එක්සත් රාජධානිය විසින් ශ්‍රී ලංකාවේ හිටපු හමුදාපතිවරුන් තිදෙනෙකු ඇතුලු සිව් දෙනෙකුට පණවා ඇති සම්බාධක ඒකාපාර්වික බවත් ඉන් ශ්‍රී ලංකා රජය අනුගමණය කරමින් සිටින සංහිඳියා ක්‍රියාදාමටද බාධා එල්ලවන බවත් සදහන් කරමිනක් ශ්‍රී ලංකාවේ විදේශ කටයුතු, විදේශ රැකියා සහ සංචාරක අමාත්‍යංශය විසින් නිවේදනයක් නිකුත්කරතිබේ.
රටවල් විසින් ගනු ලබන එවැනි ඒකපාර්ශ්වික පියවර ශ්‍රී ලංකාවේ දේශීය සංහිඳියා ක්‍රියාදාමයට කිසිදු සහයක් නොදක්වන අතර තත්වය තවදුරටත් ව්‍යාකූල කිරීමට ඉවහල් වන බව නිරීක්ෂණය වන බවද එහි සඳහන් වේ.
වගවීම සහ සංහිඳියාව පිළිබඳ දේශීය යාන්ත්‍රණ ශක්තිමත් කිරීමේ ක්‍රියාවලියේ රජය නිරතවී සිටින අතර අතීතයේදී සිදුවූ යම් මානව හිමිකම් උල්ලංඝණය කිරීම් ඇතහොත් ඒවා පිළිබඳ දේශීය වගවීම් යාන්ත්‍රණය හරහා කටයුතු කරන බව සිය නිවේදනය මගින් විදේශ අමාත්‍ය විජිත හේරත් මහතා පවසයි.
එක්සත් රාජධානිය විසින් ශ්‍රී ලංකාවේ හිටපු හමුදා ප්‍රධානීන් තිදෙනෙකු ඇතුළු සිව්දෙනෙකුට සම්බාධක පැනවීම සම්බන්ධයෙන් රජයේ ස්ථාවරය ප්‍රකාශ කිරීම සදහා බ්‍රිතාන්‍ය මහා කොමසාරිස් ඇන්ඩෘ පැට්‍රික් මහතා වෙත පසුගිය (26) වැනිදා දැනුම්දෙමින් විදේශ අමාත්‍යවරයා මේ බව සඳහන් කළේය.
අදාළ නිවේදනයේ වැඩිදුරටත් දැක්වෙන්නේ,
“ශ්‍රී ලංකාවේ සිවිල් යුද්ධය අතරතුර සිදුවූ මානව හිමිකම් උල්ලංඝනය කිරීම් හා අපයෝජන සම්බන්ධ එක්සත් රාජධානි සම්බාධක” යන මැයෙන් 2025 මාර්තු 24 වැනි දින එක්සත් රාජධානියේ විදේශ, පොදුරාජ්‍ය මණ්ඩල හා සංවර්ධන කාර්යාලය විසින් නිකුත් කරන ලද පුවත්පත් නිවේදනය කෙරෙහි විදේශ කටයුතු, විදේශ රැකියා සහ සංචාරක අමාත්‍යාංශයේ අවධානය යොමු වී තිබේ. එම පුවත්පත් නිවේදනයේ සඳහන් වී ඇති ආකාරයට, එක්සත් රාජධානියේ රජය පුද්ගලයන් සිවු දෙනකුට සම්බාධක පනවා ඇති අතර ඉන් තිදෙනෙක් ශ්‍රී ලංකා සන්නද්ධ හමුදාවල හිටපු ප්‍රධානීහූ වෙති."
"'වගකිවයුත්තන් දඬුවම් නොලබා සිටීමෙන් වැළැක්වීම සහතික කරන්නේ යැයි මැතිවරණ ව්‍යාපාරය අතරතුර දෙනු ලැබූ පොරොන්දුවක්' සම්බන්ධයෙන්ද එකී පුවත්පත් නිවේදනයේ සඳහනක් වෙයි."
