සයිබර් අපරාධ නිසා ලංකාවට වසරකට ඩොලර් මිලියන 450ත් බිලියන 1ත් අතර මුදලක් අහිමිවෙනවා ශ්රී ලංකාවේ සයිබර් අපරාධ සඳහා වාර්ෂික පිරිවැය ඩොලර් මිලියන 450ත් බිලියන1ත් අතර විය හැකි බවත් රටේ ඩිජිටල් ආර්ථිකය පුළුල් කරන විට ශක්තිමත් සයිබර් ආරක්ෂණ පියවරයන් සහ ජාතික දැනුවත්භාවයේ වෙනසක් විය යුතු බවත් ආසියානු සංවර්ධන බැංකුවේ (ADB) ඩිජිටල් අංශ කාර්යාලයේ අධ්යක්ෂ ඇන්ටෝනියෝ සැබලෝස් පසුගියදා පැවසුවේය.
කොළඹ පැවති ‘ඩිජිටල් පරිවර්තනය: ඩිජිටල් ආර්ථික සංවර්ධනය සඳහා සයිබර් ආරක්ෂාව සහ දත්ත ආරක්ෂාව’ පිළිබඳ ආසියානු සංවර්ධන බැංකුවේ සෙරන්ඩිපිටි දැනුම වැඩසටහන (SKOP) අමතමින් සැබලෝස් පැවසුවේ සයිබර් අපරාධවලින් සිදුවන ගෝලීය පාඩු ඩොලර් ට්රිලියන 10.5ක් හෝ ලෝකයේ දළ දේශීය නිෂ්පාදිතයෙන් 9%කට ආසන්න ප්රමාණයක් දක්වා ළඟා වී ඇති බවයි.
“අපි දළ ඇස්තමේන්තුවක් කළොත්, සහ ශ්රී ලංකාවේ මුළු දළ දේශීය නිෂ්පාදිතයෙන් 0.5-1%ක් පමණක් සළකා බැලුවහොත්, වසරකට සයිබර් අපරාධ සම්බන්ධයෙන් ඩොලර් මිලියන 450 සිට ඩොලර් බිලියන 1 දක්වා වෙන්න පුළුවන්,” ඔහු පැවසීය.
ආර්ථිකයන් වැඩි වැඩියෙන් සම්බන්ධ වන විට, ඒවා වඩාත් අවදානමට ලක්විය හැකි බවට ඔහු අනතුරු ඇඟවීය.“අපි වැඩි වැඩියෙන් සම්බන්ධ වන තරමට, අපි අවදානමට ලක් වනවා,” සැබලෝස් පැවසුවේය.
සයිබර් ආරක්ෂාව යනු සංවර්ධන සහ තාක්ෂණික අභියෝගයක් ලෙස විස්තර කරමින්, රජයන්, පෞද්ගලික අංශය සහ පුරවැසියන් අතර සහයෝගීතාවයෙන් මෙය විසඳා ගත යුතු බව ඔහු පැවසීය.දත්ත ආරක්ෂණ අධිකාරියේ සභාපති රජීව බණ්ඩාරනායක පැවසුවේ ශ්රී ලංකාවේ අභියෝගය තාක්ෂණයේ පමණක් නොව දත්ත රහස්යතාව සහ සයිබර් ආරක්ෂණ සංස්කෘතියක් පෝෂණය කිරීමේදී ද ඇති බවයි.“අපට දත්ත රහස්යතාව සහ දත්ත ආරක්ෂණ සංස්කෘතියක් නැහැ, දැනුවත් කිරීමේ මට්ටම් ඉතා අඩුයි,” ඔහු පැවසීය.
