රැඳවියන් වැඩි වන ප්රමාණයට සාපේක්ෂව බන්ධනාගාරවල ඉඩකඩ ප්රමාණවත් නොවන බව සාකච්ඡා වන්නේ වසර ගණනාවක පටන්මයි. ජනාධිපතිවරයා සැකකරුවන් බන්ධනාගාරවල ගත කරන කාලය අඩු කිරීම, ඔවුන්ගේ නඩු කටයුතු කඩිනම් කිරීම ගැන පසුගිය 2 දා සාකච්ඡා කළා. ඒ, රටම එකට ජාතික සභාව රැස් වූ අවස්ථාවේදීයි.
බන්ධනාගාරගත වූවන් අතරින් 70%ක් පමණ සිටින්නේ මත්ද්රව්යවලට ඇබ්බැහිවූවන් බවද මෙහිදී අනාවරණය කෙරුණු අතර, ඔවුන් ප්රමාණාත්මකව වැඩි වීම දැඩි ගැටලුවක් බවට පත්ව ඇති බවද ජනාධිපතිවරයා කීවා. බන්ධනාගාර තදබදය අවම කරගැනීමේ ක්රියාමාර්ග විදිහට වටරැක, කළුතර, පල්ලන්සේන, පල්ලේකැලේ, මාතර, කළුතර ආදී බන්ධනාගාර ආශ්රිතව ගොඩනැඟිලි ඉදිකිරීම සඳහා රු. මිලියන 13,819ක මුදලක් ඇස්තමේන්තු කර ඇති අතර, ඇතැම් ගොඩනැඟිලිවල වැඩ කටයුතු ආරම්භ කර තිබෙන බව එහිදී කියවුණා. ඇතැම් ඒවා 2027දී අවසන් කෙරෙන අතර තවත් ගොඩනැඟිලි සමහරක් 2029දී ඉදි කර අවසන් කිරීමට නියමිතව තිබෙනවා.
මත්ද්රව්යවලට ඇබ්බැහි වූවන් පුනරුත්ථාපනය කිරීම සඳහා වන පනත් කෙටුම්පතද මේ වන විට අවසන් කර තිබේ. එයද කඩිනමින් ගැසට් කිරීමට ජනාධිපතිවරයා උපදෙස් දුන්නා.
මීගමුව බන්ධනාගාරයේ ගැටුමක් ඇති වන්නේ මේ සාකච්ඡා හා ක්රියාමාර්ග ඉදිරියට යමින් පවතින අතරතුරදීයි. මීගමුව බන්ධනාගාරයේ ගැටුම ඇති වන තෙක් ඒවායේ ඉඩ-කඩ හා වෙනත් ගැටලු සම්බන්ධයෙන් සොයා බැලීමක් සිදු නොකළ බවට විපක්ෂය චෝදනා කරනවා. නැවත මීගමුව බන්ධනාගරයේ වැනි තත්ත්වයන් ඇති නොවීමට විසඳුම් ඉදිරිපත් කිරීම සඳහා කැබිනට් තීරණයක් අනුව ජනාධිපති ලේකම්වරයා විසින් විශ්රාමික ශ්රේෂ්ඨාධිකරණ විනිසුරුවරයකු සහ නීති ක්ෂේත්රයේ කටයුතු කළ නිලධාරීන් දෙදෙනකුද ඇතුළත්ව විමර්ශන කමිටවුක් පත් කර තිබෙනවා.
රජයේ රස පරීක්ෂක ගැටලු
රටම එකට ජාතික සභාවේදි බන්ධනාගාර තදබදය හා විවිධ මත්ද්රව්ය චෝදනා ලබන සැකකරුවන් දිගු කලක් බන්ධනාගාරවල ගත කිරීම ගැනක් කතා කරලා තිබුණා. එයට ප්රධාන හේතුවක් ලෙස රස පරීක්ෂණ වාර්තා ප්රමාද වීම කියල තමයි කිවුවේ. ඒ ගැන අවධානය යොමු කළ ජනාධිපතිවරයා රස පරීක්ෂක දෙපාර්තමේන්තුවේ නිලධාරීන්ගෙන් ඒ සම්බන්ධයෙන් කරුණු ඇහුවා. එහිදී ඔවුන් පෙන්වා දුන්නේ තම ආයතනයේ නිලධාරි හිඟයක් තියෙනවා කියන එක.
