ආසයි විඳිනට…
සසදර ගගනේ ඔබ මොබ සරමින්
සුදිළෙන තරු හා ඉඟි බිඟි කරමින්
හිනැහෙන ඔබ දෙස දුර සිට බලමින්
සනසමි හදවත මම ඉකි බිඳිමින්
ආසයි විඳිනට ඒ සුව සහනේ
සීතල පිණි බිඳු තැවරූ යහනේ
රෑ කල විකසිත කඩුපුල් අරණේ
ඈ ලය තුරුලේ සිහිලැල් පවනේ
( ගජ ඡන්දසට අයත් පෙද විරිත ඇසුරෙන් )
දර්ශනි රූපසිංහ
Hamilton - Canada
කුඹුර මඩ වී
උඩ ඉන්නා අහස වැටී දෙකඳු නැමී
කඩ කෙරුවා වළා පෙළින් බැඳුණු බැමී
ඉඩ බලලා පිරිමැද දෙවැට සිප ගමී
මඩ වී තිබුණි කුඹුරක් දියරයෙන් තෙමී
කළේ තියන වේගෙට බිඳුණා ද කළේ
ජලේ තියන පියවර මැකුණා ද ජලේ
ගලේ පිපුණ මල්පෙති තිබුණා ද ගලේ
මලේ නුඹට මං ගැන සිතුණා ද මලේ
මී පැණි රසයි දුලභයි නෑ කලබලයක්
මී රස වගෙයි තිබහට නැති වතුර බිඳක්
මේ දෙක වගෙයි විවිධයි බැඳෙනා දෙහදක්
මී මේ මමයි ඔහු කලබල දිය දහරක්
කුසල හාමුදුරුවෝ
Brampton - Canada
දෙමෝදරත් දැන් උමතු වෙලා
සේල පටක් සේ රූ මවලා
දුන්හිඳ හිත ළග නතර වුනා
නමුණුකුලය නව වරක් පුදා
සීතල සුළගක් සිසිල ගෙනා
ඔඩිසියේ, කැලිප්සෝ මැදිරි පුරා
පිරිස් ගලනවා හිත් උතුරා
පාලම යට පොරකන අය අතරේ
දෙමෝදරත් දැන් උමතු වෙලා
රාවණ ඇල්ලට පෙම් බැඳලා
සීතා කෝවිලේ පොල් ගහලා
ග්‍රෙගරි වැවට අද හඳ පායනවලු
මුහුණු පොතේ රූසර මවලා
රුවන් හරිස්චන්ද්‍ර
Toronto - Canada
කෙටි කවි දෙකක්
Ford prefect - 1950 Model
පනස් ගණන් වලදි වගෙයිලංකාවට ගොඩ බෑවේ
තල්ලු පෝඩ් කියල තමයි හඳුනන්නේ ලංකාවේ
ගිරාහොටලු දඬුපෝඩ්ලු තව සමහරු නම් තැබුවේ
මම Driving ඉගෙනගත්තු පෝඩ් එකට පිං සිදුව
මොරිස් මයිනර් - Morris Minor
බස්සා මොඩල් එකෙන් පටන් ගත්තා මයිනර්
තව්සන් ඇංජිමට ගියා පසුවට මයිනර්
තවමත් ලංකාවෙ කොටස් හදනා මයිනර්
අසූදහක් ලෝකෙ පුරා දුවනව මයිනර්
සිසිල් මාන්නප්පෙරුම
Brampton Canada
හැමදාම
ඔබේ එකම එක පිංතූරයකි මා ළඟ
ඔබ තරම් පිපී නැති.
එහෙත් නොගැලපෙන ප්‍රතිමාවක් සේ
එය රකිමි. ඒ ඔබම වන හෙයින්.
වත්සුණු සුවඳ නොව
ඔබේ සුසුවඳ
දුරාතීතයෙන් පාව එයි
මතකයේ කවුළු දොර අගුලු ඉබේ ඇරෙමින්.
ඔබ කොහේ හෝ හිටියා නම් මෙදියත...
සඳත් ඉරත් පායනු ඇත එදෙසින්
ඔබටම හිමි වර්ණාවලි විහිදුවමින්
ඔබ සිටියා නම්
මේ පණ නල ජීවිතය යැයි හඟිමි.
මතක රූ ගලප්පමින්
පපු තුරෙහි නිදමි
ඔබ ලබා දී ඇති අවසරයෙන්
චන්ද්‍රරත්න බණ්ඩාර
Toronto - Canada
