්තුවේ බහුතරය තිබෙන කෙනා.
පළමුවෙන් දිනේෂ් ගුණවර්ධන මැතිතුමාගෙන් අහන්න තිබුණා. එතුමා බහුතරය නැතැයි කියනවා නම් විපක්ෂ නායකගෙන් අහන්න තිබුණා. 2019 ජනාධිපතිවරණයෙන් පසුව මා ගෝඨාභය රාජපක්ෂ ජනපති හමුවී අගමැති ධුරය තබා ගැනීමට කිසිම බලාපොරොත්තුවක් නැති බව පැවසුවා. නමුත් අප ඉල්ලා අස්වන්නේ බ්‍රහස්පතින්දා බවත් දැනුම් දුන්නා. නමුත් මෙවර එවැනි විමසීමක් සිදුවූයේ නැහැ. සමහර නීතිඥයන් පැමිණ නඩු පවරමු යැයි පැවසුවා. එසේ කළ යුතු නැති බව මම දැනුම් දුන්නා.”
රනිල් වික්‍රමසිංහ මහතා නඩු දැමීම වළක්වා තිබුණද ආණ්ඩුවෙන් ඔහුට නඩු වැටී තිබිණි. විදේශ සමාගම් දෙකකින් විදේශ ගමන් බලපත්‍ර හත් ලක්ෂ පනස්දාහක් මිලදී ගැනීමට එරෙහිව ගොනුකර ඇති පෙත්සමේ වගඋත්තරකරුවකු වශයෙන් හිටපු ජනාධිපති රනිල් වික්‍රමසිංහ මහතා නම් කිරීමට පෙත්සම්කාර පාර්ශ්ව කටයුතු කර තිබුණේ ඒ අනුවය.
මේ අතර රනිල් වික්‍රමසිංහ මහතාගේ දේශපාලන ක්‍රියාකාරීත්වය ආණ්ඩුවටද නොරිස්සුම් බව පෙනී ගියේ ජනතා විමුක්ති පෙරමුණ ප්‍රධාන ලේකම් ටිල්වින් සිල්වා කී කතාවත් සමඟිනි.
“පරාජයට පත්වූ රනිල් වික්‍රමසිංහ නැවත වටයකින් බොරු කියමින් විහිළු සපයමින් ජනතාව නොමග යැවීමට උත්සාහ කරනවා. රනිල් වික්‍රමසිංහගෙන් ව්‍යවස්ථාව ගැන ඉගෙන ගන්න කියලා ඔහු කියලා තිබුණා. ව්‍යාවස්ථාව සහ ප්‍රජාතන්ත්‍රවාදය ගැන කතා කරන්න එයාට කිසිම අයිතියක් නැහැ. ව්‍යවස්ථානුකූලව තිබුණු ඡන්ද කඩාකප්පල් කරපු, ප්‍රජාතන්ත්‍රවාදය විනාශ කරපු, අධිකරණය නියෝග පවා නොතකා හරිමින් වැඩ කරපු රනිල් වික්‍රමසිංහගෙන් ඉගෙන ගන්න තියෙන්නෙ ඒකාධිපතිවාදය ගැන මිස ප්‍රජාතන්ත්‍රවාදය සහ ව්‍යවස්ථාව ගැන නොවෙයි. පැරදුණාට පස්සෙත් ආණ්ඩුවෙන් කෝකියෝ 16 දෙනකු ඉල්ලා සිටියා නම්, ඒ කාලයේ කොහොම පාවිච්චි කරන්න ඇත්ද?”
මේ අතර වැඩිදුරටත් දේශපාලන ආරංචි මාර්ග ඔස්සේ දැන ගැනීමට ලැබුණේ මැතිවරණය අවසන් වූ සැණින් රනිල් වික්‍රමසිංහ මහතා විදෙස්ගත වීමට බලාපොරොත්තුවෙන් සිටින බවකි. ඔහු විවේකයක් ලබා ගැනීමේ අරමුණින් විදෙස්ගත වන බව කීවද යම් ජාත්‍යන්තර ආයතනයක තනතුරක අපේක්ෂාවක් පවතින බව ඇතැම් ආරංචි මාර්ග කියා සිටියි.
පොහොට්ටුව සුබවාදී බලාපොරොත්තුවක….
මේ අතර ශ්‍රී ලංකා පොදුජන පෙරමුණ ද බිම් මට්ටමේ දේශපාලන රැස්වීම් වැඩි වශයෙන් සංවිධානය කිරීමට කටයුතු කරන බව ඉකුත් සතිය පුරා පෙනී ගියේය. පොහොට්ටුවේ ජාතික සංවිධායක නාමල් රාජපක්ෂ මහතා දිවයින පුරා ගමන් කරමින් රැස්වීම් රැසකට සහභාගි වන අයුරු දැකගත හැකි විය. ඔහු දිගින් දිගටම කියා සිටියේ ආණ්ඩුවේ යහපත් තීරණවලට සහයෝගය දැක්වීමට තමා ඇතුළු කණ්ඩායම පසුබට නොවන බවකි. එසේම ජාතිකවාදී දේශපාලන ප්‍රතිපත්ති ආරක්ෂා කර ගැනීමේ කඳවුර බවට තමන් පත්ව සිටින බවත් ඔහු ජනතාවට සිහිපත් කළේය.
