දිට්වා සුළි කුණාටුවේ බලපෑම හේතුවෙන් මහවැලි ගඟ පිටාර ගලා පේරාදෙණිය උද්භිද උද්යානය තුන් පැත්තකින් ජලයෙන් යටවීම නිසා සිදුව තිබෙන හානිය දළ වශයෙන් රුපියල් ලක්ෂ 1300 ක් පමණ වන බවට ගණන් බලා තිබෙනවා. උද්භිද උද්යාන නියෝජ්ය අධ්යක්ෂිකා රුවිනි ගෝමස් මහත්මිය පැවසුවේ මෙම හානිය ඇස්තමේන්තු කර ඇත්තේ දළ වශයෙන් බවයි.
අධික වර්ෂාවත් සමග ගසක් කඩා වැටීමෙන් බරපතළ හානි සිදුව තිබෙන සංගිලි පාලම යළි ස්ථාපිත කිරීම සඳහා පමණක් රුපියල් ලක්ෂ 800 ක පමණ මුදලක් වැය වනු ඇතැයි ද ඇය අපේක්ෂා කරනවා.
ආපදා තත්ත්වය හේතුවෙන් උද්භිද උද්යානයේ මහවැලි නදිය ආසන්නයේ ස්ථාන කිහිපයකට හානි සිදුව තිබුණද දෙස් විදෙස් සංචාරකයන් සඳහා උද්යානය සුපුරුදු පරිදි විවෘත කර තැබීමට හැකිවූ බවද නියෝජ්ය අධ්යක්ෂවරිය සදහන් කලා.
පසුගිය කාලයේදී ද සංගිලි පාලමේ ගමන් කිරීමට අවසර ලබාදී තිබුණේ සීමිත පිරිසකට බවත් හානි වීමෙන් පසු රජයේ කර්මාන්ත දෙපාර්තමේන්තුව පසුගිය (07වැනිදා) පැමිණ එහි තත්ත්වය පරීක්ෂා කර බැලූ බවත් ඇය ප්රකාශ කළා.
උද්භිද උද්යානයේ උඩවැඩියා ප්රදර්ශන අංශයට හා අලෙවි අංශයට මෙන්ම පැළ සපයන උඩවැඩියා පැළ තවාන ජලයෙන් යටවීමෙන් එහි තිබූ පැළ 12500 ක් පමණ විනාශ වීමේ අවදානමකට ලක්ව තිබෙන බවත් මහවැලි ගඟ ආසන්නයේ තිබූ ඕකිඩ් පැළ තවානට පැල සපයන පටක රෝපණ විද්යාගාරයට හානි සිදුව තිබෙන බවත් සහකාර අධ්යක්ෂිකා රුමාලි බණ්ඩාර මහත්මිය සදහන් කලා.
ආසාදිත පැළ යථාවත් කිරීම, නව අත්හදා බැලීම් ඇතුළු විශේෂ ව්යාපෘති මෙම විද්යාගාරයේදී සිදු කරන බව ද එයට සිදුව තිබෙන හානිය මෙතෙක් ගණනය කළ නොහැකි බවද කී ඇය ජලයෙන් යටවූ උපකරණ යළි ප්රයෝජනයට ගත හැකිද යන්න සම්බන්ධයෙන් මෙතෙක් ස්ථිර යමක් ප්රකාශ කළ නොහැකි බව ද අවධාරණය කළා. මහවැලි ගඟ ආසන්නයේ ඇති උද්භිද උද්යානයේ සියලු මාර්ග ජලයෙන් යටවීම නිසා අඩි තුන හතරක් උසට රොන්මඩ තැන්පත්ව තිබෙන බවත් ඒවා ඉවත් කිරීමේ කටයුතු මේ වනවිට සිදු කරමින් තිබෙන බවත් සති දෙකක් තුළ උද්භිද උද්යානය යළි පෙර තිබූ තත්ත්වයට පත් කිරීමට හැකිවනු ඇති බවත් සහකාර අධ්යක්ෂිකාව අවධාරණය කළා.
උද්යානය තුළ ගමන් කිරීම සඳහා යොදවා තිබෙන විදුලි මෝටර් රථවලට ද හානි සිදුව තිබෙන බවත් ඒවා අලුත්වැඩියා කිරීමේ කටයුතු සිදු කරමින් තිබෙන බවත් ඇය වැඩිදුරටත් සදහන් කළා.
