කැනේඩියානු මාධ්ය සොයාගත් RCMP ලේඛනයකට අනුව, කැනඩාවේ කප්පම් ගැනීම් සහ කුලියට මිනීමැරුම් සම්බන්ධයෙන් චෝදනා ලැබූ ඉන්දියානු කල්ලියක් “ඉන්දියානු රජය වෙනුවෙන් ක්රියා කරමින්” සිටීනබව වාර්ථා කර ඇත..මෙලෙස චෝදනා එල්ලවූ ලෝරන්ස් බිෂ්නෝයි කල්ලිය පිළිබඳ, RCMP වාර්තාවක අපරාධ කණ්ඩායමට ඉන්දීය රජය සමඟ ඇති බව කියන සබඳතා දක්වා තිබිණි.
පසුගිය වසරේ අභ්යන්තරව බෙදා හරින ලද මෙම ලේඛනය, කැනඩාවේ බිෂ්නෝයි කල්ලියේ වර්ධනය වන පැවැත්ම පිළිබඳ රහසිගත තක්සේරුවකි. තොරතුරු දැනගැනීමේ පනත යටතේ කැනේඩියානු මාධ්ය ආයතනයක් වෙත පිටපතක් නිකුත් කරන ලදී.
“බිෂ්නෝයි අපරාධ කණ්ඩායම යනු කැනඩාව ඇතුළු රටවල් කිහිපයක ක්රියාකාරී, අඛණ්ඩව ව්යාප්ත වන පැවැත්මක් සහිත ප්රචණ්ඩකාරී අපරාධ සංවිධානයකි” යනුවෙන් වාර්තාවේ දැක්වේ.
දේශපාලනික හෝ ආගමික චේතනාවන්ට වඩා කෑදරකමෙන් පෙලඹී, බිෂ්නෝයි කල්ලිය කප්පම් ගැනීම්, මත්ද්රව්ය ජාවාරම්, මුදල් විශුද්ධිකරණය සහ කොන්ත්රාත් ඝාතන සිදු කරන බව RCMP සඳහන් කරයි.
“බිෂ්නෝයි අපරාධ කණ්ඩායම ඉන්දීය රජය වෙනුවෙන් ක්රියා කරන අතරම, ඔවුන්ගේ අපරාධ ව්යාපාරය ඉදිරියට ගෙන යාම සඳහා ප්රචණ්ඩත්වය භාවිතා කරන බව දන්නා කරුණකි,” යනුවෙන් “ආරක්ෂිත A” ලෙස සලකුණු කර ඇති එම වාර්ථාවේ සඳහන් විය.
වාර්තාවේ දිනයක් සදහන් කර නැත, නමුත් එය BC අගමැති ඩේවිඩ් එබි විසින් 2025 ජුනි 17 වන දින රජයෙන් බිෂ්නෝයි කල්ලිය ත්රස්තවාදී සංවිධානයක් ලෙස ලැයිස්තුගත කරන ලෙස ඉල්ලා සිටිමින් කළ ප්රකාශයට සම්බන්ධ කරයි.
ජනවාරි 12-17 දිනවල එබි ඉන්දියාවට වෙළඳ මෙහෙයුමක් ආරම්භ කළ දිනයේම එය RCMP විසින් නිකුත් කරන ලදී . අගමැති මාර්ක් කාර්නි ද මෙම වසර අගදී ඉන්දියාවට පැමිණීමට අදහස් කරන බව වාර්තා වේ.
මෙම රාජ්ය තාන්ත්රික තල්ලුව, කැනඩාවේ වෙළඳ හවුල්කාරිත්වයන් විවිධාංගීකරණය කිරීමට සහ එක්සත් ජනපද ජනාධිපති ඩොනල්ඩ් ට්රම්ප්ගේ නායකත්වයෙන් යුත් අක්රමවත් තීරුබදු තන්ත්රයක් සමනය කිරීමට දරන පුළුල් උත්සාහයක කොටසකි.
ඉන්දියාවේ ප්රචණ්ඩ ක්රියා ව්යාපාරයේ ප්රධාන ඉලක්ක වන කැනේඩියානු සික්වරුන් නියෝජනය කරන සංවිධාන, ඉන්දියාව සමඟ සබඳතා ගැඹුරු කිරීමට ගන්නා උත්සාහයන්ට විරෝධය පළ කර තිබේ.දකුණු ආසියානු කැනේඩියානුවන් ඉලක්ක කරගත් ඝාතන කුමන්ත්රණ සම්බන්ධයෙන් ඉන්දියාව වගකිව යුතු බවට චෝදනා කරනවාට වඩා වැඩිදියුණු කළ වෙළඳාමට ප්රමුඛත්වය දීමෙන් දේශපාලනඥයින් තමන්ව පාවා දුන් බවට ඔවුහු චෝදනා කරති.
“කැනඩාවේ පුද්ගලයින් ඉලක්ක කර ගැනීම සඳහා බිෂ්නෝයි කල්ලිය ඉන්දීය රජය සමඟ සම්බන්ධීකරණයෙන් ක්රියාත්මක වන බව RCMP සහ කැනඩා රජය පැහැදිලිවම දනී” යැයි කැනඩාවේ ලෝක සික් සංවිධානයේ ප්රකාශක බල්ප්රීත් සිං පැවසීය.”නමුත් දේශපාලන පහසුව සඳහා, මෙම යථාර්ථය අවතක්සේරු කර සඟවා ඇත,” ඔහු පැවසීය.
2023 ජුනි 18 වන දින බ්රිතාන්යයේ සරේ හිදී වෙඩි තබා ඝාතනය කරන ලද සික් නායක හර්දීප් සිං නිජ්ජර්ගේ ඝාතනයෙන් පසු කැනඩාවේ ප්රචණ්ඩ ක්රියා පිටුපස ඉන්දියාව සිටින බවට ඇති කනස්සල්ල සිරස්තලවලට පත් විය.
නිජ්ජාර් ඉන්දියාවේ සික් බහුතරයක් සිටින පන්ජාබ් ප්රාන්තයට නිදහස ඉල්ලා සිටින කාලිස්ථාන ව්යාපාරයේ නායකයෙකි. ඉන්දියාව ඔහුව “ත්රස්තවාදියෙකු” ලෙස හංවඩු ගසා අත්අඩංගුවට ගන්නා ලෙස කැනඩාවට බලපෑම් කළේය.
