අත්අඩංගුවට ගත් පාර්ලිමේන්තු මන්ත්‍රී චාමර සම්පත් දසනායක අප්‍රේල් 01 වන දා දක්වා රක්ෂිත බන්ධනාගාරගත කර තිබේ.නඩු තුනක් සම්බන්ධයෙන් පසුගිය (මාර්තු 27) අධිකරණයට ඉදිරිපත් කළ පාර්ලිමේන්තු මන්ත්‍රීවරයා නඩු දෙකකින් ඇප හිමි වුවත් එක නඩුවකට අදාළව රක්ෂිත බන්ධනාගාරගත කර ඇත.
ඌව පළාත් සභාව බදුල්ල ජාතික ඉතිරි කිරීමේ බැංකුවේ පවත්වාගෙන ගිය ස්ථාවර තැන්පතු හයක් කල් පිරීමට පෙර ඉවත් කරගෙන රජයට රුපියල් ලක්ෂ 173ක පාඩුවක් සිදුකළ බව කියන සිද්ධිය සම්බන්ධයෙන් ඔහු මෙලෙස රක්ෂිත බන්ධනාගාරගත කර තිබේ.මෙම සිද්ධිය පොදු දේපළ පනතට ගැනෙන වරදක් බවට අනාවරණය වන බැවින් ඒ පිළිබඳව විමර්ශනයක් සිදු කිරීම සඳහා අපරාධ පරීක්ෂණ දෙපාර්තමේන්තුවට නියෝගයක් ලබා දෙන ලෙසට අල්ලස් හෝ දූෂණ විමර්ශන කොමිසම කළ ඉල්ලීමට ද අධිකරණයෙන් අවසර හිමි විය.
ඌව පළාත් සභාවේ හිටපු මන්ත්‍රී සමන්ත විද්‍යාරත්න මහතා 2016 වසරේදී අල්ලස් හෝ දූෂණ විමර්ශන කොමිසම වෙත කර තිබූ පැමිණිල්ලක් සලකා බැලීමෙන් අනතුරුව සැකකරු එසේ රක්ෂිත බන්ධනාගාරගත කෙරුණි.සිද්ධිය සම්බන්ධයෙන් ප්‍රකාශයක් ලබා ගැනීම සඳහා සැකකාර මන්ත්‍රීවරයා අල්ලස් හෝ දූෂණ විමර්ශන කොමිසම වෙත කැඳවීමෙන් අනතුරුව ඔහුව අත්අඩංගුවට ගෙන අධිකරණය වෙත ඉදිරිපත් කර තිබුණි.
සැකකාර මන්ත්‍රීවරයාට එරෙහිව අල්ලස් හෝ දූෂණ විමර්ශන කොමිෂන් සභාව මගින් බී වාර්තා තුනක් මගින් නඩු තුනක් අධිකරණය හමුවේ ගොනු කළේ ය.
එම පළාත් සභාවේ නමින් බදුල්ල මහජන බැංකුවේ, ලංකා බැංකුවේ, හා ජාතික ඉතිරි කිරීමේ බැංකුවේ ගිණුම් කිහිපයක් පවත්වාගෙන ගොස් ඇති බව ත් සැකකාර මන්ත්‍රීවරයා ඌව පළාත් සභාවේ ප්‍රධාන අමාත්‍යවරයා වශයෙන් කටයුතු කළ කාලවකවානුවේ එම ප්‍රදේශයේ පාසල් දරුවන්ට බෑග් ලබා දීමට බව පවසමින් ලංකා බැංකුවෙන් හා මහජන බැංකුවෙන් මුදල් ලබාගෙන ‘චාමර සම්පත් දසනායක පදනම’ යනුවෙන් ආරම්භ කළ ඔහුගේ ගිණුමකට එම මුදල් බැර කරගෙන ඇති බව ද පැමිණිල්ල මෙහෙයවූ එම විමර්ශන කොමිසමේ සහකාර අධ්‍යක්ෂක (නීති) සුලෝචනා මහත්මිය අධිකරණය හමුවේ පැවසුවා ය.
