මතභේදාත්මක අයර්ලන්ත හිප්-හොප් සංගීත කණ්ඩායමක් වන Kneecap හට කැනඩාවට ඇතුළුවීම තහනම් කර තිබේද යන්න පිළිබඳව කැනේඩියානු රජයෙන් තවමත් නිල දැනුම්දීමක් ලැබී නොමැති බව සංගීත කණ්ඩායමේ කළමනාකරු පසුගිය සඳුදා පැවසීය.ඒ ඔවුන්ට කැනඩාවට ඇතුල්වීමේ තහනම ප්‍රකාශයට පත් කර දින 10 කට පසුවය.
"කිසිවක් පිළිබඳව නිල දැනුම් දීමක් නැහැ," සංගීත කණ්ඩායමේ කළමනාකරු ඩැනියෙල් ලැම්බර්ට් මාධ්‍ය වෙත පැවසුවේ, තහනම පිළිබදව "වින්ස්ගේ සමාජ මාධ්‍ය වීඩියෝව උපුටා දක්වමිනි.."
අපරාධ මර්දනය සඳහා පාර්ලිමේන්තු ලේකම්, ලිබරල් මන්ත්‍රී වින්ස් ගැස්පාරෝ පසුගිය සැප්තැම්බර් 19 වන දින ඔහුගේ සමාජ මාධ්‍ය වෙත වීඩියෝවක් පළකරමින් සදහන් කළේ රජය Kneecap සාමාජිකයින් කැනඩාවට ඇතුළුවීමට නුසුදුසු බවට සලකන බවයි.
"කැනඩා රජය වෙනුවෙන් මම නිවේදනය කරන්නේ අපගේ නිලධාරීන්ගේ උපදෙස් පරිදි, Kneecap කණ්ඩායම අපේ රටට ඇතුළුවීමට නුසුදුසු යැයි අපි සලකන බවයි," ගැස්පරෝ එම සටහනේ පැවසීය.
ගාසා තීරයේ ඊශ්‍රායල හමුදා මෙහෙයුමට විරෝධය පළ කරන සහ පලස්තීන ජනතාවට සහයෝගය දක්වමින් Kneecap සංගීත කණ්ඩායම මේ මාසයේ ටොරොන්ටෝ සහ වැන්කුවර් හිදී ප්‍රසංගයක් පැවැත්වීමට නියමිතව තිබුණි.
වීඩියෝවේ දී ගැස්පාරෝ පැවසුවේ කණ්ඩායම දේශපාලන ප්‍රචණ්ඩත්වය සහ ත්‍රස්තවාදය අනුමත කර ඇති බවත්, එක් සාමාජිකයෙකුට එක්සත් රාජධානියේ "ත්‍රස්තවාදයට අදාළ චෝදනා" එල්ල වී ඇති බවයි.
පසුගිය වසරේ ලන්ඩන් ප්‍රසංගයක් අතරතුර ලෙබනන් සටන්කාමී කණ්ඩායමක් වන හිස්බුල්ලා හි ධජයක් ලෙලවීම සම්බන්ධයෙන් චෝදනා එල්ල වූ ලියම් ඕග් ඕ හන්නයිද්ට එරෙහි නඩුව බ්‍රිතාන්‍ය විනිසුරුවරයෙකු විසින් පසුගිය සිකුරාදා නිෂ්ප්‍රභ කළේය.හිස්බුල්ලා සංවිධානය එක්සත් රාජධානියේ සහ කැනඩාවේ ලැයිස්තුගත ත්‍රස්ත සංවිධානයකි.
බ්‍රිතාන්‍ය නඩුව දැන් ඉවත් කර ඇති බැවින් Kneecap හට කැනඩාවට ඇතුළුවීමට අවසර ලැබේද යන්න පිළිබඳව වාර්තාකරුවන් ඇසූ ප්‍රශ්නවලට පිළිතුරු දීම ගැස්පරෝ ප්‍රතික්ෂේප කළේය.
පසුගිය සඳුදා නිවේදනයක් නිකුත් කරමින්, ආගමන, සරණාගතයින් සහ පුරවැසිභාවය කැනඩාව (IRCC) පැවසුවේ රහස්‍යතා හේතූන් මත Kneecap හි නිශ්චිත නඩුව පිළිබඳව අදහස් දැක්විය නොහැකි බවත් විධිමත් ඇතුල්වීමේ තහනමක් ක්‍රියාත්මක කර තිබේද නැතහොත් එකක් පවතිනවාද යන්න තහවුරු නොකළ බවයි
අයර්ලන්ත පුරවැසියන්ට කැනඩාවට යාමට වීසා බලපත්‍රයක් අවශ්‍ය නොවන නමුත් විද්‍යුත් සංචාරක අවසරයක් (eTA) අවශ්‍ය වේ, එය මාර්ගගතව අයදුම් කරන අතර ගුවන් මගින් පැමිණෙන විට අවශ්‍ය වේ.
ගැස්පරෝගේ වීඩියෝවට ප්‍රතිචාර දක්වමින් සමාජ මාධ්‍ය පණිවිඩයක් නිකුත් කරමින්, Kneecap පැවසුවේ එහි සාමාජිකයින්ට දැනටමත් වලංගු විද්‍යුත් සංචාරක අවසර පත්‍ර නිකුත් කර ඇති බවයි.
"සෑම සිද්ධියක්ම තනි තනිව තක්සේරු කරනු ලැබේ," IRCC ප්‍රකාශක පැවසීය. "ආරක්ෂාව, මානව හෝ ජාත්‍යන්තර අයිතිවාසිකම් උල්ලංඝනය කිරීම් හෝ අපරාධ ක්‍රියාකාරකම් සම්බන්ධ ගැටළු ඇතුළු හේතු ගණනාවක් නිසා කැනඩාවට ඇතුළුවීම ප්‍රතික්ෂේප කළ හැකිය."
ඊශ්‍රායල හමුදාව ගාසා තීරය විනාශ කිරීම පුරාවට පලස්තීන අරමුණට සහාය දැක්වීම නිසා සංගීත කණ්ඩායම නිහඬ කිරීමට උත්සාහ කරන බවට Kneecap චෝදනා කර තිබේ.තමන් හිස්බුල්ලා සහ හමාස් සංවිධානයට සහාය නොදක්වන අතර ප්‍රචණ්ඩත්වය අනුමත නොකරන බව සංගීත කණ්ඩායම පවසයි.
තහනම වෙනුවෙන් පෙනී සිටි ඊශ්‍රායල සහ යුදෙව් කටයුතු මධ්‍යස්ථානය සහ යුදෙව් උපදේශන සංවිධානයක් වන බ'නායි බ්‍රිත් කැනඩාව, ගැස්පරෝගේ නිවේදනය සඳහා රජයට ප්‍රශංසා කර තිබේ.
