කැනඩාවේ නාවික හමුදාව සවිබල ගැන්වීම සඳහා නව සබ්මැරීන් 12 ක් මිලදී ගැනීමට සැලසුම් කර ඇති අතර, මේ සඳහා වන ලෝක මට්ටමේ තරඟය මේ වන විට දැඩි වී තිබේ. ලොව දිගුම වෙරළ තීරයට (කිලෝමීටර් 244,000) හිමිකම් කියන කැනඩාවට සාගර තුනක් ආරක්ෂා කිරීම සඳහා මෙම නවීන සබ්මැරීන් බලඇණිය අත්යවශ්ය බව මැරිටයිම් ෆෝසස් පැසිෆික් අණදෙන නිලධාරී රියර් ඇඩ්මිරල් ඩේවිඩ් පැචෙල් පවසයි. ඔහු පෙන්වා දෙන්නේ කැනඩාව සැබෑ “සබ්මැරීන් ජාතියක්” (Submarine Nation) බවට පත්වීමට මෙය මග පාදන බවයි.
මෙම දැවැන්ත කොන්ත්රාත්තුව දිනා ගැනීම සඳහා දකුණු කොරියාවේ Hanwha Ocean සමාගම සහ ජර්මනියේ ThyssenKrupp Marine Systems (TKMS) සමාගම දැනටමත් සිය ලංසු ඉදිරිපත් කර ඇත.
දකුණු කොරියාව සිය ශක්තිය ප්රදර්ශනය කිරීම සඳහා KSS-III වර්ගයේ සබ්මැරීනයක් බ්රිතාන්ය කොලොම්බියාවේ වික්ටෝරියා වරාය වෙත පසුගියදා රැගෙන ආවේය. දකුණු කොරියාව පවසන්නේ තමන් තේරී පත් වුවහොත් කිසිදු වෙනස් කිරීමකින් තොරව 2032 වන විට පළමු සබ්මැරීන හතර ලබා දිය හැකි බවයි. එසේම කැනඩාවේ දේශීය මෝටර් රථ ක්ෂේත්රය සමඟ එක්ව රොකට් දියත් කිරීමේ පද්ධති සහ හමුදා වාහන නිෂ්පාදනය කිරීමටද ඔවුන් පොරොන්දු වී ඇත.
අනෙක් අතට, ජර්මනියේ TKMS සමාගමේ ලංසුව සඳහා ජර්මානු සහ නෝර්වේ රජයන්හි පූර්ණ සහයෝගය හිමිව තිබේ. ඔවුන් මෙය හුදෙක් ගනුදෙනුවකට වඩා ‘නේටෝ’ (NATO) මිත්ර පාර්ශවයන් අතර ඇති වන ශක්තිමත් සහයෝගීතාවයක් ලෙස හඳුන්වා දෙයි. TKMS සමාගම දැනටමත් කැනඩාවේ Bombardier සහ Lockheed Martin වැනි දේශීය සමාගම් සමඟ හවුල්කාරිත්වයන් ඇති කරගෙන තිබේ.
කැනඩා රජය මෙම ලංසු පිළිබඳව අවසන් තීරණය ජූනි මාසයේදී ප්රකාශයට පත් කිරීමට නියමිත අතර, තේරී පත්වන සමාගම 2032 වසරේ සිට සබ්මැරීන් සැපයීම ආරම්භ කළ යුතුය. රියර් ඇඩ්මිරල් පැචෙල් පවසන පරිදි, කැනඩාවේ ආරක්ෂාව සඳහා මෙම සබ්මැරීන “ඊයේ වන විටත්” අවශ්යව තිබූ අත්යවශ්ය මෙවලමකි.