"අදාළ පුද්ගලයන් සතුව එරට ඇති වත්කම් අත්හිටුවීම සහ ඔවුන්ට එරටට ඇතුළුවීම තහනම් කිරීම ඇතුළත් මෙම සම්බාධක එක්සත් රාජධානියේ රජය විසින් ගන්නා ලද ඒකපාර්ශ්වික පියවරක් බව විදේශ කටයුතු, විදේශ රැකියා සහ සංචාරක අමාත්‍යාංශය අවධාරණය කරයි. රටවල් විසින් ගනු ලබන එවැනි ඒකපාර්ශ්වික පියවර ශ්‍රී ලංකාවේ දේශීය සංහිඳියා ක්‍රියාදාමයට කිසිදු සහයක් නොදක්වන අතර තත්ත්වය තවදුරටත් ව්‍යාකූල කිරීමට ඉවහල් වන බව නිරීක්ෂණය වේ."
"වගවීම සහ සංහිදියාව පිළිබද දේශීය යාන්ත්‍රණ ශක්තිමත් ක්‍රියාවලියෙහි රජය නිරත වී සිටින අතර අතීතයේදී සිදුවූ යම් මානව හිමිකම් උල්ලංඝනය කිරීම් ඇතොත් ඒවා පිළිබඳව දේශීය වගවීම් යාන්ත්‍රණ හරහා කටයුතු කළ යුතු වේ."
මේ අතර ශ්‍රී ලංකාවේ සිවිල් යුද්ධය පැවති සමයේ මානව හිමිකම් කඩ කිරීම් සිදු කර තිබෙන බවට සඳහන් කරමින් ශ්‍රී ලංකාවේ හිටපු හමුදාපතිවරුන් තිදෙනකුට සහ එල්.ටී.ටී.ඊ. සංවිධානයේ හිටපු ප්‍රධානියකුට බ්‍රිතාන්‍ය රජය මඟින් සම්බාධක පනවා තිබේ. නීති විරෝධී ඝාතන කිරීම්, වධ හිංසා සහ ලිංගික හිංසන සිදු කිරීම් සහ ඊට වගකිවයුතු බව සඳහන් කරමින් මෙසේ සම්බාධක පනවා ඇත්තේ හිටපු ආරක්ෂක මාණ්ඩලික ප්‍රධානී ජෙනරාල් ශවේන්ද්‍ර සිල්වා, හිටපු නාවික හමුදාපති අද්මිරාල් වසන්ත කරන්නාගොඩ, හිටපු යුද හමුදාපති ජෙනරාල් ජගත් ජයසූරිය සහ එල්.ටී.ටී.ඊ සංවිධානයේ හිටපු ප්‍රධානියකු වන විනයාගමූර්ති මුරලිදරන් මහත්වරුන්ට එරෙහිවයි.
ඒ අනුව අදාළ පිරිසට එක්සත් රාජධානියේ සංචාරය තහනම් වන අතර එක්සත් රාජධානිය තුළ වත්කම් එක් රැස් කර තැන්පත් කිරීම ද තහනම් වෙයි.
ශ්‍රී ලංකාවේ සිවිල් යුද්ධය අතරතුර නීති විරෝධී ඝාතන, වධ හිංසා පැමිණවීම් සහ ලිංගික ප්‍රචණ්ඩත්වය සිදුකිරීම ඇතුළු මානව හිමිකම් උල්ලංඝනය කිරීම් සිදුව තිබෙන බව සඳහන් කරමින් මෙම සම්බාධක පනවා ඇතැයි එක්සත් රාජධානි රජයේ නිල වෙබ් අඩවිය වාර්තා කර තිබේ.