එක පැත්තකින් නිලධාරි හිඟයක් පවතින අතර තව පැත්තකින් රස පරීක්ෂණයට යොමු කෙරෙන සාම්පල් ප්රමාණය වැඩි වෙලා කියලත් කීවා. ඔවුන් ඉදිරිපත් කළ ගැටලු සොයා බලා කඩිනම් විසඳුම් සෙවීමේ අරමුණ ඇතිව ජනාධිපතිවරයා පසුගියදා රස පරීක්ෂණ දෙපාර්තමේන්තුවේ නිරීක්ෂණ චාරිකාවක්ද කළා. දැන් ඔන්න රස පරීක්ෂක දෙපාර්තමේන්තුවේ විද්යාත්මක පර්යේෂණ නිලධාරී තනතුරු 50ක් කොන්ත්රාත් පදනමින් බඳවා ගැනීමට අනුමැතිය ලැබී තිබෙනවා. එමෙන්ම රස පරීක්ෂක දෙපාර්තමේන්තුවට නව තනතුරු 131ක් අනුමත කර තිබෙන අතර එයින් මේ වන විට 32ක සංඛ්යාවක් බඳවා ගෙනත් තිබෙනවා.
2027 අයවැය සූදානම
2027 අය-වැය සකස් කිරීම සඳහා මේ වසරේ ප්රගතිය හා ලබන වසරට අදාළ යෝජනා ලබාගැනීම සඳහා හැම අමාත්යාංශයකම නිලධාරීන් කැඳවා සාකච්ඡා කිරීම ජනාධිපතිවරයා සිය පළමු අයවැයේ සිටම අනිවාර්ය කටයුත්තක් ලෙස කළා. මේ වසරේ සාකච්ඡා වටය පසුගිය අඟහරුවාදා ආරම්භ කළා. ඒ අනුව මේ වන විට අමාත්යාංශ විසි එකෙන් පහක් පමණ සමඟ සාකච්ඡා කර අවසන්ව කර තිබෙනවා.
එහිදී කෘෂිකර්ම අමාත්යාංශයේ අයවැය යෝජනා සාකච්ඡාවේදී ජනාධිපතිවරයා උපදෙස් දුන්නේ එක් එක් ආයතන, දෙපාර්තමේන්තු සහ පළාත් පාලන ආයතන මඟින් නඩත්තු කරන සියලු වාරි ව්යාපෘති දිස්ත්රික් මට්ටමින් ස්ථාපිත කරන ලද එක් ඒකකයක් මඟින් නියාමනය කරන්න ඕනෑ කියලයි. එසේම රට පුරා සිදු කෙරෙන වාරි ප්රතිසංස්කරණ සිතියම්ගත කිරීමටත් යෝජනා කෙරුණා. අපනයන කෘෂි භෝග ප්රවර්ධනය සහ ඒ ආශ්රිත නිෂ්පාදන ඉහළ නංවාගැනීම සඳහා නව යෝජනා සහ ව්යාපෘති යෝජනා කෙරෙහි වැඩ අවධානයක් යොමු කරන ලෙසත් ජනාධිපතිවරයා එහිදී උපදෙස් දුන්නා.
සුදු අලි ආයතන
නිවාස, ඉදිකිරීම් සහ ජල සම්පාදන අමාත්යාංශයට අදාළව 2026 වසරේ වෙන් කෙරුණු ප්රතිපාදන මත ක්රියාත්මක ව්යාපෘතිවල ප්රගතිය සමාලෝචනය සහ 2027 ප්රතිපාදන අවශ්යතා පිළිබඳ පසුගියදා (8) පෙරවරුවේ ජනාධිපති කාර්යාලයේ පැවති සාකච්ඡාවට ජනාධිපතිවරයාත් එක්ව සිටියා.