එම ප්‍රදේශයේ දරුවන්ට පාසල් බෑග් ලබා දීම සඳහා අනුග්‍රහය දක්වන ලෙස හිටපු ප්‍රධාන අමාත්‍යවරයා එම ජාතික ඉතිරි කිරීමේ බැංකුවෙන් ඉල්ලීමක් කර ඇති නමුත් එම බැංකුව ඔහුගේ ඉල්ලීම ප්‍රතික්ෂේප කර ඇති බවද සුලෝචනා මහත්මිය අධිකරණයට පෙන්වා දුන්නාය.
හිටපු ප්‍රධාන අමාත්‍යවරයාගේ ඉල්ලීමට අනුව ලංකා බැංකුව මගින් රුපියල් ලක්ෂ 10ක මුදලක් ද මහජන බැංකුව මගින් රුපියල් ලක්ෂ 25ක මුදලක් ද ඔහුට ලබා දී ඇති බවට විමර්ශනවලදී කරුණු අනාවරණය වූ බවද ඇය සඳහන් කළා ය.
සැකකාර පුද්ගලයාගේ ඉල්ලීමට ජාතික ඉතිරි කිරීමේ බැංකුවේ බලධාරීන් කැමැත්තක් නොදැක්වීම හේතුවෙන් උරණවී ඇති සැකකාර හිටපු ප්‍රධාන අමාත්‍යවරයා ඌව පළාත් සභාව මගින් එම බැංකුවේ පවත්වාගෙන ගිය ස්ථාවර තැන්පතු 6ක් ඉවත් කරගෙන ඇති බව ත් ඒ අනුව ඉන් රජයට රුපියල් ලක්ෂ 173ක පාඩුවක් සිදුකර ඇති බව ත් අධ්‍යක්ෂකවරිය අධිකරණයට දැනුම් දුන්නා ය.
සිද්ධිය සම්බන්ධයෙන් ලද පැමිණිල්ලට අනුව සිදුකළ විමර්ශනවලදී ලංකා බැංකුවෙන් හා මහජන බැංකුවෙන් ලබාගත් මුදල් සැකකාර පුද්ගලයා ඔහුගේ නමින් පවත්වාගෙන ගිය ‘චාමර සම්පත් දසනායක’ නමැති සිය පෞද්ගලික ගිණුමකට බැරකරගෙන ඇති බව ද අධ්‍යක්ෂකවරිය අධිකරණය හමුවේ පැවසුවා ය.
පළාත් සභාවේ මුදල්වලින් එම දරුවන් වෙනුවෙන් බෑග් ලබා දී ඇති බවට පවසා ඇති නමුත් එම ප්‍රාදේශීය සභාව සතු මුදල්වලින් එම බෑග් මිල දී ගෙන දරුවන්ට ලබා දී ඇති බවට කරුණු අනාවරණය වී ඇති බව ද සහකාර අධ්‍යක්ෂකවරිය අධිකරණය හමුවේ පැවසුවාය.
මෙම සැකකාර පුද්ගලයා එසේ වංචාසහගතව ලබාගෙන ඇති මුදල්වලට කුමක් කළේ ද යන්න පිළිබඳව මෙතෙක් හඳුනාගෙන නැති නමුත් තවදුරට ත් ඒ සම්බන්ධයෙන් විමර්ශනය කරමින් සිටින බව ද ඇය අධිකරණයට දැක්වූ කරුණුවලින් හෙළි විය.
මෙම සැකකාර පුද්ගලයාගේ දේශපාලන බල පුළුවන්කාරකම් හේතු කොටගෙන ඇතැම් සාක්ෂිකරුවන් විමර්ශනවලට සහාය ලබා දීමට මැලිකමක් දක්වන බව ද ඔහු ඇප මත මුදා හැරියහොත් එම විමර්ශනවලට බාධා සිදුවිය හැකි බැවින් ඔහු රක්ෂිත බන්ධනාගාරගත කරන ලෙසද සුලෝචනා මහත්මිය අධිකරණයෙන් ඉල්ලා සිටියා ය.
