2024 ජනවාරි 01 වැනිදා සිට ඔක්තෝබර් 6 වැනිදා දක්වා සුරාබදු දෙපාර්තමේන්තුව විසින් මත්පැන් බලපත්‍ර 361ක් නිකුත් කර ඇති බව ආණ්ඩු පක්ෂයේ ප්‍රධාන සංවිධායක පාර්ලිමේන්තු මන්ත්‍රී බිමල් රත්නායක පසුගියදා පාර්ලිමේන්තුවේදී අනාවරණය කළේය.හිටපු ජනාධිපති රනිල් වික්‍රමසිංහ මෙම මත්පැන් බලපත්‍ර දේශපාලන අල්ලස් ලෙස ලබාදී ඇති බව ආණ්ඩු පක්ෂයේ ප්‍රධාන සංවිධායකවරයා මෙම ලැයිස්තුව ඉදිරිපත් කරමින් සඳහන් කළේය.“මෙම බලපත්‍ර ලබා දුන්නේ හිටපු ජනාධිපති රනිල් වික්‍රමසිංහ විසින් දේශපාලන අල්ලස් ලබා දීමක් ලෙස බව මට පැහැදිලිවම ප්‍රකාශ කළ හැකිය,” යැයි බිමල් රත්නායක ප්‍රකාශ කළේය.
වැඩිම බලපත්‍ර සංඛ්‍යාව 110ක් නිකුත් කර ඇත්තේ බස්නාහිර පළාතින් බවද ඔහු පැවැසීය.එම ලැයිස්තුවට අනුව දකුණු පළාතට බලපත්‍ර 48ක් ලබාදී ඇති අතර මධ්‍යම පළාතට බලපත්‍ර 45ක් ලබාදී ඇත.එසේම උතුරු පළාතට බලපත්‍ර 32ක් සහ වයඹ සහ ඌව පළාත්වලට බලපත්‍ර 30 බැගින් ලබාදී ඇත.උතුරු මැද පළාතට බලපත්‍ර 14ක් ලබාදී ඇති අතර නැගෙනහිර පළාතට බලපත්‍ර 22ක් නිකුත් කර ඇත.
නිකුත් කර ඇති මුළු බලපත්‍රවලින් 172ක් වයින් ස්ටෝර්ස්වල මත්පැන් සිල්ලරට අලෙවි කිරීමට අවසර දෙන FL-4 කාණ්ඩය යටතේ ලබා දී ඇති බව බිමල් රත්නායක සම්පූර්ණ ලැයිස්තුව පාර්ලිමේන්තුවට ඉදිරිපත් කරමින් වැඩිදුරටත් විස්තර කළේය.