වසර ගණනාවකට පෙර විවිධ අරමුණු සහ අවශ්යතා මත පිහිටුවන ලද ඵලදායිතාවෙන් තොර, පවත්වාගෙන යෑමට අමතර බරක් දැරීමට සිදුව ඇති සියලු ආයතන ඉවත් කිරීමට කටයුතු කරන්න කියලා මෙහිදී ජනාධිපතිවරයා නිලධාරීන්ට උපදෙස් දුන්නා. ඒ වගේම විවිධ අමාත්යාංශ යටතේ එකම විෂයට අදාළව ආයතන ගණනාවක් පැවතීම හේතුවෙන් ව්යාපෘති ක්රියාත්මක කිරීමේදී අකාර්යක්ෂමතාවක් ඇති වෙලා තිබෙනවා කියලත් ජනාධිපතිවරයා කිවුවා.
සෞඛ්ය ඉහළ නංවන අයවැය
සෞඛ්ය සහ ජනමාධ්ය අමාත්යාංශයට අදාළව 2026 වසරේ වෙන් කෙරුණු අයවැය ප්රතිපාදන මත ක්රියාත්මක ව්යාපෘතිවල ප්රගතිය සහ 2027 අයවැය ප්රතිපාදන අවශ්යතා පිළිබඳ පසුගියදා (8) පස්වරුවේ දී තමයි සාකච්ඡාවට ගත්තේ. එහිදී ජනාධිපතිවරයා කීවේ හුදු ප්රතිසංස්කරණවලින් ඔබ්බට ගොස් මෙරට සෞඛ්ය සේවාව අන්තර්ජාතික මට්ටමේ ගුණාත්මක තලයකට ඔසවා තැබීම රජයේ අරමුණ කියලා, ඒ වෙනුවෙන් අවශ්ය ප්රතිපාදන ලබා දීමට රජය සූදානම් කියලත් ජනාධිපතිවරයා කීවා.
මෙරට සෞඛ්ය සේවාවේ ගුණාත්මකබව ඉහළ නැංවීම වෙනුවෙන් විද්යාත්මක පදනමක් සහිත උපායමාර්ගික යෝජනා කඩිනමින් ඉදිරිපත් කරන ලෙසත් ජනාධිපතිවරයා මෙහිදී නිලධාරීන්ට උපදෙස් දුන්නා. රෝහල් පද්ධතයේ කළ යුතු නව තාක්ෂණික පරිවර්තනය මෙහිදී විශේෂ අවධානය යොමු කෙරුණු අතර, තාක්ෂණික වශයෙන් දියුණු උපකරණ රෝහල් කිහිපයකට පමණක් ලබා දෙනවා වෙනුවට අදාළ පහසුකම් රට පුරා ජනතාවට ලබාගත හැකි පරිදි දීප ව්යාප්තව ස්ථාපිත කිරීමෙන් සෞඛ්ය සේවාව ගුණාත්මක වශයෙන් පියවරකින් ඉහළට ඔසවා තැබීමට හැකි වනු ඇති බව ජනාධිපතිවරයා කිවුවා. මෙමඟින් රජයේ රෝහල් පද්ධතියෙන් ජනතාවට කාර්යක්ෂම සහ ප්රමිතිගත සෞඛ්ය සේවාවක් සලසා ගත හැකි බවත්, පෞද්ගලික අංශයෙන් සෞඛ්ය සේවා ලබා ගැනීමේදී දැරීමට සිදුවන අධික වැය බර අවම කරගත හැකි බවත් ජනාධිපතිවරයා සිහිපත් කළා.
ක්රීඩා ක්ෂේත්රයේ නව පෙරළි.