ජාතික ඉතිරි කිරීමේ බැංකුව සතුව තිබූ ඌව පළාත් සභාව පවත්වාගෙන ගිය ස්ථිර තැන්පතු හයක් ඉවත් කර ගැනීම පොදු දේපළ පනතට ගැනෙන වරදක් බැවින් ඒ සම්බන්ධයෙන් විමර්ශනය කිරීම සඳහා අපරාධ පරීක්ෂණ දෙපාර්තමේන්තුවට නියෝගයක් ලබා දෙන ලෙස ද අධ්‍යක්ෂකවරිය අධිකරණයෙන් ඉල්ලීමක් කළා ය.
ඌව පළාත් සභාව ලංකා බැංකුවේ හා මහජන බැංකුවේ පවත්වාගෙන ගිණුම්වලින් සිය පෞද්ගලික ගිණුමකට මුදල් බැර කර ගැනීම1920 හා 1994 අංක 20 (70) වගන්තියේ දූෂණ චෝදනාව යටතට ගැනෙන වරදක් බව ද අධ්‍යක්ෂකවරිය අධිකරණයට පෙන්වා දුන්නා ය.
යම් බැංකුවකින් ලැබෙන පරිත්‍යාග මුදල් තම තමන්ගේ බැංකු ගිණුම්වලට බැර කර ගැනීමට නීතියෙන් කිසිදු ඉඩක් නොමැති බව ද ඇය සදහන් කළා ය.
ලංකා බැංකුවෙන් හා මහජන බැංකුවෙන් ඔහු ලබාගෙන වංචා කර ඇති මුදල රුපියල් මිලියන 26 කට අධික බවට කරුණු අනාවරණය වන බව ද ඇය අධිකරණයට දැක්වූ කරුණුවලින් හෙළි විය.
එම බැංකු දෙක සැකකාර පුද්ගලයාට එම මුදල් ලබා දී ඇත්තේ, එම පළාත් සභාවේ නමින් එම බැංකුවල පවත්වාගෙන යන ගිණුම් සියල්ල ඉවත් කර ගනීවියැයි යන සැකය නිසා බව ද අධ්‍යක්ෂකවරිය සඳහන් කළා ය.
සැකකාර පුද්ගලයා වෙනුවෙන් ජනාධිපති නීතිඥ අනුජ පේමරත්න ඇතුළු නීතිඥවරු විශාල පිරිසක් පෙනී සිටි අතර ජනාධිපති නීතිඥවරයා කියා සිටියේ මෙය වසර නමයකට පෙර කළ පැමිණිල්ලක් බව ත් දේශපාලන අමනාපකම් මත මෙම පැමිණිල්ල කර ඇති නමුත් තම සේවාදායකයා මෙම වංචාවට සම්බන්ධ නොමැති බව ත් පැවසීය.
පැමිණිල්ල වෙනුවෙන් පෙනී සිටි අල්ලස් හෝ දූෂණ විමර්ශන කොමිසමේ සහකාර අධ්‍යක්ෂක (නීති) සුලෝචනා මහත්මිය හා සැකකරු වෙනුවෙන් පෙනී සිටි ජනාධිපති නීතිඥ අනුජ ප්‍රේමරත්න මහතා දැක්වූ කරුණු සලකා බැලූ මහේස්ත්‍රාත්වරිය සැකකරුට එරෙහිව පැවති පළමු නඩුවෙන් ඔහු රුපියල් ලක්ෂ 50 ක මුදල් ඇප හා රුපියල් ලක්ෂ 5 බැගින් වූ ශරීර ඇප දෙකක් මත මුදා හරින ලෙසත් දෙවන නඩුව සඳහා රුපියල් ලක්ෂ පනහක මුදල් ඇප හා මිලියන එක බැගින් වූ ශරීර ඇප තුනක් මත මුදා හරින ලෙසටද නියෝග කළා ය.
ඌව පළාත් සභාව බදුල්ල ජාතික ඉතිරි කිරීමේ බැංකුවේ පවත්වාගෙන ගිය ස්ථාවර තැන්පතු ගිණුම් හයක් කල් පිරීමට මත්තෙන් ඉවත් කරගෙන රජයට ලක්ෂ 173ක පාඩු කළ බව කියන සිද්ධිය සම්බන්ධයෙන් ඔහුව රක්ෂිත බන්ධනාගාරගත කරන ලෙසද මහේස්ත්‍රාත්වරිය එසේ නියෝග කළා ය.
