හිටපු ජනාධිපති මහින්ද රාජපක්ෂ මහතා පසුගිය (11 වැනිදා) පස්වරු 1.25ට පමණ කොළඹ 07 විජේරාම මාවතේ පිහිටි සිය නිල නිවසින් තංගල්ලේ පිහිටි කාල්ටන් නිවස බලා පිටත්ව ගියේය. හිටපු ජනාධිපතිවරුන්ගේ හිමිකම් පනත පසුගිය 10 වනදා පාර්ලිමේන්තුව විසින් අහෝසි කිරීමත් සමග එම තීරණය ගෙන ඇත. එම අවස්ථාවේදී මාධ්‍යවේදීන් විසින් මහින්ද රාජපක්ෂ මහතාගෙන් “මොකක්ද මේ ගැන කියන්න තිබෙන්නේ” යනුවෙන් විමසා සිටි අතර, ඊට ප්‍රතිචාර දක්වමින් මහින්ද රාජපක්ෂ මහතා ප්‍රකාශ කර සිටියේ ”මොනවා කියන්න ද අපි යනවා” යනුවෙනි. එහිදී මාධ්‍යවේදීන් තවදුරටත් මහින්ද මහතාගෙන් මෙසේද විමසා සිටියේය.
මාධ්‍යය – ඉදිරි දේශපාලන කටයුතු කොහොමද?
මහින්ද රාජපක්ෂ මහතා – ඒවා කරනවා. දේශපාලනය අත්හරින්නේ නෑ.
මාධ්‍යය – තව මොනවද කියන්න තිබෙන්නේ?
මහින්ද රාජපක්ෂ මහතා –ජනතාවට ජයවේවා
එම අවස්ථාවේදී මාධ්‍යවේදීන් ශිරන්ති රාජපක්ෂ මහත්මියගෙන් ද අදහස් විමසා සිටි අතර ඊට ප්‍රතිචාර දක්වමින් ඇය “මම වැඩ කරනවා. කතා කරන්නේ නැහැ. මම දේශපාලනය කරන්නේ නැහැනේ, යනුවෙන් පැවැසුවාය.
මහින්ද රාජපක්ෂ මහතා සිය නිල නිවසින් පිටත්වීමට පෙර ඒ මහතාගේ සුවදුක් විමසීම සඳහා බෙල්ලන්විල රාජමහා විහාරාධිපති බෙල්ලන්විල ධම්මරතන හිමියෝද,චීන තානාපතිවරයා ද, සමගි ජන බලවේගයේ දිලිප් වෙදආරච්චි මහතා ද, ශ්‍රී ලංකා නිදහස් පක්‍ෂයේ මහින්ද අමරවීර මහතා ඇතුළු පිරිසක් ද පැමිණි සිටියහ.
එමෙන්ම ශ්‍රී ලංකා පොදුජන පෙරමුණේ හිටපු පාර්ලිමේන්තු මන්ත්‍රීවරුන් වන ඉන්දික අනුරුද්ද, සංජීව එදිරිමාන්න, ශාන්ත බණ්ඩාර, සම්පත් අතුකෝරළ, මෛත්‍රී පතිරණ, පියල් නිශාන්ත මෙන්ම එම පක්‍ෂයේ මහ ලේකම්වරයා වන නීතිඥ සාගර කාරියවසම් මහතා ද එම අවස්ථාවට එක්ව සිටියහ.
මේ අතර විජේරමයේ පිහිටි නිල නිවසෙන් පිටවගිය හිටපු ජනාධිපති මහින්ද රාජපක්ෂ මහතා එදින පස්වරුවේ තංගල්ලේ කාල්ටන් නිවසට පැමිණියේ ය.ඔහු පිළිගැනීම සදහා පාක්ෂිකයින් රැසක් පැමිණ සිටියේ ය.
මේ අතර හිටපු ජනාධිපති මෛත්‍රිපාල සිරිසේන මෙතෙක් තමාට ලබාදී තිබූ නිල නිවසින් පිටව ගොස් නැත.
මේ සම්බන්ධයෙන් හිටපු ජනාධිපතිවරයාගේ මාධ්‍ය කාර්යාලයෙන් කරන ලද විමසීමකදී ප්‍රකාශ කෙරුණේ, නිල නිවාස ආපසු භාරදීම සම්බන්ධයෙන් මෙතෙක් නිල දැනුම්දීමක් සිදුකර නොමැති බවයි.එවැනි නිල දැනුම්දීමක් ලිඛිතව සිදුකෙරුණු පසු හිටපු ජනාධිපතිවරයා නිවසින් පිටව යනු ඇති බවද ප්‍රකාශ විය.
ජනාධිපතිවරුන්ගේ හිමිකම් (අවලංගු කිරීමේ) පනත බලාත්මක කිරීමෙන් පසු, මාස දෙකක් ඇතුළත තම නිල නිවසින් ඉවත් වන බව හිටපු ජනාධිපතිනි චන්ද්‍රිකා බණ්ඩාරනායක කුමාරතුංග පැවසුවාය.
