ලෝක කුසලාන ක්රිකට් තරගාවලියේ ඔස්ට්රේලියාව කඩුලු 8කින් පරදවා සුපිරි අට වටයට පිවිසි ශ්රී ලංකා කණ්ඩායම තරගාවලියට එක්ව සිටින අනෙක් සියලු කණ්ඩායම්වලට අනතුරු ඇඟවීමක්ද කරමින් ඉදිරියට පැමිණ සිටියි.
ශ්රී ලංකාව මූලික වටයේ සිම්බාබ්වේ සමඟ තරගය ඉතිරිව තිබියදීම සුපිරි 8 වටයට සුදුසුකම් ලබාගත් අතර, එම සුපිරි වටයේ පළමු තරගය එළැඹෙන 22 වැනිදා එංගලන්තය සමඟ පල්ලෙකැලේ ජාත්යන්තර ක්රීඩාංගණයේදී පස්වරු 3ට පැවැත්වේ.
අඛණ්ඩව ප්රමුඛ ජයග්රහණ තුනක් වාර්තා කළ ශ්රී ලංකා පිල විශාල වර්ධනයක් පෙන්නුම් කිරීම අනෙක් සියලු කණ්ඩායම්වලට දැන් ප්රශ්නයක් මතු කර තිබේ. ප්රබල ඔස්ට්රේලියාවට එරෙහිව පෙරේදා මහනුවරදී ලැබූ දැවැන්ත ජයග්රහණය ශ්රී ලංකා ක්රීඩකයන්ගේ විශ්වාසය සහ ප්රවීණත්වය යන දෙකම අවධාරණය කළහ. අයර්ලන්තය සහ ඕමානය යන කණ්ඩායම් දෙකම පරාජය කිරීමෙන් පසුව කැන්ගරුවෝ ශ්රී ලංකා පිල ඉදිරියේ අසරණ වූහ.
ලෝක කුසලාන තරගාවලියේ මෙවර පළමු ශතකයට හිමිකම් කීමට ශ්රී ලංකා ආරම්භක පිතිකරු පැතුම් නිශ්ශංක සමත් විය. පන්දු 52කදී හයේ පහර 5ක් හා හතරේ පහර 10ක් සමඟ නොදැවී ලකුණු 100ක් ලබාගත් ඔහු විස්සයි20 දිවියේ දෙවැනි ශතකය සම්පූර්ණ කිරීම මෙහිදී කැපී පෙනිණි.
තරගයේ තවත් හැරවුම් ලක්ෂ්යයක් සටහන් කළ පැතුම් නිශ්ශංක මෙවර ලෝක කුසලාන තරගාවලියේ හොඳම උඩ පන්දුව රැක ගනිමින් ඔස්ට්රේලියාවේ භයානකම පිතිකරු ග්ලෙන් මැක්ස්වෙල් දවා ගැනීමට සමත්වීමද අමතක කළ යුතු නැත. දඟ පන්දු යවන දුෂාන් හේමන්තගේ පන්දුවකට මැක්ස්වෙල් ‘රිවර්ස් ස්විප්’ පහරක් එල්ල කළ අතර, ‘බැක්වර්ඩ් පොයින්ට්’හි සිටි පැතුම් උඩු ගුවනේ වම් පැත්තට පියාසර කරමින් අපූරු ග්රහණයක් කිරීම දර්ශනීය අවස්ථාවක් විය.
ශ්රී ලංකාව මේ වන විට ‘බී’ කාණ්ඩයේ ප්රසාද ලකුණු සටහනේ ලකුණු 6ක් වාර්තා කොට පෙරමුණටම පැමිණ සිටියි. මේ තත්ත්වය මත තරග දෙකක් පරාජය වී සිටින ඔස්ට්රේලියාව සුපිරි 8 වටයට පිවිසීමට නොහැකි විය.
මේ අතර ජාත්යන්තර ක්රිකට් කවුන්සිලය (ICC) එළිදැක්වූ නවතම විස්සයි20 පිතිකරුවන් ශ්රේණිගත කිරීම අනුව ශ්රී ලංකා ආරම්භක පිතිකරු Pathum Nissanka 3වන ස්ථානය දක්වා ඉදිරියට පැමිණ තිබේ.
ඔස්ට්රේලියාවට එරෙහිව අවසන් වූ තරගයේදී වාර්තා කළ විශිෂ්ට ශතකය හේතුවෙන් ඔහු 6වන ස්ථානයේ සිට 3වන ස්ථානයට උසස් වී ඇත.කෙසේ නමුත්, පැතුම් නිස්සංක හැරෙන්න පළමු දස දෙනා අතර වෙනත් කිසිදු ශ්රී ලාංකික පිතිකරුවෙකු නොමැති බව ද සඳහන් වේ.
මේ අතර විස්සයි20 ලෝක කුසලාන ක්රිකට් තරගාවලිය අතරතුර දී ආබාධයකට ලක්වූ ශ්රී ලංකා වේගපන්දු යවන ක්රීඩක මතීෂ පතිරණ වෙනුවට නම්කළ ඩිල්ෂාන් මධුසංකට ICC තාක්ෂණික කමිටුවේ අනුමැතිය හිමිව තිබේ.වම් පාදයේ කලවා ප්රදේශයේ ඇති වූ ආබාධය හේතුවෙන් මතීෂට මෙවර ලෝක කුසලාන තරගාවලියෙන් ඉවත්වීමට සිදුවිය.ඔහු ඔස්ට්රේලියාවට එරෙහිව පසුගිය 16 වනදා පැවැති තරගයේදී ආබාධයකට ලක්විය.