ඊට අමතරව මීට පෙර බ්‍රිතාන්‍ය පාර්ලිමේන්තුවේ පැවති විවාදයක ද හිටපු හමුදාපති ශවේන්ද්‍ර සිල්වා සහ හිටපු ආරක්ෂක ලේකම් ජෙනරාල් කමල් ගුණරත්න මහත්වරුන්ට එරෙහිව යුද අපරාධ චෝදනා එල්ල විය. මේ අතර ඔවුන් දෙදෙනාට අමෙරිකා එක්සත් ජනපදය ද සම්බාධක පැනවීමට මීට පෙර ක්‍රියා කළේය. කෙසේ වුවද මානව හිමිකම් සම්බන්ධයෙන් ශ්‍රී ලංකාවේ නව රජය සමඟ කටයුතු කිරීමට කැපවී සිටින බව ද එක්සත් රාජධානිය අවධාරණය කර තිබෙන අතර එක්සත් රාජධානියේ විදේශ, පොදුරාජ්‍ය මණ්ඩලයීය සහ සංවර්ධන කටයුතු පිළිබඳ රාජ්‍ය ලේකම් ඩේවිඩ් ලැමී ප්‍රකාශ කර ඇත්තේ සිවිල් යුද්ධයේදී සිදු වූ සහ අදටත් ප්‍රජාවන්ට බලපාන මානව හිමිකම් උල්ලංඝනය කිරීම් සහ අපයෝජන සඳහා වගකිව යුත්තන්ට දඬුවම් නොලැබීමට ඉඩනොදිය යුතු බවයි.
ප්‍රජාවන් එක්ව ඉදිරියට යෑමට නම්, අතීත වැරදි පිළිගැනීමක් සහ වගවීමක් තිබිය යුතු බවත් හඳුන්වාදී ඇති සම්බාධක මඟින් ඊට සහාය දක්වනු ඇති බවත් ඔහු පවසා තිබේ.
බ්‍රිතාන්‍ය විසින් හිටපු ශ්‍රී ලංකා සන්නද්ධ හමුදාපතිවරුන්ට එරෙහිව සම්බාධක පැනවීම සම්බන්ධයෙන් ප්‍රතිචාර දක්වමින් හිටපු ජනාධිපති මහින්ද රාජපක්ෂ මහතා නිවේදනයක් නිකුත් කර තිබේ.
එහි දැක්වෙන්නේ, "අදාළ චෝදනා කොතැනකවත් ඔප්පු කර නැති බව සැලකිය යුතුය. එල්ටීටීඊ සංවිධානයට එරෙහිව යුද්ධ කිරීමට තීරණය කළේ එකළ ශ්‍රී ලංකාවේ විධායක ජනාධිපතිවරයා වූ මමය. ශ්‍රී ලංකාවේ සන්නද්ධ හමුදා එම තීරණය ක්‍රියාත්මක කළහ."
"දශක තුනක එල්ටීටීඊ ත්‍රස්තවාදය නිසා සන්නද්ධ හමුදා සහ පොලිස් නිලධාරීන් 27,965 දෙනෙකුගේ ජීවිත පමණක් නොව දේශපාලන නායකයන් ඇතුළු සිවිල් වැසියන් තවත් දහස් ගණනකගේද ජීවිත නැති විය. 2009 දී ශ්‍රී ලංකාව පරාජය කළේ එක්සත් ජනපදයේ එෆ්.බී.අයි ආයතනය විසින් ලෝකයේ දරුණුම ත්‍රස්තවාදී සංවිධානය හැටියට 2008දී නිල වශයෙන් නම් කරන ලද සංවිධානයයි. විවිධ පාර්ශ්වයන් වෙතින් එල්ල වෙන නීතිමය පීඩාවලින් තමන්ගේ සන්නද්ධ හමුදාවන් ආරක්ෂා කරගැනීම සඳහා බ්‍රිතාන්‍ය රජය 2021දී සහ 2023 දී විශේෂ නීති සම්පාදනය කළ බවද අප මෙහිදී සිහිපත් කළ යුතුය."
"එබැවින්, ශ්‍රී ලංකාවේ ජාතික ආරක්ෂාව තහවුරු කිරීම සඳහා තම රාජකාරිය ඉටු කළ සන්නද්ධ හමුදා නිලධාරීන් ඉලක්ක කරමින් විදේශීය රජයන් සහ සංවිධානවලින් එල්ල වෙන තාඩන පීඩනවලට එරෙහිව වත්මන් ආණ්ඩුව ඍජුව පෙනී සිටිනු ඇතැයි මම අපේක්ෂා කරමි." යනුවෙන් සදහන්ව ඇත.