වැඩි සද්දයක් නැතිවම ක්රීඩා ඇමැතිවරයා ක්රීඩකයන්ගේ හැකියාවන් දියුණු කරගැනීමට විශාල සහයෝගයක් දීලා. ක්රීඩා ඇමැතිවරයාගේ ඉල්ලීම පරිදි හෙල්ල විසි කිරීමේ තරග ඉසවුවෙන් රෝම ඩයමන්ඩ් ලීග් තරගාවලියේදී රන් පදක්කමක් දිනා ගනිමින් පිරිමි හෙල්ල විසිකිරීමේ ඉසවුවේ ලෝක ශ්රේණිගත කිරීම්වල දෙවැනි ස්ථානය දක්වා ඉදිරියට පැමිණී රුමේෂ් තරංගට ඇක්සස් සමාගම පූර්ණ අනුග්රහය ලබාදීමට එකඟ වෙලා තිබෙනවා.
ඒ අනුව 2028 ඔලිම්පික් උලෙළ දක්වා ඔහුගේ සහ ඔහුගේ පුහුණුකරු ටෝනි ප්රසන්නගේ සියලු ක්රීඩා හා සුභසාධන වගකීම් භාර ගැනීමට එම සමාගම එකඟ වී ඇති අතර රුමේෂ් තරංග එම සමාගම්වල නිල සන්නාම තානාපතිවරයෙකු ලෙස කටයුතු කිරීමට එකඟ වෙලා.
මේ ආකාරයට ක්රීඩකයන් නඩත්තු කිරිම ඇතැම් ව්යාපාරවලට භාර දීමට කටයුතු කරන අතර නැඟී එන ක්රීඩක-ක්රීඩිකාවන් වෙනුවෙන් එකවර විශාල මුදලක් ලබාදීම, මාසිකව ස්ථිර ගෙවීමක් සිදු කිරීම ආදි විවිධ ආකාරයේ ශිෂ්යත්ව පිරිනමා පුහුණු කටයුතුවලට දිරි ගැන්වීමක් සිදු කිරීම ගැන ක්රීඩා ක්ෂේත්රයේ සිටින පිරිස ප්රසාදයෙන් කතා කරනවා ඇහෙන්නට තිබෙනවා.
මැති- ඇමැතිවරුන් ගිය අවමඟුල
පසුගිය 8 වැනිදා රාත්රියේ විජිත, හඳුන්, වසන්ත ඇතුළු ඇමැතිවරුන් වැඩි දෙනෙක් සීදූවේ අවමඟුල් අවස්ථාවකට සහභාගි වුණා. මැති ඇමැතිවරු සියලු දෙනා එදින රාත්රියෙ 8 වන විට අවමගුලට සහභාගි වී සිටියා. ප්රවීණ මාධ්යවේදිනියක වන, කම්කරු අමාත්යාශයේ මාධ්ය ලේකම් පද්මිණි මාතරගේ ගේ මව අවුරුදු 99ක් ආයු වලඳා අභාවප්රාප්ත වුණේ පසුගිය හයවෙනිදා පෙරවරුවේ. ඒ අවමඟුල අවස්ථාවට තමයි ඔවුන් සියලු දෙනා සහභාගි වුණේ.
දයාසිරි ෆේස්බුක් නොඑන්න හේතුව.
රජය විපක්ෂයේ දේශපාලනඥයන් අපරාධකරුවන්, මත්ද්රව්ය ජාවාරම්කරුවන් හෝ දූෂිතයන් ලෙස හංවඩු ගසමින් ඔවුන් අපකීර්තියට පත් කිරීමට උත්සාහ කරන බවටද දයාසිරි එහිදී චෝදනා කළා. මෙවැනි ලේබල් ඇලවීම නිසා එම පුද්ගලයන්ට තමන් නිවැරදිකරුවන් බව සනාථ කරගෙන ඉදිරි දේශපාලන කටයුතු කරගෙන යාම බරපතළ දුෂ්කරතාවක් වෙලා.
