අමෙරිකාව සමඟ යුද උණුසුම තුරන් කිරීම සඳහා දෙපාර්ශ්වය අතර සාකච්ඡාවකට එකඟ වන්නේ තර්ජනයෙන් හා පීඩනයෙන් තොර සුදුසු වාතාවරණයක් යටතේ පමණක් බවත්, එවැනි සාකච්ඡාවක් සඳහා අවශ්ය පසුබිම සොයා බැලීමට විදේශ අමාත්යාශයට උපදෙස් දුන් බවත් ඉරාන ජනාධිපති මසූඩ් පෙසෙෂ්කියන් ප්රකාශ කර තිබේ. අමෙරිකානු ජනාධිපති ඩොනල්ඩ් ට්රම්ප්ගේ ඉල්ලීම පරිදි දෙපාර්ශ්වය අතර තුර්කියේ ඉස්තාන්බුල් අගනුවරදී න්යෂ්ටික වැඩසටහන පිළිබඳ සාකච්ඡාවකට ඉරානය එක්වීමට පෙර අධ්යයනය කළ යුතු කරුණු රැසක් ඇතැයි ද ජනාධිපති පෙසෙෂ්කියන් සඳහන් කළ බව විදෙස් මාධ්ය වාර්තා කරයි. එක්ස් සමාජ මාධ්ය ජාලයේ සටහනක් තබමින් ඉරාන ජනාධිපතිවරයා මේ ප්රකාශය සිදු කර ඇත්තේ අමෙරිකාව සහ ඉරානය අතර න්යෂ්ටික වැඩසටහන සම්බන්ධයෙන් 6 වැනිදා ඉස්තාන්බුල් අගනුවරදී සාකච්ඡා පැවැත්වෙන බවට ජාත්යන්තර මාධ්යයේ පළවන පුවත් සැලකිල්ලට ගනිමින් බවද වාර්තා වේ. අමෙරිකාවේ මැදපෙරදිග විශේෂ නියෝජිත ස්ටීව් විට්කොෆ් සහ ඉරානයේ විදේශ ඇමැති අබ්බාස් අරග්චි අතර එම සාකච්ඡාව පැවත්වෙන දිනය පිළිබඳ අමෙරිකාව හෝ ඉරානය මෙතෙක් තහවුරු කර නැති බව ද වාර්තා වේ.
මැදපෙරදිග කලාපයේ මිත්රශීලී රටවල් වන කටාර්, තුර්කිය, ඊජිප්තුව සහ ඕමානයේ ඉල්ලීම්වලට අනුව අමෙරිකාව සමඟ සාකච්ඡා කිරීමට අවධානය යොමු කළ බවත්, ඒ සඳහා පවතින වටපිටාව අධ්යයනය කළ යුතු බවත් ජනාධිපති පෙසෙෂ්කියන් සඳහන් කර ඇති අතර, ඕනෑම සාකච්ඡාවක් ඉරානයේ ජාතික අවශ්යතාවට අනුකූලව සිදුවිය යුතු බව ද ප්රකාශ කර තිබේ.
මේ අතර වාර්තාකරුවන් ඇමතූ ඩොනල්ඩ් ට්රම්ප් ප්රකාශ කර ඇත්තේ ඉරාන නියෝජිතයන් ගිවිසුමකට එකඟ නොවන්නේ නම් තත්ත්වය නරක අතට හැරෙනු ඇති බවය. ඉරානය ආසන්න මුහුදු සීමාවට අමෙරිකාවෙන් තවත් යුද නැවක් යාත්රා කරමින් තිබෙන බව ද ඔහු සඳහන් කර තිබේ. දෙපාර්ශ්වය අතර එකඟතාවක් සිදුනොවන්නේ නම් හමුදාමය ක්රියාමාර්ග ගැනීමට සිදුවන බවටත්, එය වෙනිසියුලාවේ හමුදා මෙහෙයුමට වඩා බරපතළ වනු ඇති බවටත් අමෙරිකානු ජනාධිපතිවරයා අනතුරු අඟවා තිබේ. ඉරාන ජනාධීපතිවරයා ප්රකාශ කර ඇත්තේ තර්ජන, ගර්ජනවලින් ඉරානය සාකච්ඡා මේසයට කැඳවිය නොහැකි බවය.