ඇය 1994 සහ 2005 අතර මෙරට පාලනය කළ ජනාධිපතිවරියයි.
නව නීතිය ක්‍රියාත්මක වීමෙන් පසු ඇගේ ඊළඟ පියවර පිළිබඳව මාධ්‍ය වෙත අදහස් දක්වමින් ඇය පවසා ඇත්තේ ඇයට කොළඹ පදිංචි වීමට දැනට ප්‍රතිසංස්කරණය වෙමින් පවතින නිවසක් හමු වූ බවයි.
රෙගුලාසිවලට අනුව, රජයේ නිවසක වාසය කරන ඕනෑම අයකුට එම පරිශ්‍රයෙන් ඉවත් වීමට මාස තුනක කාලයක් ලබා දිය යුතු බව ඇය පැවසුවාය.
ඒ අනුව මේ සම්බන්ධයෙන් තවමත් දැනුම් දී නොමැති බව ඇය පැවසුවාය.
කෙසේවෙතත්, ඇය ඉවත් වීමට මාස දෙකකට වඩා ගත නොවන බවත්, ප්‍රතිසංස්කරණ කටයුතු නියමිත කාලයට පෙර අවසන් කළහොත් එම කාලය ඊටත් වඩා අඩු වනු ඇති බවත් ඇය පැවසුවාය.
සති තුනකට පෙර වැටීම නිසා උකුල ආශ්‍රිත සැත්කමකින් සුවය ලබමින් සිටින බවත් උඩු මහලේ සිට පහළට පවා යා නොහැකි බවත් ඇය පැවසුවාය.
“මට අලුත්වැඩියාවක් කරන්න පොඩි ගෙයක් හම්බුනා. මගේ පුතා කිව්වා සතියකට ඇවිත් මට උදව් කරන්නම් කියලා. මේ අතර, සති තුනකට කලින් මම වැටිලා මගේ උකුල කැඩුනා. මට උකුල ස්ථානගත කිරීමේ සැත්කමක් කළා. ඒක බරපතළ සැත්කමක්. මට දිනකට දෙතුන් වතාවක් භෞත චිකිත්සාව තියෙනවා. ඒ නිසා, මට මේ මොහොතේ ඒ අලුත් ගෙදර කිසිම වැඩක් කරන්න බැහැ,” යනුවෙන් ඇය පැවසුවාය.
නව නීතිය ක්‍රියාත්මක වන තෙක් බලා සිටි ඇය, රජය විසින් තක්සේරු කරන ලද කුලිය ගෙවා තම ජීවිත කාලය පුරාම වත්මන් ස්ථානයේ ජීවත් වීමට අවසර ඉල්ලා ජනාධිපති අනුර කුමාර දිසානායකට ලිපියක් යැවූ නමුත් එය ප්‍රතික්ෂේප කළ බව පැවසුවාය
2017 සිට 2025 මුල් මාස හය දක්වා හිටපු ජනාධිපතිවරුන් සහ ඔවුන්ගේ වැන්දඹුවන් සඳහා වියදම් සඳහා රුපියල් මිලියන 491.2 ක් (රු. 491,203,422) වැයකර ඇති බව රජය හෙළි කර තිබේ.
මේ අතර 2017 සිට 2025 මුල් මාස හය දක්වා හිටපු ජනාධිපතිවරුන් සහ ඔවුන්ගේ වැන්දඹුවන් සඳහා වියදම් සඳහා රුපියල් මිලියන 491.2 ක් (රු. 491,203,422) වැයකර ඇති බව රජය හෙළි කර තිබේ.
හිටපු ජනාධිපතිවරුන් වන චන්ද්‍රිකා කුමාරතුංග, මහින්ද රාජපක්ෂ, මෛත්‍රීපාල සිරිසේන, ගෝඨාභය රාජපක්ෂ, රනිල් වික්‍රමසිංහ සහ හිටපු ජනාධිපති ආර්. ප්‍රේමදාසගේ වැන්දඹු බිරිඳ හේමා ප්‍රේමදාස යන අයගේ විශ්‍රාම වැටුප්, වාහන සහ අනෙකුත් පුනරාවර්තන වියදම් මෙම වියදමෙන් ආවරණය කෙරේ.
වාර්තාවට අනුව, 2017 සිට හේමා ප්‍රේමදාස, චන්ද්‍රිකා කුමාරතුංග සහ මහින්ද රාජපක්ෂ, 2019 සිට මෛත්‍රීපාල සිරිසේන, 2022 සිට ගෝඨාභය රාජපක්ෂ සහ 2024 සිට රනිල් වික්‍රමසිංහ යන අයට ප්‍රතිලාභ හිමිවී ඇත.