“දැන් මේ ආණ්ඩුව මොකක්ද කරන්නේ? මේ ආණ්ඩුව කරන්නේ විවිධ අයව අල්ලගන්නවා. උදාහරණයක් මම ගත්තොත් සුගීශ්වර බණ්ඩාර මැතිතුමාගේ ප්රශ්නේ. කොළඹ මහා දවාලේ පාර මැද්දේ වාහනය නතර කරලා ඔහුව පටෝගෙන යනවා. මේ වගේ විපක්ෂයේ ඉන්න හැම කෙනාම අරගෙන එක්කෝ ඔහු ජාතිවාදියෙක් වෙනවා; එක්කෝ ඔහු හොරෙක් වෙනවා. එක්කෝ ඔහු අනික් පැත්තෙන් අපරාධකාරයෙක් බවට පත් වෙනවා; නැත්නම් කුඩුකාරයෙක් බවට පත් වෙනවා; නැත්තම් ත්රස්තවාදියෙක් බවට පත් වෙනවා. මේ කරුණු තුන මත දේශපාලකයන් විශාල ප්රමාණයක් ඇතුළට තල්ලු කරමින් දවස ගානේ ඉන්නවා. එතකොට මම හොරෙක් වෙලා යන්නේ. එතකොට කවුද මාව නිදහස් කරන්නේ. ඉතින් ඒක තමයි මං මේ කාරණයක් විදියට කිව්වේ.”
දයාසිරි ජයසේකර එහිදී ෆේස්බුක් සමාජ ජාලය ගැන සමාජයේ අවධානය යොමු වන ප්රකාශක් කළා…
“මම ෆේස්බුක් යන්නේ නැත්තේ මොකද? මෝඩයෝ ටිකක්නේ ඒකේ ඇතුළේ ඉන්නේ. බුද්ධිමත් මිනිස්සු සටන් කරන භූමියක් නෙවෙයි ඒක. ඒකාබද්ධ විපක්ෂයේ ඉන්න සියලු අයව අරගෙන මේකට දාන්න පුළුවන්. දැම්මට පස්සේ ඔහුට හම්බෙන්නේ මොනාද? ඔහු හොරෙක්, ඔහු මංකොල්ලකාරයෙක්, ඔහු කුඩුකාරයෙක් දැන් ඔය හැම එක්කෙනාම අරගෙන දැම්මට පස්සේ අපි කවුරු එක්කද වැඩ කරන්නේ? විපක්ෂය හැටියට අපි කවුරු එක්කද වැඩ කරන්නේ?”
පසුගිය 8 වැනිදා සුගීශ්වරගේ නඩුව ආපහු පටන් ගත්තා. මේ නඩුවට මහාචාර්ය ජී.එල්. පීරිස්, සාගල රත්නායක, තලතා අතුකෝරල, නිමල් සිරිපාල, ලසන්ත අලගියවන්න, දුමින්ද දිසානායක, දයාසිරි ජයසේකර, රාජිත සේනාරත්න වගේ දේශපාලනඥයෝ සෑහෙන පිරිසක් ඇවිත් හිටියා. නඩුව අහලා සුගීශ්වර 22 දා වන තුරු හිටපු තැනටම යැවුවා.
එළියේ එකතු වෙලා හිටපු ජීඇල් ඇතුළු පිරිස කතාවක.
