දශක හතරකට ආසන්න කාලයකට පසු කැනඩාව වාර්තා කළ දුර්වලතම ඔලිම්පික් පදක්කම් දස්කම් හමුවේ, ක්රීඩා යටිතල පහසුකම් සහ ක්රීඩක සුබසාධනය වෙනුවෙන් දැවැන්ත මූල්ය ආයෝජනයක් සිදු කිරීමට ෆෙඩරල් රජය තීරණය කර තිබේ. පසුගිය සඳුදා කැල්ගරි හි ඔලිම්පික් ඕවල් (Olympic Oval) වේගයෙන් ලිස්සා යාමේ ක්රීඩා මධ්යස්ථානයේදී පැවති විශේෂ උත්සවයකදී ක්රීඩා කටයුතු පිළිබඳ රාජ්ය ලේකම් ඇඩම් වෑන් කොවර්ඩන් (Adam van Koeverden) මහතා මෙම නව අරමුදල් ප්රකාශයට පත් කළේය.
මෙම වැඩසටහනේ ප්රධාන අංගයක් ලෙස, 1988 ඔලිම්පික් උළෙල සඳහා ඉදිකරන ලද කැල්ගරි ඔලිම්පික් ඕවල් මධ්යස්ථානය නවීකරණය කිරීම සඳහා ඩොලර් මිලියන 52 ක මුදලක් වෙන් කර ඇත. මෙම පිරිවැය ෆෙඩරල් රජය සහ ඇල්බර්ටා ප්රාන්ත රජය අතර සමව බෙදී යනු ඇත. මීට අමතරව, ‘Build Communities Strong Fund’ යටතේ ක්රීඩා පහසුකම් දියුණු කිරීම වෙනුවෙන් ෆෙඩරල් රජය ඩොලර් මිලියන 33.6 ක මුළු ආයෝජනයක් ප්රකාශයට පත් කර තිබේ. මීට කැල්ගරි හි වින්ස්පෝර්ට් කැනඩා ඔලිම්පික් පාර්ක් (Winsport Canada Olympic Park) සහ කනනාස්කිස් හි නකිස්කා ජාතික ස්කී ක්රොස් පුහුණු මධ්යස්ථානය (Nakiska National Ski Cross Training Centre) ඇතුළත් වේ.
යටිතල පහසුකම් සංවර්ධනයට අමතරව, ක්රීඩකයන්ගේ දෛනික වියදම් පියවා ගැනීම සඳහා ලබා දෙන මලල ක්රීඩා ආධාරක වැඩසටහන (Athletic Assistance Program – AAP) සඳහා ඩොලර් මිලියන 3 ක අතිරේක ප්රතිපාදන වෙන් කර ඇත. මේ හරහා එම වැඩසටහනේ වාර්ෂික සමස්ත වටිනාකම ඩොලර් මිලියන 43 දක්වා ඉහළ යනු ඇත.
දැනට ඔලිම්පික් සහ පැරාලිම්පික් ක්රීඩකයන්ට මාසිකව ලැබෙන ඩොලර් 2,175 ක දීමනාව, මෙම නව ඉහළ නැංවීමත් සමඟ ඩොලර් 2,300 දක්වා වැඩි වනු ඇතැයි රජය නිවේදනය කළේය. දැනට ක්රීඩා ඉසව් 90 කට අධික සංඛ්යාවක ක්රීඩක ක්රීඩිකාවන් 1,900 කට වැඩි පිරිසක් මෙම වැඩසටහන යටතේ ප්රතිලාභ ලබන අතර, ඉදිරි ඔලිම්පික් සහ පැරාලිම්පික් උළෙලවලට එක්වන නව ක්රීඩා සඳහා තවත් ‘කාඩ්පත්’ (cards) හෙවත් අනුමත කිරීම් 30 ක් ලබා දීමට නියමිතය.
මෙම ආයෝජන තීරණයට මූලික හේතුව වී ඇත්තේ ඉතාලියේ පැවති ශීත ඍතු ඔලිම්පික් උළෙලේදී කැනඩාව දැක්වූ පසුබෑමයි. එහිදී කැනඩාව පදක්කම් 21 ක් දිනා ගත්තද, 1988 කැල්ගරි ඔලිම්පික් උළෙලෙන් පසුව ප්රථම වතාවට පදක්කම් සටහනෙහි මුල් ස්ථාන 10 න් ඉවතට ඇද වැටුණි. එසේම, එම උළෙල ආරම්භ වී රන් පදක්කමක් දිනා ගැනීමට කැනඩාවට දින නවයක් ගත වූ අතර, එය ද 1988 වසරෙන් පසු වාර්තා වූ දීර්ඝතම කාලයයි. කැනඩාව වෙනුවෙන් පළමු රන් පදක්කම දිනා දෙනු ලැබුවේ නිදහස් ආරේ ස්කී ක්රීඩක මිකායෙල් කිංග්ස්බරි (Mikael Kingsbury) විසිනි.
කැනේඩියානු ඔලිම්පික් කමිටුව කළ ඉල්ලීමකට අනුව, ඉදිරි වසර පහ සඳහා ජාතික ක්රීඩා සංවිධාන වෙනුවෙන් ඩොලර් මිලියන 660 ක් වෙන් කිරීමට රජය පියවර ගෙන ඇත. ඉන් අනතුරුව වාර්ෂිකව ඩොලර් මිලියන 110 බැගින් ලබා දීමට ද සැලසුම් කර තිබේ.
කැල්ගරි ඔලිම්පික් ඕවල් මධ්යස්ථානය නවීකරණය කිරීම අත්යවශ්ය කරුණක් වී ඇත්තේ එහි පවතින යටිතල පහසුකම්වල පවතින දුර්වලතා හේතුවෙනි. 1988 වසරේදී ඉදිකරන ලද මෙම මධ්යස්ථානයේ භූගත නල පද්ධති දිරාපත්වීම නිසා අයිස් සෑදීමට යොදාගන්නා ලවණ දියර කාන්දු වීම් (brine leaks) සිදුවන බව බලධාරීහු පවසති. බ්රිටිෂ් කොලොම්බියා සහ ක්විබෙක් ප්රාන්තවල 2010 සහ 2021 වසරවලදී නවීන පහසුකම් සහිත ක්රීඩා මධ්යස්ථාන ඉදි කර තිබුණද, කැල්ගරි ඕවල් මධ්යස්ථානය කැනඩාවේ ඇති පැරණිතම මධ්යස්ථානය ලෙස සැලකේ.
මෙම නව ව්යාපෘති පිළිබඳ අදහස් දක්වමින් ඇඩම් වෑන් කොවර්ඩන් මහතා ප්රකාශ කළේ, “මෙය කැනේඩියානු ක්රීඩාවේ ස්වර්ණමය යුගයක්, මන්ද අප ක්රීඩා පිටියේ සිට ජයග්රාහී පීඨය දක්වා මෙතෙක් රටක් ලෙස සිදු කළ විශාලතම ආයෝජනය සිදු කරමින් සිටිනවා” යනුවෙනි. මෙම දැවැන්ත ආයෝජනය හරහා කැනේඩියානු ක්රීඩකයන්ට ලෝක මට්ටමේ පහසුකම් ලබා දෙමින් ඔවුන්ව ජාත්යන්තර වේදිකාවේ පෙරමුණට ගෙන ඒමට රජය අපේක්ෂා කරයි.
