කැනඩාවේ ජාතික තැපැල් සේවය වන ‘කැනඩා පෝස්ට්’ (Canada Post) ආයතනය සිය ඉතිහාසයේ දරුණුතම මූල්ය අර්බුදයකට මුහුණ දී සිටියද, එහි විධායක නිලධාරීන් සහ කළමනාකාරීත්වය සඳහා ඩොලර් මිලියන 30 කට අධික ප්රසාද දීමනා (Bonuses) ගෙවීමට ගත් තීරණය මේ වන විට එරට තුළ දැඩි ආන්දෝලනයක් ඇති කර තිබේ. 2025 වසරේදී වාර්තාගත මූල්ය පාඩු සහ රජයේ මූල්ය ආධාර ලබා ගැනීම මධ්යයේ වුවද, ආයතනයේ කාර්යසාධනය මත පදනම් වූ මෙම ප්රසාද දීමනා ගෙවීම මහජනතාවගේ සහ බදු ගෙවන්නන්ගේ සංගම්වල දැඩි විවේචනයට ලක්ව ඇත.
මූලාශ්රවලට අනුව, කැනඩා පෝස්ට් ආයතනය 2025 වසර සඳහා බදු ගෙවීමට පෙර ඩොලර් බිලියන 1.57 ක වාර්තාගත පාඩුවක් වාර්තා කර ඇත. මෙම දැවැන්ත පාඩුවට හේතුව ලෙස ආයතනය පෙන්වා දෙන්නේ සේවක ගැටලු හේතුවෙන් ඇති වූ අවිනිශ්චිතතාවයයි. මෙම මූල්ය අර්බුදයෙන් ගොඩ ඒම සඳහා සහ ලබන මාර්තු මාසය දක්වා මෙහෙයුම් කටයුතු පවත්වාගෙන යාම සඳහා ෆෙඩරල් රජය විසින් 2025 මැයි මාසයේදී ඩොලර් මිලියන 673 ක මුදලක් ආයතනයට ලබා දී ඇත.
මෙවැනි පසුබිමක වුවද, 2025 වසර සඳහා විධායක නිලධාරීන් සහ කළමනාකරුවන් වෙනුවෙන් ඩොලර් මිලියන 30.8 ක ප්රසාද දීමනා ගෙවා ඇති බව හෙළි වී තිබේ. තවද, මෙම අර්බුදය තවදුරටත් වර්ධනය වෙමින් 2026 වසරේ පළමු කාර්තුව තුළදී ද බදු ගෙවීමට පෙර ඩොලර් මිලියන 205 ක පාඩුවක් වාර්තා කර ඇති බව සඳහන් වේ.
කැනඩා පෝස්ට් ආයතනයේ ප්රකාශකයෙකු සඳහන් කළේ, APOC සහ PSAC යන වෘත්තීය සමිති නියෝජනය කරන සේවකයින් හැර, රට පුරා විවිධ මට්ටම්වල කළමනාකරණ සේවකයින් 2,377 ක් සේවය කරන බවයි. මෙයට විධායක මට්ටමේ නිලධාරීන් 417 දෙනෙකු ඇතුළත් වේ. මෙම පිරිස සඳහා වැය වන ප්රසාද දීමනා ප්රමාණය ආයතනයේ සමස්ත වාර්ෂික ශ්රම පිරිවැයෙන් සියයට එකකටත් වඩා අඩු ප්රමාණයක් බව ආයතනය පෙන්වා දෙයි.
ආයතනය මෙම තීරණය සාධාරණීකරණය කරමින් පවසන්නේ, ඔවුන් දැනට සිය ඉතිහාසයේ විශාලතම පරිවර්තනයකට ලක් වෙමින් සිටින බවයි. මෙම පරිවර්තන ක්රියාවලිය මෙහෙයවීම සඳහා දක්ෂ හා පළපුරුදු පුද්ගලයින් රඳවා තබා ගැනීම අත්යවශ්ය වන බැවින් මෙම දීමනා ලබා දීමට සිදු වූ බව ඔවුහු පවසති.
කැනඩා පෝස්ට් අධ්යක්ෂ මණ්ඩලය විසින් ‘අවදානම් සහිත කාර්යසාධන වැඩසටහන’ (at-risk performance program) යටතේ සේවකයින් 7,000 කට ආසන්න පිරිසකට ගෙවීම් අනුමත කර ඇත. මෙයින් තුනෙන් දෙකක පිරිසකගේ සාමූහික ගිවිසුම්වල මෙම ප්රසාද දීමනා පිළිබඳ කොන්දේසි වසර ගණනාවක සිට ඇතුළත් වී තිබේ. මෙම කණ්ඩායමට තැපැල් ලිපිකරුවන්, පෙරමුණේ අධීක්ෂකවරුන් සහ කළමනාකාරීත්වය ඇතුළුව පරිවර්තන ක්රියාවලියට අත්යවශ්ය සේවකයින් රැසක් ඇතුළත් වේ.
කෙසේ වෙතත්, ආයතනය පවතින මූල්ය තත්ත්වය හමුවේ මෙම තීරණය මහජනතාව අතර දුර්වල ප්රතිරූපයක් (bad optics) නිර්මාණය කරන බවත්, ඒ පිළිබඳව පවතින කනස්සල්ල තමන් තේරුම් ගන්නා බවත් ආයතනය පිළිගෙන ඇත.
කැනේඩියානු බදු ගෙවන්නන්ගේ සම්මේලනය (Canadian Taxpayers Federation) විසින් ජූලි 9 වන දින රජයේ මෙහෙයුම් සහ ඇස්තමේන්තු පිළිබඳ ස්ථාවර කමිටුව වෙත ඉදිරිපත් කරන ලද ලේඛන මගින් මෙම තොරතුරු හෙළිදරව් කර ඇත. ආයතනය අවධාරණය කරන්නේ මෙම ප්රසාද දීමනා ගෙවනු ලබන්නේ කැනඩා පෝස්ට් හිම ආදායමෙන් මිස රජයෙන් ලැබුණු ණය මුදල්වලින් නොවන බවයි.
ආයතනයේ ප්රධාන අරමුණ වන්නේ කැනේඩියානුවන් සඳහා තිරසාර සහ විශ්වාසදායක තැපැල් සේවාවක් නැවත ස්ථාපිත කිරීම සහ රජයෙන් ලබාගත් ණය හැකි ඉක්මනින් පියවීම බව ඔවුන්ගේ නිල ප්රකාශයේ වැඩිදුරටත් සඳහන් වේ. එසේ වුවද, දැවැන්ත පාඩු ලබන අතරතුර මිලියන ගණනින් ප්රසාද දීමනා බෙදා දීම සම්බන්ධයෙන් පවතින දේශපාලන සහ සමාජීය කතිකාවත ඉදිරි මාසවලදී තවදුරටත් උණුසුම් වනු ඇතැයි අපේක්ෂා කෙරේ.
