
කැනඩාවේ ෆෙඩරල් අයවැය සහ එක්සත් ජනපදය සමඟ පවතින වෙළඳ සබඳතා සම්බන්ධයෙන් කැනේඩියානු මහජනතාව දැඩි උදාසීනත්වයකින් මෙන්ම සැකමුසු බලාපොරොත්තුවකින් පසුවන බව නවතම මහජන මත විමසුමකින් හෙළි වී තිබේ. ඉප්සොස් (Ipsos) සංවිධානය විසින් පවත්වන ලද මෙම විශේෂ මහජන මත විමසුමට අනුව, රජයේ අයවැය යෝජනා කෙරෙහි මෙන්ම ඩොනල්ඩ් ට්රම්ප් පාලනය යටතේ එක්සත් ජනපදය සමඟ ඇති කර ගන්නා වෙළඳ ගිවිසුම් පිළිබඳව ද ජනතාව පසුවන්නේ සෑහීමකට පත් නොවූ ස්ථාවරයකය.
මෑතකදී පැවැත්වූ එක්සත් ජනපද මැදවාර මැතිවරණයට වඩා කැනඩාවේ ෆෙඩරල් අයවැය රටට වඩාත් තීරණාත්මක සහ විශාල බලපෑමක් ඇති කරන බව කැනේඩියානුවන්ගෙන් වැඩි පිරිසක් විශ්වාස කරති. ඉප්සොස් සමීක්ෂණ දත්තවලට අනුව මහජන අදහස් බෙදී ගොස් ඇත්තේ මෙලෙස. සමීක්ෂණයට ලක් වූවන්ගෙන් සියයට 44 ක් (44%) ප්රකාශ කර ඇත්තේ එක්සත් ජනපද මැදවාර මැතිවරණයට වඩා කැනඩාවේ ෆෙඩරල් අයවැය රටේ අනාගතයට වඩාත් දැඩි ලෙස බලපාන බවයි.ඇමෙරිකානු මැදවාර මැතිවරණය රටට වඩාත් විශාල බලපෑමක් ඇති කරන බව විශ්වාස කරන්නේ සියයට 24 ක (24%) ප්රතිශතයක් පමණි.සමීක්ෂණයට ලක් වූවන්ගෙන් සියයට 33 ක් (33%) සඳහන් කර ඇත්තේ මේ පිළිබඳව නිශ්චිත මතයක් ප්රකාශ කිරීමට තරම් ප්රමාණවත් තොරතුරු තමන් සතුව නොමැති බවයි.
කෙසේ වෙතත්, මෙම අයවැයේ වැදගත්කම පිළිගත්තද, රජය විසින් ඉදිරිපත් කර ඇති යෝජනා සම්බන්ධයෙන් ජනතාව සෑහීමකට පත්ව නැත.
ෆෙඩරල් අයවැය රටේ අනාගතයට ඉතා වැදගත් සිදුවීමක් ලෙස සැලකුවද, සමස්තයක් ලෙස ජනතාව ඒ කෙරෙහි දක්වන්නේ උදාසීන ප්රතිචාරයකි. සමීක්ෂණ වාර්තාවට අනුව මහජන තක්සේරුවට අනුව සියයට 62 ක් (62%) කැනේඩියානුවන් අයවැය හොඳ හෝ නරක එකක් නොවන බවට මධ්යස්ථ ස්ථාවරයක සිටිති.අයවැය යහපත් එකක් ලෙස සලකන්නේ සියයට 17 ක (17%) සුළු පිරිසක් පමණි. සියයට 21 ක් (21%) අයවැය සම්බන්ධයෙන් සෘණාත්මක අදහස් පළ කර ඇත.
ඉප්සොස් කැනඩා (Ipsos Canada) ආයතනයේ සභාපති ඩැරල් බ්රිකර් (Darrell Bricker) මෙම තත්ත්වය පැහැදිලි කරමින් සඳහන් කළේ, මහජනතාව අයවැය දෙස බලන්නේ උරහිස් ගැස්සවීමකින් (shrug) නොහොත් උදාසීන හැඟීමකින් බවයි.
“මෙම අවස්ථාවේදී පෙනී යන්නේ ජනතාව මෙය සාමාන්ය හෝ විශේෂත්වයක් නැති දෙයක් ලෙස සලකන බවයි. මෙහි ඇති වන සැබෑ බලපෑම කුමක්දැයි මට තවමත් නොපෙනේ. සමහර විට ජනතාව ඉවසීමෙන් බලා සිටිනවා විය හැක. නමුත් දැනට පෙනෙන්නට තිබෙන්නේ මෙය මූලික වශයෙන් උදාසීන ප්රතිචාරයක් පමණක් බවයි.” – ඩැරල් බ්රිකර්, සභාපති, ඉප්සොස් කැනඩා
රටේ ආර්ථිකය කෙරෙහි අයවැයේ බලපෑම කෙසේ වෙතත්, තම පෞද්ගලික මූල්ය තත්ත්වය සහ පවුලේ ආර්ථිකයට අයවැයෙන් ලැබෙන සහනය පිළිබඳව ද කැනේඩියානුවන් තුළ ඇත්තේ දැඩි අවධානයකි. එහෙත් එම අංශයෙන් ද ජනතාව පසුවන්නේ අපේක්ෂා භංගත්වයෙනි.