“හිර ගෙවල්වල පහසුකම් නෑ. ඒ මදිවට තව තවත් හිර ගෙවල් පුරවනවා. දැන් අපේ කට්ටියට වැටෙන නඩු කොච්චරද කියනවා නම් ඒවට සහභාගි වෙන්න අපිට යන්න වෙලා තියෙන්නේ කට්ටිය බෙදාගෙන. ඔයා අරකට යන්න. මම මේකට යනවා. අනිත් එක්කෙනා අතෙන්ට යන්න. කියලා කතාබහ කරගෙන යන්න වෙලා…” දුමින්ද හිනා වෙවී එහෙම කියනකොට ලසන්ත කිවුවේ, “අරයා ළඟ තියෙන ෆයිල් ටික ඔක්කොම එළියට දාලා උසාවි වැඩ කරනකොට ඉස්සරහට එක නඩුවට එක්කෙනා ගානේ යන්න වෙයි” කියලා
රනිල්ගේ නඩුවේදී ආයෙත් ඔක්කොම හවස හමු වෙමු කියලා කට්ටිය විසිරිලා යන්න හැදුවේ. ඒත් රනිල්ගෙ හවස 2ට ගන්න තිබුණු නඩුව උසාවියේ ඉඩ තිබුණු නිසා වේලාසනින් ගන්න විනිසුරුතුමා තීරණය කරලා තිබුණා. නඩුව කැඳෙවුවා… ජනාධිපති නීතිඥ අනුජ ප්රේමරත්න නඩුවට ඉදිරිපත් වෙලා ලොකු ඩොකියුමන්ට් එකක් ඉදිරිපත් කරලා කිවුවේ, මේකේ ලක්ෂ අසූවක් වියදම් වෙලා තියෙන්නේ ප්රවාහන ගමන් බිමන්වලට. හැබැයි ඉතින් ඒ මුදල එංගලන්ත රජය දරලා. ලංකාවේ ආණ්ඩුවට මොකක්ද තියෙන ප්රශ්නේ.”
අනුජ එහෙම කියමින් ලිය කියවිලි වගයක් භාර දුන්නා. පරීක්ෂණවල ප්රගතිය ගැන නඩුකාරතුමා පොලීසියෙන් විමසන කොට පොලීසිය කීවේ පරීක්ෂණ අවසන්, පරීක්ෂණවලින් හොයාගත්ත තොරතුරු ඔක්කොම නීතිපති දෙපාර්තමේන්තුවට භාරදුන්නා. වැඩිදුර කටයුතු නීතිපති දෙපාර්තමේන්තුව කරයි කියලා. සැප්තැම්බර් 3 වැනි දා වෙනකොට ඒ අදාළ තොරතුරුත් එක්ක වැඩිදුර විස්තර ඉදිරිපත් කරන්න කියලා විනිසුරුතුමා කීවා. ඒ නඩුව එතනින් අවසන් වුණා.
ඒ නඩුවත් ඉවර වුණාට පසුව සියලු දෙනා පිටත් වුණේ මල් පාරට. එතන සියලු දෙනාම සාකච්ඡාවක් කළා. “සුගීශ්වර නැති එක අපට හරි පාඩුවක්. නමවෙනිදා අමාරියා එකේ නීතිඥවරුන්ගේ සම්මන්ත්රණය.” රනිල් එහෙම කියලා සුගීශ්වර හිටියා නම් මේක ගැන කරන මෙහෙවර ගැන මතක් කළා.
නාමල්ගේ නායකත්වයෙන් A Team
පාර්ලිමේන්තුව තුළ මෙන්ම ඉන් බැහැරව ද සිටින විපක්ෂයේ ක්රියාකාරීන් ඒකාබද්ධ කිරීමේ අරමුණින්, විපක්ෂ මන්ත්රීවරුන් වන නාමල් රාජපක්ෂ, රෝහිත අබේගුණවර්ධන, අනුරාධ ජයරත්න, ඩී.වී. චානක සහ චානක මදුගොඩ යන මහත්වරුන් විසින් ‘A Team – Next Wave‘ (විශිෂ්ඨයන්ගේ කණ්ඩායම – ඊළඟ රැල්ල) නමින් නව දේශපාලන වේදිකාවක් පසුගිය අඟහරුවාදා නිල වශයෙන් ආරම්භ කළා.
