නැඟෙනහිර රුසියාවේ කම්චට්කා අර්ධද්වීපය ආසන්නයේ උතුරු පැසිෆික් මුහුදු තීරයේ පසුගිය 30 වැනිදා උදෑසන සිදුවූ රිච්ටර් මාපකයේ 8.8ක අගයක් සටහන් කළ දැවැන්ත භූ කම්පනය හේතුවෙන් රුසියාව, ජපානය හා අමෙරිකාවට සුනාමි තත්ත්වයක් හටගත් බව විදෙස් මාධ්‍ය වාර්තා කරයි.
ලෝක ඉතිහාසයේ මෙතෙක් වාර්තා වූ 6 වැනි ප්‍රබලතම භූ කම්පනය ලෙස වාර්තා වූ කම්චට්කා භූ කම්පනයේ ප්‍රබලත්වය හේතුවෙන් විශාල සුනාමි තත්ත්වයක් අපේක්ෂා කළද, දැඩි අවදානම් තත්ත්වයක් මතුවූ බොහෝ රටවල වෙරළ තීරයේ නගරවලට පස්වරුව වනවිට සුළු හානි පමණක් සිදුවූ බව වාර්ථා විය. කෙසේ වෙතත් සුනාමි තත්ත්වය පැය 24කට ආසන්න කාලයක් පැවතිය හැකි බවට භූ විද්‍යාඥයන් අනාවැකි පළ කිරීම හේතුවෙන් අමෙරිකාව, ජපානය සහ කම්චට්කා කලාපයේ සුනාමි අනතුරු ඇඟවීම් ඉවත් කර නොතිබූ බව ද වාර්තා වේ. 2011 වසරේ ජපානයේ සිදුවූ රිච්ටර් මාපකයේ 9.0ක භූ කම්පනයෙන් පසු ලොව වාර්තා වූ ප්‍රබලතම භූකම්පනය මෙය වන අතර, ඊට පැය කිහිපයකට පසු කම්චට්කා කලාපයේ වෙරළ තීරයට අඩි 13ක උසින් යුතු පළමු සුනාමි රැල්ල කඩා වැදීමත් සමඟ එම කලාපයට හදිසි තත්ත්වයක් ප්‍රකාශයට පත් කිරිමට බලධාරීන් පියවර ගෙන තිබේ. ඒ වනවිටත් වෙරළ තීරය ආසන්නයේ පිහිටි නගරවලින් ජනතාව ඉවත් කිරීමට කටයුතු කළ බැවින් ජීවිත හානි වළක්වා ගැනීමට හැකි වූ බවත්, නගරය මුහුදු ජලයෙන් යටවීමත් සමඟ වරායට සහ යාත්‍රා කිහිපයකට හානි සිදුවූ බවත් එම කලාපයේ ආණ්ඩුකාර ව්ලැදිමිර් සොලොඩොව් ප්‍රකාශ කර තිබේ.
මේ අතර සුනාමි අනතුරු ඇඟවීමේ නිවේදන නිකුත් කිරීමත් සමඟ ජපානයේ හොකයිඩෝ සිට කියුෂු දක්වා මුහුදු තීරයේ නගරවලින් ලක්ෂ 19කට අධික ජනතාව ඉවත් කිරීමට ජපාන බලධාරීන් පියවර ගත් අතර, ෆුකොෂීමා න්‍යෂ්ටික බලාගාරයේ සියලු සේවකයන් ඉවත් කිරීමට ද කටයුතු කළ බව වාර්තා වේ. ජීවිත විසිදහසකට ආසන්න සංඛ්‍යාවක් බිලිගත් 2011 සුනාමියෙන් එම න්‍යෂ්ටික බලාගාරය විනාශ වූ බවද විදෙස් මාධ්‍ය සඳහන් කරයි. භූ කම්පනයෙන් පැය කිහිපයකට පසු හොකයිඩෝ වෙරළබඩ කලාපයට මිටර් 3ක පමණ උසකින් යුතු සුනාමියක් කඩා වදිනු ඇතැයි අපේක්ෂා කළද, ඉතා සුළු සුනාමි තත්ත්වයක් පමණක් හටගත් බව වාර්තා වේ. සුනාමි තත්ත්වයත් සමඟ ජපානයේ චිබා නුවර වෙරළ තීරයට යෝධ තල්මසුන් සිවුදෙනකු ගොඩ ගැසීමේ අසාමාන්‍ය සිදුවීමක් ද එරට මාධ්‍ය වාර්තා කරයි.
භූ කම්පනයෙන් පසු අමෙරිකාවේ හවායි දූපත් සමූහයට අධි අවදානම් සුනාමි තත්ත්වයක් නිවේදනය කිරීමත් සමඟ එම සංචාරක පුරවරය දැඩි නොසන්සුන්තාවට පත්වූ බවත්, සංචාරකයන් සිය ගණනක් වෙරළබඩ තීරයෙන් ඉවත්වීමට උත්සාහ කිරීමත් සමඟ දැඩි වාහන තදබදයක් ද ඇති වූ බව වාර්තා වේ. හවායි දූපත් අවට මුහුදු තීරයේ යාත්‍රා කරන සියලුම යාත්‍රා හා බෝට්ටු වරාය වෙත යාත්‍රා කරන ලෙස අමෙරිකාවේ වෙරළාරක්ෂක බළකාය නියෝග කළ බව ද වාර්තා වේ. සුනාමි රැල්ලට පෙර සියලු ආරක්ෂක පියවර ගැනීමට හවායි බලධාරීන් සමත් වූ බවත්, පැය කිහිපයකට පසු වෙරළ තීරයට අඩි 4ක උසින් යුතු පළමු සුනාමි රැල්ල කඩා වැදුණු බවත් වාර්තා වේ.
චීනය, පිලිපීනය, ඉන්දුනීසියාව, පේරු, ඉක්වදෝර්, මෙක්සිකෝ සහ නවසීලන්තය ඇතුළු තවත් රටවල් කිහිපයක් ද සුනාමි අනතුරු ඇඟවිම් නිකුත් කළ බව විදෙස් මාධ්‍ය සඳහන් කරයි. කෙසේ වෙතත් එදිනපස්වරුව වනවිටත් සුනාමි තත්ත්වය හේතුවෙන් සිදුවූ කිසිදු ජීවිත හානියක් වාර්තා නොවූ අතර, පස්වරුවේදී සුනාමි අනතුරු ඇඟවිම් ඉවත් කිරිමට බොහෝ රටවල් පියවර ගත් බව වාර්ථා විය.