අයවැය මගින් තම පෞද්ගලික මූල්ය තත්ත්වයට යහපතක් සිදුවනු ඇතැයි විශ්වාස කරන්නේ සියයට 14 ක් (14%) පමණි. අයවැය නිසා තමන්ට පෞද්ගලිකව පාඩුවක් හෝ හානියක් සිදුවනු ඇතැයි සියයට 21 ක් (21%) අපේක්ෂා කරති.සියයට 65 ක් (65%) ප්රකාශ කරන්නේ අයවැය නිසා තමන්ගේ පෞද්ගලික මූල්ය තත්ත්වයට යහපතක් හෝ අයහපතක් සිදු නොවනු ඇති බවයි.
ඩැරල් බ්රිකර් පෙන්වා දෙන්නේ, අයවැය මගින් තම දෛනික ජීවිතය අර්ථවත් ලෙස වෙනස් වන්නේ කෙසේද යන්න වටහා ගැනීමට කැනේඩියානුවන් තවමත් සමත්ව නැති බවයි. එම නිසා බොහෝ දෙනෙකුට මෙම අයවැය කිසිදු විශේෂත්වයක් නැති සාමාන්ය සිදුවීමක් (non-event) බවට පත්ව ඇත.
ෆෙඩරල් අයවැය කෙරෙහි මහජනතාව උදාසීන ප්රතිචාර දැක්වුවද, එක්සත් ජනපද මැදවාර මැතිවරණයේ ප්රතිඵල සමඟ දෙරට අතර වෙළඳ සබඳතා පිළිබඳ යම් බලාපොරොත්තුවක් ඇති වී තිබේ.කැනඩාවට වාසිදායක වන පරිදි සාර්ථක වෙළඳ ගිවිසුමකට එළඹීමට හැකිවනු ඇතැයි සියයට 49 ක් (49%) වඩාත් බලාපොරොත්තු සහගතව සිටිති.සියයට 53 ක් (53%) කැනේඩියානුවන් විශ්වාස කරන්නේ ඩොනල්ඩ් ට්රම්ප් (Donald Trump) ජනාධිපති ධුරයෙන් ඉවත් වන තෙක් කැනඩාව නව වෙළඳ ගිවිසුමකට එළඹීම ප්රමාද කළ යුතු බවයි.සියයට 55 ක් (55%) ප්රකාශ කරන්නේ ඇමෙරිකානුවන් කෙරෙහි පෙර පැවති විශ්වාසය නැවත කිසිදිනෙක ඇති කර ගත නොහැකි බවයි.
එක්සත් ජනපදයේ දේශපාලන වෙනස්කම් හමුවේ කැනේඩියානු මහජනතාව දැඩි ලෙස කළඹන බව ඩැරල් බ්රිකර් අවධාරණය කරයි.
“එක්සත් ජනපදයේ සිදුවූ සිදුවීම් හමුවේ කැනේඩියානුවන් දැඩි ලෙස කම්පනයට පත්ව සිටිති. එක්සත් ජනපදය යනු විශ්වාසදායක පංගුකාරයෙකු ලෙස නැවත පිළිගැනීමට කැනේඩියානුවන් ලෙහෙසියෙන් කටයුතු කරන්නේ නැත.” – ඩැරල් බ්රිකර්
ඩොනල්ඩ් ට්රම්ප්ගේ ස්ථාවර නැති සහ අනාවැකි කිව නොහැකි පාලන විලාසය කැනේඩියානුවන් තුළ දැඩි සැකයක් මතු කර ඇති බව බ්රිකර් වැඩිදුරටත් පැහැදිලි කළේය. ට්රම්ප් උදෑසන අවදි වන්නේ එක් අදහසක් සහිතව වන අතර රාත්රියේ නින්දට යන්නේ ඊට සම්පූර්ණයෙන්ම වෙනස් අදහසක් සහිතව බව ඔහු පෙන්වා දුන්නේය.
එක්සත් ජනපදය සමඟ පවතින රාජ්යතාන්ත්රික සහ ආර්ථික අභියෝග ජය ගැනීම සඳහා කැනේඩියානු නායකත්වයට ඇති හැකියාව පිළිබඳව ද මහජනතාව පසුවන්නේ දැඩි විචිකිච්ඡාවකිනි.
අගමැති මාක් කාර්නි මහතාට ට්රම්ප් සමඟ සාර්ථක වෙළඳ ගිවිසුමකට එළඹීමට හැකිවනු ඇතැයි විශ්වාස කරන්නේ සියයට 39 ක (39%) සුළු පිරිසක් පමණක් වන අතර, සියයට 64 ක්ම (64%) අපේක්ෂා කරන්නේ දෙරට අතර පවතින ආර්ථික සහ වෙළඳ අර්බුද ඉදිරි වසර කිහිපය පුරාම තවදුරටත් පවතිනු ඇති බවයි.සමස්තයක් ලෙස ගත් කල, කැනේඩියානු මහජනතාව රටේ අභ්යන්තර ආර්ථික ප්රතිපත්ති කෙරෙහි මෙන්ම විදේශීය වෙළඳ සබඳතා කෙරෙහි ද පසුවන්නේ දැඩි ප්රවේශම් සහගත මෙන්ම අවිශ්වාසනීය ස්ථාවරයකය. ෆෙඩරල් අයවැයෙන් ක්ෂණික සහනයක් නොලැබීමත්, ඇමෙරිකානු පාලනයේ අස්ථාවරත්වයත් හේතුවෙන් ඉදිරි වසර කිහිපය කැනඩාවට ආර්ථික වශයෙන් අභියෝගාත්මක කාලපරිච්ඡේදයක් වනු ඇති බව ඉප්සොස් සමීක්ෂණය පැහැදිලිව පෙන්නුම් කරයි.