“ජාතික මට්ටමේ වැදගත් ගැටලුවලදී ජනතාවගේ සැබෑ හඬ බලධාරීන් වෙත රැගෙන යෑම සඳහා දැනට පාර්ලිමේන්තුව නියෝජනය කරන මන්ත්රීවරුන් මෙන්ම පාර්ලිමේන්තු නියෝජනයක් නැති අනෙකුත් දේශපාලන කණ්ඩායම් සමඟද අත්වැල් බැඳගෙන මේ වැඩපිළිවෙළ ඉදිරියට ගෙනියන්න ඕනෑ…” අනුරාධ ජයරත්න කිවුවා.
පුළුල් දේශපාලන සන්ධානයක් ගොඩනැඟීම වෙනුවෙන්, විවිධ විපක්ෂ කණ්ඩායම් සහ ස්වාධීන කණ්ඩායම්වල නියෝජිතයන් එකම වහලක් යටට කැඳවීම මේ ව්යාපාරයේ අපේක්ෂාව වෙන්න ඕන කියලත් රෝහිත අබේගුණවර්ධන කීවා.
නාමල් කීවේ “මෙම වැඩපිළිවෙළේ දිගුකාලීන අරමුණ වන්නේ ශ්රී ලංකාවේ අනාගතය භාරගත හැකි ‘ඊළඟ ජාතික කණ්ඩායම‘ (Next National Team) ලෙස ශක්තිමත්, එක්සත් විපක්ෂ බලවේගයක් රට තුළ නිර්මාණය කිරීම විය යුතු” බවයි.
“ඔව් A Team එක තමයි ඊලඟට නැෂනල් ටීම් එක වෙන්නෙ” අනුරාධ ජයරත්න කිවුවා.
“ඔව් ඔව්, ඒක ඇත්ත… ලබන සතියේ තව මන්ත්රීවරයෙකුත් එකතු වෙන්න නියමිතයි,” ඩී.වී කිවුවා.
නාමල්-ගෝඨා-රනිල් මෛත්රී එකම මඟුල් ගෙදරක.
බදාදා රාත්රියේ හදිසියේම විවාහ මංගල උත්සවයක වීඩීයෝවක් සමාජ මාධ්යවල වයිරල් වුණා. ඒ වීඩියෝවේ කතා කරමින් සිටියේ හිටපු ජනාධිපතිවරුන් වන ගෝඨාභය රාජපක්ෂ, රනිල් වික්රමසිංහ හා ශ්රී ලංකා පොදුජන පෙරමුණේ ජාතික සංවිධායක නාමල් රාජපක්ෂය. මේ විවාහ මංගල්යය හිටපු රාජ්ය අමාත්ය ශාන්ත බණ්ඩාරගේ පුත්රයාගේ වූ අතර, එය පැවැත්වූයේ සිනමන් ලයිෆ් හෝටලයේය.
මේ සඳහා හිටපු ජනාධිපතිවරුන් වූ මෛත්රීපාල සිරිසේන රනිල් වික්රමසිංහ ගෝඨාභය රාජපක්ෂ මෙන්ම නාමල් රාජපක්ෂ ඇතුළු දේශපාලනඥයන් රැසක් එක්ව සිටියා.
නාමල් සමග රනිල් හා ගෝඨා කතාබහ කරන ආකාරය බොහෝ දෙනා බලා සිටියා. නාමල් එතැනින් පැමිණි පසුව සියල්ලෝම ඔහුව වටකරගෙන ඇහුවේ “රනිල් මොනවද කියන්නේ?” කියලා.
“නෑ… මගෙන් කොහොමද මේ දවස්වල වැඩ කියලා ඇහුවා. මම කිවුවා සර් මම ගමින් ගමට වැඩසටහන එක්ක රට වටේ යනවා කියලා. තව, ඉක්මනින් හමු වෙමු කියලත් කිවුවා. වෙලාවක් කියන්න මම එන්නම් කියලත් කිවුවා. වෙන ඉතින් පෞද්ගලික තොරතුරු ඇහුවා… එච්චරයි.”
