ඉරාන න්‍යෂ්ටික මධ්‍යස්ථානවලට ඊශ්‍රායලය එල්ල කළ ප්‍රහාරවලින් පසු කැනඩාවේ පැවති G7 කණ්ඩායමේ නායකයින් ඒකාබද්ධ ප්‍රකාශයක් නිකුත් කරමින් සඳහන් කර ඇත්තේ, "ඉරානයට කිසි විටෙකත් න්‍යෂ්ටික අවියක් තිබිය නොහැකි" බවයි.
ඒකාබද්ධ ප්‍රකාශයේ දී, G7 කණ්ඩායම ඉරානයේ න්‍යෂ්ටික අභිලාෂයන් පිළිබඳ සිය ස්ථාවරය නැවත තහවුරු කළ අතර ඊශ්‍රායලයේ ස්වයං-ආරක්ෂාව සඳහා ඇති අයිතියට සහාය පළ කර තිබෙන බවයි ප්‍රකාශ කර ඇත්තේ.
ඉරානයේ න්‍යෂ්ටික මධ්‍යස්ථානවලට පහර දීම සඳහා ඊශ්‍රායලය සිය ඔපරේෂන් රයිසින් ලයන් මෙහෙයුම සිදු කිරීමෙන් දින කිහිපයකට පසුවයි මෙම ප්‍රකාශය නිකුත් කෙරුණේ.
"ඊශ්‍රායලයට තමන්ව ආරක්ෂා කර ගැනීමට අයිතියක් ඇති බව අපි තහවුරු කරමු. ඉරානයට කිසි විටෙකත් න්‍යෂ්ටික අවියක් තිබිය නොහැකි බව අපි නිරන්තරයෙන් පැහැදිලි කර ඇත්තෙමු." යනුවෙන් එම ප්‍රකාශයේ සඳහන්.
ඉරාන අර්බුදය විසඳීම කලාපය සන්සුන් කිරීමේ පුළුල් උත්සාහයක කොටසක් විය යුතු බවයි නායකයින් සඳහන් කර ඇත්තේ.
"ඉරාන අර්බුදය විසඳීම ගාසා තීරයේ සටන් විරාමයක් ඇතුළුව මැද පෙරදිග සතුරුකම් පුළුල් ලෙස අඩු කිරීමට හේතු වන බව අපි ඉල්ලා සිටිමු" යනුවෙන් එම ප්‍රකාශයේ තවදුරටත් සඳහන්.
ඊශ්‍රායලය සහ ඉරානය අතර උත්සන්න වන ගැටුම් හේතුවෙන් සමුළුවට සැලකිය යුතු ලෙස බාධා ඇති වූ අතර, ඊශ්‍රායලය දින හතරකට පෙර ඉරාන හමුදා සහ න්‍යෂ්ටික ඉලක්ක වෙත බෝම්බ හෙලීම ආරම්භ කළ දා සිට එය ප්‍රධාන තැනක් ගෙන තිබෙනවා. මෙම වර්ධනයන් මධ්‍යයේ, එක්සත් ජනපද ජනාධිපති ඩොනල්ඩ් ට්‍රම්ප් සඳුදා හදිසියේම සමුළුව අතර තුර කැනඩාවෙන් පිටව ගොස් තිබුණා.
