මියන්මාරයට පසුගිය 28 වැනිදා බලපෑ ප්‍රබල භූ කම්පනයෙන් පසු තායිලන්තයේ බැංකොක් නුවරට හදිසි තත්ත්වයක් ප්‍රකාශයට පත්කෙරුණා. මියන්මාරයේ මැන්ඩලේ ප්‍රදේශය කේන්ද්‍ර කරගෙන රික්ටර් මාපකයේ ඒකක 7.7ක ප්‍රබල භූ කම්පනයක් ඇති විය.එහි ප්‍රබලත්වය තායිලන්තයේ බැංකොක් නුවරටත් දැනී ඇති බව එරට බලධාරීන් ප්‍රකාශ කලා.
භූ කම්පනයෙන් මියන්මාරයේ මෙන්ම බැංකොක් අගනුවරද ගොඩනැගිලි කිහිපයකට හානි සිදුවී ඇති අතර බැංකොක් නුවර ඉදිකරමින් පවතින මහල් ගොඩනැගිල්ලක් කඩාවැටුණා. මෙම මහල් ගොඩනැගිල්ල කඩා වැටීම හේතුවෙන් පුද්ගලයින් තිදෙනෙකු ජීවිතක්ෂයට පත්ව ඇති බවට එරට වාර්තා තහවුරු කර ඇති අතර මෙහි පුද්ගලයින් 70කට අධික පිරිසක් සිරවී සිටින බවද සඳහන් කර තිබේ.ඇමරිකානු භු විද්‍ය ඒඡන්සිය පවසන්නේ භූ කම්පනයේ ප්‍රබලතාව අනුව පුද්ගලයන් දසදහසක් පමණ මියයාහැකි බවයි.
මැන්ඩලේ යනු මියන්මාරයේ සංස්කෘතික සහ ආගමික අගනුවර වෙන අතර මිලියනයක පමණ ජනතාවක් එහි වාසය කරන බව වාර්තා වේ. බෞද්ධ ආරාම සහ රජවරුන් රැඳීසිටි මාලිගාවක් ද එහි පවතින බව සඳහන් වෙයි.
මෙම නගරය ප්‍රධාන සැපයුම් සහ ව්‍යාපාරික මධ්‍යස්ථානයක් ලෙසද ප්‍රසිද්ධියක් උසුලන අතර මියන්මාරයේ විශාලතම වෙළෙඳ හවුල්කරුවා වන චීනයේ දේශසීමාවට යන ප්‍රධාන වෙළෙඳ මාර්ගය ද එය අවසානයේ පිහිටා තිබේ.මේ අතර මැන්ඩලේ ගුවන්තොටුපොළේ මගී ජනතාව සහ කාර්යමණ්ඩලය සිද්ධිය වාර්ථා වීමත් සමග ඉන් ඉවත් කිරීමට පියවර ගෙන ඇත. එහෙත් තායිලන්තයේ ස්වර්ණ භූමි ජාත්‍යන්තර ගුවන්තොටුපළේ ගුවන් ගමන් කටයුතු සාමාන්‍ය පරිදි සිදුකරන බවද සඳහන් වේ.
මියන්මාර බලධාරීන් සඳහන් කළේ මැන්ඩලේ නගරයේ ඇතැම් මාර්ග ඉරිතලා ගොස් ඇති බවයි.භූ කම්පනයෙන් අනතුරුව බැංකොක් ජනතාව නිවාසවලින් ඉවතට පැමිණ ආරක්ෂිත ස්ථාන කරා ගමන් කල බවද විදෙස් වාර්තා පෙන්වා දෙයි.
මෙම භූ කම්පනයෙන් අනතුරුව රික්ටර් මාපකයේ 6.4ක තවත් භූ කම්පනයක් සිදුව ඇති අතර පසු කම්පන තත්ත්වයක් ද වාර්තා වූ බව විදෙස් වාර්තා සඳහන් කළේය.මීට අමතරව තවත් පුද්ගලයින් 50කට අධික පිරිසක් තුවාල ලබා රෝහල් ගත කර ඇති බවද විදෙස් වාර්තා සඳහන් කළේය.
මේ අතර අසල්වැසි මියන්මාරයට බලපෑ ප්‍රභල භූ කම්පනයෙන් පසු රට පුරා පාසල් වසා දැමීමට තායිලන්ත බලධාරීන් නියෝග කර තිබේ.බැංකොක් නුවර ගොඩනැගිලි කඩා වැටීම හේතුවෙන් මෙම තීරණය ගෙන ඇති අතර එරට නියෝජ්‍ය අගමැති පවසා ඇත්තේ මෙවැනි සිදුවීමක් වසර 100කින් හෝ සිදු වී නොමැති බවය.භූ කම්පනයෙන් පසු තායිලන්තයේ මහල් ගොඩනැගිලි ඉතා ප්‍රවේශමෙන් පරීක්ෂා කරන බව නියෝජ්‍ය අගමැතිවරයා පවසා තිබේ.
එරට මහජන සෞඛ්‍ය අමාත්‍යංශ සහ අධ්‍යාපන අමාතංශය සහන කටයුතු සම්බන්ධීකරණය කරන අතර ආරක්ෂක අමාත්‍යංශය විසින් අණ දෙන මධ්‍යස්ථානයක්ද පිහිටා ඇති බව සඳහන් වේ.
මේ අතර භූ කම්පනය හේතුවෙන් මැන්ඩලේ රාජකීය මාලිගයේ කොටස්වලටද හානි සිදුවී ඇති බව මාධ්‍ය වාර්තා සඳහන් කළේය.
උතුරු මැන්ඩලේ හී පිහිටි මෙම මාලිගාව 1857 හා 1859 අතර කාලය තුළ මින්ඩෝන් රජු විසින් පිහිටුවා ඇති බව වාර්තාවේ.
2021ට පෙර මෙම ස්ථානය ජනප්‍රිය සංචාරක ආකර්ශනය සහිත ස්ථානවලින් එකක්ද විය.
