ක්‍රිකට් ලොව රන් දෙවොල යනුවෙන් හඳුන්වන ඓතිහාසික ලෝඩ්ස් ක්‍රිකට් පිටියේ තණකොළ කපා විකිණීමට මාර්ලිබෝන් ක්‍රිකට් සමාජය කටයුතු යොදා ඇත. අඩි 3යි අඟල් 10ක් දිගින් හා අඩි 2ක් පළලින් යුත් තණ පිඩැල්ලක් ස්ටර්ලින් පවුම් 50 (ශ්‍රී ලංකා මුදලින් රුපියල් 20,200ක්) බැගින් අලෙවි කිරීමට සූදානම් වේ.
ලෝඩ්ස් ක්‍රිකට් පිටියේ තණකොළ සම්පූර්ණයෙන්ම ඉවත් කොට සංවර්ධනය කිරීමට මාර්ලිබෝන් ක්‍රිකට් සමාජය තීරණය කොට ඇති හෙයින් ක්‍රිකට් ක්‍රීඩා ලෝලීන්ට ක්‍රිකට් ඉතිහාසයේ කොටසක් ගෙදර ගෙනයෑමට අවස්ථාව ලබාදෙන බව එම සංගමය පවසා සිටී. වසර 1814දී ඉදිකරන ලද ලෝඩ්ස් ක්‍රිකට් පිටිය දශක දෙකකට වැඩි කාලයක් සංවර්ධනය වී නැති හෙයින් ලබන මාසයේදී තණකොළ සම්පූර්ණයෙන් ඉවත් කෙරේ.
ලෝඩ්ස්හි තණකොළ සාමාන්‍යයෙන් උසස් තත්ත්වයේ රයිග්‍රාස් මිශ්‍රණයක් වන අතර, පිටියේ වේගවත් බව ආරක්ෂා කර ගැනීමට මේ නඩත්තු කටයුත්ත කඩිනම් කළ යුතුව ඇතැයි පැවසේ. ඓතිහාසික ලෝඩ්ස් පිටියේ සිදත් වෙත්තමුණි, දුලිප් මෙන්ඩිස්, අමල් සිල්වා, මාවන් අතපත්තු, මහේල ජයවර්ධන, ටී.එම්. ඩිල්ෂාන්, කුමාර් සංගක්කාර හා ඇන්ජලෝ මැතිව්ස් ටෙස්ට් ශතක රැස්කර ගෙන ඇති අතර, උපුල් තරංග, දිනේෂ් චන්දිමාල් හා කුමාර් සංගක්කාර එක්දින ශතක ලබා තිබේ.
ලෝඩ්ස් ක්‍රීඩා පිටිය බොහෝ හේතු නිසා ප්‍රසිද්ධය. 2005 වන තෙක් එය ජාත්‍යන්තර ක්‍රිකට් කවුන්සිලයේ (ICC) මූලස්ථානය විය. ලෝඩ්ස් යනු මාර්ලිබෝන් ක්‍රිකට් සමාජ භූමියයි. වර්තමානයේ, එංගලන්ත සහ වේල්ස් ක්‍රිකට් මණ්ඩලයේ (ECB) සහ අයිසීසී යුරෝපා කාර්යාල පිහිටා ඇත. ලොව පැරණිතම ක්‍රීඩා කෞතුකාගාරවලින් එකක් සහ ක්‍රිකට් ආශ්‍රිත ප්‍රකාශනවල විශාලතම පුස්තකාලය ද ලෝඩ්ස් ක්‍රීඩා සංකීර්ණයේ පිහිටා ඇත.
ඉවත් කරන ලද තණකොළ විකුණා මාර්ලිබෝන් ක්‍රිකට් පදනම සඳහා අරමුදල් රැස් කිරීමට සහ ක්‍රීඩාංගණයේ අනාගත සංවර්ධනයට සහාය වීමට අපේක්ෂා කෙරේ. එකතුවන මුළු මුදලින් සියයට 10ක් මාර්ලිබෝන් ක්‍රිකට් පදනමට යන අතර ඉතිරි මුදල ක්‍රීඩාංගණයේ යටිතල පහසුකම් සංවර්ධනයට වැය කෙරේ. තණපිඩැලි අලෙවිය ලබන මස 29 හා 30 දින සිදු කිරීමට නියමිතය.
