ශ්රී ලංකාවේ උසස් අධ්යාපන ඉතිහාසයේ ඇතැම් නාමයන් සදාකාලිකවම රන් අකුරින් ලියැවෙන්නේ, ඔවුන්ගේ කැප වීම, බුද්ධි මහිමය සහ අසමසම දක්ෂතා නිසාය. නිදහස් අධ්යාපනයේ සැබෑ අරුත ලොවටම කියාපාමින් කොළඹ වෛද්ය පීඨයෙන් බිහි වූ ඇයද සුවිශේෂ තාරකාවකි. මේ වන විට මුළු ශ්රී ලංකාවම ඇය ගැන කතාබහ කරති. ඇය නමින් වෛද්ය හෂිනි රංගිකා ඈපා ආරච්චිය. මෑතකදී පැවති කොළඹ විශ්වවිද්යාලීය උපාධි ප්රදානෝත්සවයේදී ඇය විසින් බිඳහෙළන ලද වාර්තාව මෙරට විශ්වවිද්යාල ඉතිහාසයේ සුවිශේෂ සන්ධිස්ථානයකි.
MBBS පාඨමාලාව වෙනුවෙන් පිරිනමන ලද සමස්ත රන් පදක්කම් සංඛ්යාව වූ 32න් අඩක්, එනම් රන් පදක්කම් 16ක්ම තනිවම තමන් සතු කර ගැනීමට ඇය සමත් වූවාය. මේ අසමසම දස්කමට අමතරව, අධ්යයන විශිෂ්ටත්වය වෙනුවෙන් පිදෙන ගෞරවනීය ‘විවෘත සම්මාන – මහාචාර්ය තිලක් හෙට්ටිආරච්චි ශාස්ත්රීය විශිෂ්ටතා සම්මානය’ (Open Awards – Professor Tilak Hettiarachchy Award) දිනාගැනීමටද ඇය සමත් වූවාය. අඛණ්ඩව පීඨාධිපතිගේ ගෞරව සම්මාන ලැයිස්තුවට තෝරාගැනීම, කීර්තිමත් Mitsubishi UFJ Foundation ශිෂ්යත්වයද හිමි කරගත් සුවිශේෂ සම්මානය. සාමාන්ය පවුලක ඉපිද දුෂ්කරතා දහසක් මධ්යයේ දකුණේ සිට කොළඹට පැමිණ අත් කරගත් මේ ජයග්රහණයන් පිටුපස ඇත්තේ නිදි නොලබා වැගිරූ දහඩිය කඳුළු සහ නොසැලෙන අධිෂ්ඨානයයි.
අම්බලන්ගොඩ ධර්මාශෝක විද්යාලයේ ආදි ශිෂ්යාවක වූ හෂිනි, 2018 උසස් පෙළින් පසු කොළඹ විශ්වවිද්යාලයේ වෛද්ය පීඨයට ඇතුළත් වූ ශිෂ්යාවකි. වෛද්ය හෂිනිගේ මේ ස්වර්ණමය ගමනේ ආරම්භය ඉතා ප්රබලය. 2018 වසරේ උසස් පෙළ විභාගයෙන් ඇය දිවයිනේ අග්රගණ්ය ප්රතිඵල අත්පත් කරගත්තාය. සිය කණ්ඩායමේ කීර්තිමත් කථිකාචාර්යවරිය (Valedictorian) ලෙසද ඇය කටයුතු කළාය. වෛද්ය උපාධි පාඨමාලාව පුරා ඇය දැක්වූ දක්ෂතා විස්මිතය. අවසාන MBBS විභාගය ඇතුළු වෛද්ය විද්යා ප්රවාහ පහම ආවරණය කරමින් පළමු පෙළ ගෞරව සාමර්ථ්ය (First Class Honours) ලබා ගැනීමට ඇය සමත් වූවාය. එපමණක් නොව; සීමාවාසික පුහුණු පත්වීම් සඳහා වන සමස්ත ලංකා පොදු කුසලතා ලේඛනයේ (Common Merit List) දිවයිනේ ප්රථම ස්ථානය දිනාගැනීමට ඇය සමත් වීම ඇයගේ දක්ෂතාවේ තරම මනාව කියා පාන්නකි.
ඇය විභාග සහ පෙළපොත්වලට පමණක් සීමා නොවූවාය. පිළිකා සෛල සාම්ප්රදායික රසායනික චිකිත්සාවෙන් විනාශ කර රෝගියා දුර්වල කරනවා වෙනුවට, ඒ පිළිකා සෛල යළි සාමාන්ය සෛල බවට පත් කිරීමේ නවීන විද්යාත්මක සංකල්පය වන ‘Cancer Reversion Therapy’ පිළිබඳ පර්යේෂණාත්මක අධ්යයනයක් ඇතුළුව, ස්ක්රබ් ටයිෆස් රෝගය හඳුනාගැනීම (Understanding Eschar) සහ ගර්භිණී සමයේ මානසික ආතතිය (Antenatal Anxiety) පිළිබඳව අන්තර්ජාතික මට්ටමේ පර්යේෂණ පත්රිකා රැසක් සම්පාදනය කිරීමට ඇය දායක විය.
ශ්රී ලංකා වෛද්ය සංගමයේ වාර්ෂික විද්යාත්මක සැසිවාර ඇතුළු ප්රමුඛ පෙළේ සංසදවලදී පර්යේෂණ ඉදිරිපත් කර ඇති ඇය, වර්තමානයේදීද ඩෙංගු උණ සහ පෙණහලු ආශ්රිත අන්තරාල රෝග (Interstitial Lung Disease) පිළිබඳ අඛණ්ඩ පර්යේෂණ කටයුතුවල නිරත වෙමින් සිටින්නීය.
මෙවැනි අතිදක්ෂ දරුවෝ අපේ රටට අමිල සම්පතකි. හෂිනිගේ රන් පදක්කම් 16 පිටුපස ඇත්තේ බොහෝ කැපකිරීම්ය; නිදි නැති රාත්රීන්ය; දහඩිය, කඳුළු බිඳුය; අසීමිත උත්සාහයන්ය; මවුපිය ආදරයය; ගුරුවරුන්ගේ ආශීර්වාදය මෙන්ම නොසැලෙන අධිෂ්ඨානයයි.
මෙය ඇයගේ පමණක් නොව; සිය ගුරුවරුන්ගේද ජයග්රහණයකි; උගත් පාසලේද අභිමානයකි. කොළඹ විශ්වවිද්යාලයේ වෛද්ය ඉතිහාසයේද රන් සලකුණකි.
