ඇමරිකා එක්සත් ජනපද ආරක්ෂක ලේකම් පීට් හෙග්සෙත් (Pete Hegseth) විසින් කැනේඩියානු කැඩෙට් නිලධාරීන් දෙදෙනෙකු ඉලක්ක කර ගනිමින් සමාජ මාධ්ය ඔස්සේ පළ කරන ලද සටහන, ඔහු දරන තනතුරේ “ගෞරවයට නොගැලපෙන” ක්රියාවක් බව කැනේඩියානු ආරක්ෂක අමාත්ය ඩේවිඩ් මැක්ගුයින්ටි (David McGuinty) ප්රකාශ කර තිබේ. කැනේඩියානු අග්රාමාත්ය මාර්ක් කාර්නි (Mark Carney) ද මෙම අදහස අනුමත කරමින් පවසා ඇත්තේ එම පණිවිඩය ඔවුන්ගේ තනතුරුවලට නිගරු කරන්නක් බවයි.
පසුගිය මාසයේ දෙරට අතර වෙළඳ සාකච්ඡා බිඳ වැටීමෙන් පසු කැනඩාව සහ ඇමරිකා එක්සත් ජනපදය අතර දේශපාලන ආතතීන් ඉහළ ගොස් ඇති පසුබිමක මෙම සිදුවීම වාර්තා වේ.
පසුගිය සඳුදා හෙග්සෙත් විසින් බ්රිටිෂ් කොලොම්බියාවේ (B.C.) වර්නන්හි පිහිටි කැඩෙට් පුහුණු මධ්යස්ථානයේ නිල ඇඳුමින් සැරසී සිටි තරුණ කැඩෙට්වරියන් දෙදෙනෙකුගේ ඡායාරූපයක් “මෙය සැබෑවකි” (this is real) යන ශීර්ෂ පාඨය සහිතව පළ කර තිබුණි. මෙමඟින් එම තරුණියන්ගේ පෙනුම සමච්චලයට ලක් කර ඇති බවට පුළුල් ලෙස චෝදනා එල්ල වී ඇති අතර, එය දැඩි දෝෂදර්ශනයට ලක්ව තිබේ.
මේ සම්බන්ධයෙන් අදහස් දැක්වූ බ්රිටිෂ් කොලොම්බියාවේ අග්රාමාත්ය ඩේවිඩ් ඊබි (David Eby) මෙම ප්රකාශය “ලැජ්ජා සහගත එකක්” ලෙස හැඳින්වීය. පරම්පරා ගණනාවක් තිස්සේ ඇමරිකාවේ මිත්රයෙකු වූ හමුදාවක ස්වේච්ඡාවෙන් සේවය කරන කැඩෙට් නිලධාරීන්ට මෙලෙස ප්රහාර එල්ල කිරීම ඇමරිකානු මිලිටරි නායකත්වයේ “ආධුනික ස්වභාවය” (amateur hour) පෙන්නුම් කරන බව ඔහු පැවසීය.
පෙන්ටගනයේ මාධ්ය ප්රකාශක ජේකොබ් බ්ලිස් (Jacob Bliss) ප්රකාශ කළේ එම සමාජ මාධ්ය සටහනෙන්ම එහි අදහස පැහැදිලි වන බවයි.
ආරක්ෂක අමාත්ය මැක්ගුයින්ටි පවසන්නේ ඇමරිකානු පරිපාලනයේ ඇතැම් සාමාජිකයින්ගේ “රංගනශීලී ස්වභාවය” (performative nature) නොතකා, දෙරට අතර මිලිටරි සහයෝගීතාවය අඛණ්ඩව සිදුවන බවයි.
කැනේඩියානු සන්නද්ධ බලකායන් සමච්චලයට ලක් කළ ට්රම්ප් පරිපාලනයේ තුන්වන කැබිනට් සාමාජිකයා හෙග්සෙත් වේ. මීට පෙර ප්රවාහන ලේකම් ෂෝන් ඩෆි (Sean Duffy) කැනඩාවට හමුදාවක් නොමැති බවට ඉඟි කර තිබූ අතර, භාණ්ඩාගාර ලේකම් ස්කොට් බෙස්න්ට් (Scott Bessent) කැනඩාව සහ ඇමරිකාව අතර යුද්ධයක් පැවතීමට ඇති ඉඩකඩ පිළිබඳව උපහාසාත්මකව අදහස් දක්වමින්, කැනඩාව ඔවුන්ගේ වෙස්ට් එඩ්මන්ටන් මෝල් (West Edmonton Mall) හි ඇති සබ්මැරීන දෙකෙන් තමන්ට පහර දෙනු ඇතැයි සිනාසෙමින් පවසා තිබුණි.
පවතින ආතතීන් හමුවේ කැනඩාව ඇමරිකාවේ නිෂ්පාදිත F-35 ප්රහාරක ගුවන් යානා මිලදී ගැනීම ප්රතික්ෂේප කරන්නේදැයි විමසූ විට, ආරක්ෂක අමාත්යවරයා පැවසුවේ එම ගිවිසුම දැනට “සමාලෝචනය වෙමින් පවතින” බවයි.
එසේම කැනඩාවේ නව “ආරක්ෂක කාර්මික උපායමාර්ගය” (Defence Industrial Strategy) මඟින් දක්වා ඇත්තේ කැනඩාව ඇමරිකාව සමඟ ආරක්ෂක සබඳතාවක් පවත්වන අතරම, අවිනිශ්චිත කාලවලදී වඩාත් ඔරොත්තු දීමේ හැකියාවක් තහවුරු කර ගැනීම සඳහා යුරෝපා සංගමය, එක්සත් රාජධානිය, ඕස්ට්රේලියාව, නවසීලන්තය, ජපානය සහ දකුණු කොරියාව වැනි රටවල් සමඟ නව සබඳතා ගොඩනඟා ගැනීමට බලාපොරොත්තු වන බවයි.
