ගෑස්පා හංදියෙන් ඉහලට
මේස ඔරලෝසුවේ දෙකයි තිහ පෙනෙනවා
එලියෙ මේ ජාමෙටත් හිම වැස්ස වහිනවා
දවල් බුදියන බස්සො, රෑට නිදි මරනවා
එලි සමක් නැතිවුනත් බස්සො කවි ලියනවා
අපේ ගම් අඩවියේ හාදයෙක් හමුවුනා
ගල්කන්දෙ පාන් ගැන කවි රසක් මතුවුනා
වැඩි කතාවට ගියොත් පටිත් දිග ඇරෙන්නා
ආඳාගේ ක්‍රමවේදෙ පිහිට මට තියෙන්නා
මරදානෙ හංදියත් තාම ඔහෙ තියෙනවද
පරණ පොත් කඩ වලට වුන දෙයක් දන්නවද
පෙට්ටිකඩ වල තවත් බුරියානි ඉදෙනවද
චිකන් කරියේ තාම ඉඟුරු පෙති හැපෙනවද
ඔටුව, පිටෝටුව මට හීනෙනුත් පෙනෙනවා
සීනි සම්බල් පාන් රස දිවට දැනෙනවා
දුරින් ඉඳගෙන හිතින් එහි රසය විඳිනවා
හිතේ ඇති පිටෝටුව, නැති බවත් දන්නවා
හවුස් බස්තියන්
බකමුණු කතා බ්ලොග් අඩවියෙන්
https://frozenlazyowl.blogspot.com/
දයාබර වැම්පයර්තුමනි,
අපි ඔබතුමාට මෙසේ රපෝර්තු කරමු!
හය හතරක් නොදන්නා මෝඩ ගුණමකු රැළක් ගෝ ගෝ ගගා හිටියා එකතු වී මහ පාරේ
යකෝ! කාගේ හයියෙන්ද උන් ලැයිට් ගැහුවේ ඔබතුමාගේ ඔපිසියට
යකෝ! කාගේ හයියෙන්ද උන් ගැහුවේ කළු කොඩි ඔබතුමාගේ මන්දිරේ දොර උඩ
තිබ්බේ නෑ එක කොඩියක් ගලෝලා දැම්මා ඒ ඔක්කොම!
මුන් මේ තෙල් ඉල්ලා කන්න ඉල්ලා කෑගන හඩ නෑහෙන්න
දැම්මා පිරිත් කැසට් එකක් ගෙනත් පැය විසිහතරටම!
එක දිගටම පිරිත් ඇහුනම මෙත් මල් පිබිදෙයි නේ ලොකු නෝනගේ නේද
ජාතියේ අපුච්චා වෙච්චි ඔබතුමාට මුන්ගේ මේ ලතෝනි ඇහෙන්න නරකයි හරිම!
ඒ අස්සේ රඹුක්කන සැට් එකක් ඉල්ලුවා තෙල්!
අපි දුන්නා ගල්! ඒත් එක්කම වෙඩි! පුහුණුව තිබ්බනේ අපිට රතුපස්වලදී දුන්නු!
එකෙක් මැරුණාලු.. ඔබතුමාට නම් මදි ඇති..
ගැත්තාට සමා වෙලා ඒ බිල්ල පිළිගන්න - තවත් ඇහැකි විට දෙන්නං කැරකෙන්න
සිවුරුයි තම්බි තොප්පියි - කුරුසෙයි කෝවිලේ සාමියි
ඔක්කෝම බැහැලා හිටියා පාරට එකට
එරෙව්වා උන් ඔක්කෝටම
ඔබතුමා කියපු විදිහට
අන්තරේ වදකාර හැත්තම - ආවානේ ඔක්කොම පෙරළගෙන
චුට්ටක් හෙල්ලුනා තමයි තරහ අවසර
කෝ ඉතිං දෙන්නකෝ ඕඩරේ
දෙන්නෙක් තුන්දෙනෙක් ඇක්සිඩන්ට් කොරන්නට!
