නුඹ කොහිද අද  

හිරු දිලෙයි නිල් අහසේ 

නමුදු එය කළුවරකි 

වසන්තය එබෙයි දොරින් දොර 

නමුදු එය සිසිරයකි 

සොඳුරු සිතුවමක් මැවේ හද තුල 

මිහිරියාවක් දැනේ වසනට 

දුරයි නුඹ ඉන්නා තැන 

නෑසෙන නොදකින තරමට 

වැළපෙයි හදවතක් නුඹ නොමැතිව 

කවියකට දිරිය දුන් 

පදවැලට ශක්තිය දුන් 

සොඳුරු කවියාණෙනි 

නොදනිමි නුඹ කොහිද අද 

කුමුදු රත්නවීර 

ටොරොන්ටෝ නගරය 

තනි තරුවේ 

තනි තරුවේ …. පෝදා මල් සුපිපුණු

සඳුට හොරෙන් හිඳ තනි රකිනා  

නිල් දිය අහසේ …. සඳ කන් වතුරේ

තාලයකට රැඟුමන් රඟනා

අඳුර නසා රෑ කල නිල් අහසේ

ලොවක් එළිය කරනා

සඳු අද්දර හිඳ නෙතඟින් බලනා

රුවට සඳුත් රැදුනා

මුවගේ රැඳෙනා සිනා කැළුම් කැල

රුවට රුවේ දිලෙනා

නොකී රහස් බස් නෙතඟින් දෙඩුවා

හදට සිසිල කැන්දා

රුවන් හරිස්චන්ද්‍ර 

Toronto – Canada

රණවිරු මල 

උපන් වීම රණ බිමකි එහි මැරුණෙ රණවිරු     මලකි

ලොවෙන් ගිලිහුණු පණකි නමුත් නොමැරුණු කෙනෙකි

විහින් නොමැරුණු සෙයකි  ඔවුන් මැරුවේ       පණකි

කඩින් කඩ වෙඩි රැළකි බුදුන් ළඟ තව           මලකි

බුදුන් නැති රුදු ලොවකි එහි සොඳින් කළ   පිළිරුවකි

මලින් පිදු පුදසුනකි ඒ මැදින් රණවිරු             රුවකි

අදින් පසු මට නොහැකි වදන් ගොළු වූ           මුවකි

ඔබෙන් ලද්දේ පණකි මට බුදුන් වූ                සෙයකි

කුසල හාමුදුරුවෝ 

Brampton – Canada

මගේ රන් කඳ

නන්දා මගේ රන් කඳ පෙම හද            රන්දා

වින්දා සියලු දුක් ගැරහුම් නව             නින්දා

අන්දා කසී සළු කර මාල ද                බන්දා

කැන්දා යන නැකත කවදා දැයි           මන්දා

බැන්දේ සෙනෙහෙ දුටු සඳ දොළ ළඟ  ලන්දේ

නැන්දේ ඇයිද නෑනගෙ පෙම් සිත        බින්දේ

වින්දේ සිහින දකිමින් තුන්යම            නින්දේ

වැන්දේ බුදුන් පේවී වැඩ සිටි             කන්දේ

දර්ශනි රූපසිංහ 

Hamilton – Canada