පුවතක් - එයා ඉන්ඩියා යානය ගුවන් ගතවී තත්පර 30 කින් විනාශයි.
තත්පර තිහක් කොයි තරමක් දිග වෙයිද
යානයෙ හිටි අයගෙ පැතුමන් කොහි ගියෙද
දෙසිය ගණනකගෙ සිතුවිලි නතර විද
කාගේ වුණත් ජීවිත මෙච්චර කෙටිද
සමහරු ගියේ නව ජීවිත ගමන් වෙත
තව අය ගියේ පොදි බැදගෙන රස මතක
මිහිකත අතැර නගිනා කළ ගුවන වෙත
කිසිවෙක් සිතුවේද වේයැයි මේ විපත
එක් රැස් කලත් හැම දේ වැඩි වැඩි බරට
ගෙනයනවාද එක මල්ලක් වත් මිටට
සිතුවිලි වලට වැඩි වේගෙන් යන මරුට
වාගෙයි දිවිය තණ අග රැදි පිණි ලෙසට
රුවන් හරිස්චන්ද්‍ර
පැතුම
අහිමි සෙනෙහස සවන් පත් මත කොඳුරනා තිස් තුන් පැයේ
නිදන සිතිවිලි අතර සහසක් අවදි වූ පැතුමන් තියේ
දකින සිහිනද මනස කළඹයි ශෝක ගී දසතින් වැයේ
ඉපිද මියැදෙන සුසුම් දහරින් සතපවමි හැඟුමන් ළයේ
සුමුදු පියකරු තඹරු සහසක් හිනැහුනා නිල් දිය පුරා
පසෙක රතැඟිලි පටල පෝරුව මත සිටියෙ කුසුමිය දරා
කෙලෙස හදවත වාවගමි උණු කඳුළු පිබිඳුනි නෙතු ඉරා
ඉපිද මතුභව එනු මැනවි සෙනෙහසිනි මාගේ ලොව කරා
දර්ශනී රූපසිංහ
මිල්ලන්ගොඩ වංශවතා
නන්දන වනයෙන් ආය සකී
දෙව් පුර වැදුමට පින් කෙතකී
කුඹු සොලවන විට තෙද ඉසිරී
දිගු දළ යුගලම මහිමයකී
වැවි පොකුණු මතින් පා එසවී
කන්දට ලන්දට අධිපතිවී
මාළිග දොරටුව වැඳ වැටෙතී
දළදා හිමි පිට මතට වඞී
පසතුරු නද මැද පා තබතී
සිව් ර`ග සේනා රැුක සිටිතී
ඇතින්නියන් කෝමල පාතී
සැබෑ පිරිමියෙක් යයි කියතී
කවිකළ හැකි විසිතුරු බෝමයි
ගජගා ගජ විසිතුරු බෝමයි
නැණ නුවණින් යුත්
ශීර්ෂ මණ්ඩලේ
ලෙන්ගතුකම් ඇති
හෘද මන්දිරේ
ගිජිඳු ගුණෙන් යුත්
මහ ගිජිදාණෙනි
අප හැරදා ඇයි
ආපසු වැඩියේ
චන්ද්‍රරත්න බණ්ඩාර
ආදරිය
ඔමරි හිනාවට ආලෙ බඳිනවා
ලස්සන නුඹ ලඟ හිත නවතිනවා
ඉඟි බිඟි බැල්මට මසිත සැලෙනවා
සිහිනෙන් මම නුඹෙ දෙතොල් සිඹිනවා
හැරී බලනවා කැකිරි පලනවා
රවා බලනවා නොපෙනි යනවා
නුඹෙ හැඩරුව දැක සිහිසුන් වෙනවා
නුඹ මා රවටනවාද සිතෙනවා
සිදාදියෙන් සිටු කුමරෙක් එනවා
උඡාරුවට නුඹ කැන්දන් යනවා
තනියම බැඳි පෙමෙ දුක උහුලනවා
නුඹ රුව හදවතේ ඇඳි තියෙනවා
ජගත් රූපසිංහ