ඔබතුමා කියපු විදිහට වෑල්ඩින් කළා පාරවල් ඔක්කොම
වහලාම දැම්මා එකෙක්ට යනු එනු බැරි වෙන්න
කටුත් හයි කළා බැරියර් අස්සටම හංගලා
ආසයි ඔබතුමා අමු ලේ වලට
ප්‍රශ්නයක් තියෙනවා තුමනි අපිට තව
ඉන්නවා කළු කෝට් රැළක් රොත්තක් පිටින් වට වෙන
කුදලාන ගිහාම අර අවලමුන් කූඩුවට
මුන් ගන්නවානේ උන්ව එළියට - දෙන්නද උන්ටත් පොරි හැලෙන්නට
රටට කෙළ උනත් මොකද - ඔබතුමා ඉන්නකං අපිට තරු පටි දෙන්න
ගෙදර ගෑනිටත් කිව්වා බම්බු ගහගන්න
නොකා මලත් සැපයිනේ
ලෙවකාලා තුමනි ඔබේ සපත්තුව
~ මං ඔබේ කීකරු කුක්කා, පොලෝසිය
නාඩියා නාඩිරත්න
නාඩියාගේ නාඩි බ්ලොග් අඩවියෙන්
https://naadiyaonline.blogspot.com/
මිතුරු
වයිරම් බළල් මහතෙකි
වැට උඩ එබී හිනැහෙන
පුංචි කොලුවෙකි, මෙපිටින්
කවුළු දොර ළඟ නැවතුන
වරුවක් වචන නැතිවම
කතාබස් එහෙ මෙහෙ යන
"මෙහේ නවතින්න එන්නැයි
කිව්වා අම්මේ ඔහු හට..
සලකා බලන්නෝනැයි
රැව්වා වල්ගේ ගසමින!"
ඒ වැවයි
මේ ඒ වැවයි,
උදා හිරු රැස් තවරා
කොපුල් ලා රත් කරගත්
හවස වැස්සට හසු වී
හඬා නෙතු බොරකර ගත්
දුවන ඉගිලෙන සුළඟට
දිය රැළිති කළඹා ගත්
එක කුමුදකුදු නොලබා
සඳට පෙම උතුරා ගත්
මොහොතයි
මේ මැකෙන්නේ එකම සුසුමයි
හද ගැස්ම දෙකක් මැද පළලයි
තුරු හිසක තුරුළු වුන
සියොත් කැළ විසිරෙනා අසුරයි
මේ ගෙවෙන්නේ එකම ක්ෂණයයි
හුස්මකින් නම් අරික්කාලයි
ඇහිපියක අග රැඳී
කඳුලු බිඳුවක් බිඳෙන තරමයි
මේ මියෙන එකම තත්පරයයි
ඇසිල්ලක ගිලිහෙනා පැතුමයි
නටුව අතහැර මුදු ව
මලක පෙති විසිරෙනා මොහොතයි
හෙල්මලී ගුණතිලක - Hot Chocolate days
https://hotchocolatedays.blogspot.com
අහිමි කවිය....
අකුරු වැල් අතරේ
පද පේළි අස්සේ
ඇහින්දා මං ජීවිතය
සෙව්වා නුඹෙ ආදරය......
හොයන හොයන තරමට
මගෙ හිතත් රිදෙයි හරියට
නුඹට මං ලියපු
නුඹෙන් මං අහපු
කවි පේළි අතර
අතරමං උනා මම
මගෙ හිතත් නොදැනිම.......
සොයනවා සොයනවා මම
රිදෙනවා රිදෙනවා හිත
රිදෙන තරමට පිරෙනවා නෙත
කදුළු ගුලි ගැසී පිට පනිනවා.....
අනන්ත කවි අකුරු මැද
අතරමං වෙලා ආදරය
මමම විතරයි
මගෙ හිතත් විතරයි
නුඹත් නැති නිසා
වැරදිලා මේ ජිවිතය...
මහේෂ් රත්නායක
අවන්හල බ්ලොග් අඩවියෙන්