රට ඩිජිටල්කරණය කිරීම සඳහා ජනාධිපති අනුර කුමාර දිසානායක මහතාට අවශ්‍ය සහයෝගය ලබා දෙන බව ඔහු පවසා තිබුණේ ඒ අනුවයි. එසේම සිය පක්ෂයෙන් ඈත්වුණු පිරිස් දැන් නැවතත් පක්ෂයට පැමිණෙමින් සිටින බවද ඔහු පසුගිය සතියේ පවසා තිබුණි.
“පහුගිය ජනාධිපතිවරණයට පෙර සිදුවීම් එක්ක බැලු‍වාම හිත් අමනාපකම් හින්දා, යම් යම් කාරණා නිසා ජනතාව අපෙන් ඈත් වුණා. සමහරු නායකයෝ නිසා අපෙන් ඈත් වුණා. නායකයෝ වරදාන වරප්‍රසාද නිසා අපෙන් ඈත් වුණා. දිස්ත්‍රික් නායකයාගේ ක්‍රියා කලාපය නිසා ජනතාව ඈත් වුණා. වරදාන වරප්‍රසාද නිසා නායකයෝ ඈත් වුණා. ඈත්වෙච්ච නායකයෝ ගියාවේ කියල ඒ නායකයෝ නිසා හිත් අමනාප වෙච්ච, හිත් බිදිච්ච අපේ පාක්ෂිකයෝ නැවත වතාවක් අපි එක්ක එකතු වෙමින් ඉන්නවා. අපි ඔවුන්ව ආදරයෙන් පක්ෂයට පිළිගන්නවා. මොකද අපි වැඩ කරපු දේශපාලන පක්ෂයක්. අපි ගමට වැඩ කරලා තියෙනවා. මේ දරුවන්ගේ අධ්‍යාපනයට අපි වැඩ කරලා තියෙනවා. මම අදත් විශ්වාස කරනවා වර්තමාන ආණ්ඩුව මේ දරුවන්ගේ අධ්‍යාපනය හදන්න මහන්සි වෙන්න ඕනෑ.”
දිලිත් – රංඡන් කරටකර සටනක…
මැතිවරණ සටන අවසානය කරා එළඹෙන විට ආසන කිහිපයක් හෝ දිනා ගැනීමේ අරමුණු සහිතව කටයුතු කරන එක්සත් ප්‍රජාතන්ත්‍රවාදී හඬ සහ දිලීත් ජයවීරගේ සර්වජන බලය අතර ද තරගයක් නිර්මාණය වී ඇති බව පෙනී ගියේය.
මේ අනුව ඉකුත් සතියේ මෙම කඳවුරු දෙක අතර සීතල යුද්ධයක් නිර්මාණය වී ඇති බව මැතිවරණ වේදිකාවලදී ඔවුන් පවසන කතා ඇසුරින් පෙනී ගියේය.
රන්ජන් රාමනායකගේ පක්ෂයෙන් කළුතර දිස්ත්‍රික්කයෙන් ඉදිරිපත් වී සිටින ශ්‍රී ලංකා ක්‍රිකට් නායකයකු වූ තිලකරත්න ඩිල්ෂාන්ගේ පුරවැසිභාවය ද දිලිත් ජයවීර ඇතුළු සර්වජන බලය විසින් ප්‍රශ්න කර තිබුණි.
තමා ද්විත්ව පුරවැසිභාවය ලබා ඇති බවට කරන ප්‍රකාශ ඔප්පු කරන ලෙස එක්සත් ප්‍රජාතන්ත්‍රවාදී හඬ පක්ෂයේ අපේක්ෂක, හිටපු ශ්‍රී ලංකා ක්‍රිකට් නායක තිලකරත්න ඩිල්ෂාන් සර්වජන බලය පක්ෂයේ නායක දිලිත් ජයවීරට අභියෝග කර සිටියේය.
සිය පුරවැසිභාවය ප්‍රශ්න කිරීම සම්බන්ධයෙන් දිලිත් ජයවීරට බැණ වැදුණු තිලකරත්න ඩිල්ෂාන් කියා සිටියේ, දිලිත් ජයවීරට තම ප්‍රකාශය ඔප්පු කිරීමට හැකි නම් මැතිවරණ ව්‍යාපාරයෙන් ඉවත් වීමට තමා සූදානම් බවයි.
