ත්රස්තවාදීන්ගෙන් මෙරට මුදාගැන්මට ගුවන් හමුදාව දුන් සහය සුළුපටු නොවේ. ත්රස්තවාදි උවදුර මුලිනුපුටා දැමීමට එසේ ලැබුණු දායකත්වය එදා සිටම මෙරට බාල මහලු කාගේත් ප්රශංසාවට ලක් විය.
ත්රස්තවාදි සමයේ පවා මෙරට බොහෝ තරුණ පරපුර හමුදාවන්ට සම්බන්ධ වූයේ රට රැකගැනීමේ උදාර අරමුණින් යුක්තවය. නමින් පූර්ණිමා අනුරංගි වන ඇය ශ්රී ලංකා ගුවන් හමුදාවේ ප්රථම කාන්තා පියාසර ඉංජිනේරුවරියයි. ඇය අධ්යාපනය හැදෑරූ අම්බලන්ගොඩ ධර්මාශෝක විද්යාලයේදී ඇයගේ දිවියේ හැරවුම් ලක්ෂ්යයක් නිර්මාණය විය.
“මම පාසලේ උසස් පෙළ හදාරමින් සිටියදී ගුවන් හමුදා නිලධාරීන් කිහිප දෙනකු ඇවිත් පාසලේ විශේෂ දේශනයක් පැවැත්වූවා. මම ඒ දේශනවලට බොහොම උනන්දුවෙන් ඇහුම්කන් දුන්නා. මට එතකොට තමයි හොඳින්ම තේරුම් ගියේ ගුවන් හමුදාවට සම්බන්ධ වීමේ වැදගත්කම ගැන. ඒ හින්දම එදා මට ගුවන් හමුදාව ගැන තිබුණු ආශාව තවත් වැඩි වුණා. මම ඒ දේශනය අවසන් වුණාට පස්සෙ ගුවන් හමුදා නිලධාරීන්ගෙන් ඇහුවා ගුවන් හමුදාවට බැඳෙන්නේ කොහොමද, මොනවද ඕනෑ සුදුසුකම් කියලා. ඒ වෙලාවෙ ඒ නිලධාරීන් බොහොම උනන්දුවෙන් මට දීර්ඝ විස්තරයක් කිවුවා. මට ලොකු සතුටක් දැනුණා. ඒ නිලධාරීන් මට ලොකු පිළිගැනීමක් කළා කියලා මට හිතුණා. “ඒ මොහොතේ පටන් හෙදියක වීමේ අදහස සම්පූර්ණයෙන්ම වෙනස් වෙලා, ගුවන් හමුදාවට බැඳෙන සිහිනය මගේ එකම අදිටන වුණා. මම එදා ගෙදර ගිහින් අම්මටයි තාත්තටයි ඒ ගැන කිවුවා. අම්මා නම් කැමතිම වුණේ මම හෙද සේවයට යනවට. ඒත් තාත්ත කවදත් මගේ ගමනට මගේ අදහස්වලට උදවු කළා. එදා ඉඳන් ගුවන් හමුදාව ගැන මගේ හිතේ තිබුණු හීනය කරා මම ගමන් කළා. මගේ ජීවිතයේ මේ ගමන එන්න හැරවුම් ලක්ෂ්යය වන්නේ ජීවිතයේ කවදත් ජීවිතයේ අමතක නොවන පාසලේදී වුණු ඒ සිදුවීම ලෙසයි මම දකින්නේ.”
පූර්ණිමා අනුරංගි මවුපියන්ගේ ආශීර්වාදයෙන් ගුවන් හමුදා සේවයට එක් වන්නේ 2018 ජනවාරි 16 වැනිදාය. එදා සිට ඇය තම උපරිම කැප වීම ගුවන් හමුදාව වෙනුවෙන් ලබා දුන්නාය. “ඇත්තෙන්ම නිසි වෘත්තීය දැනුමකින් මගේ රටට සේවය කරන්න තිබුණු ඕනෑකම නිසාමයි මම ගුවන් හමුදාවට සම්බන්ධ වුණේ. ඒ වගේම, ගුවන් හමුදාව තුළ තිබෙන නිසි වෘත්තීය මාර්ගයන් වගේම අපේ හැකියාවන් අනුව ඉදිරියට යෑමට ඇති අවස්ථා නිසා මම ගුවන් හමුදාව තෝරාගත්තා. විශේෂයෙන්ම කියන්න ඕනෑ මීට කලින් කාන්තා නිලධාරිනියක කරපු නැති ක්රියාවක් නැත් නම් කාන්තා නිලධාරිනියක නොසිටිය තනතුරක් දරද්දි පොඩි චකිතයක් තිබුණා. මොකද: මගේ රැකියාව තියෙන්නෙ අහසේ ගමන් කරන යානාවක. ඒ කියන්නෙ පළමු කාන්තා ‘ෆ්ලයිට් ඉංජිනේරුවරිය’ ලෙසයි මම MI –17 යානාවක ගමන් කළේ. ඒ නිසා පළමුවරට යානය පියාසර කරද්දී චකිතයක් තිබුණත් මගේ පුහුණු කාලයේදී මට ලැබුණු මනා පුහුණුවත්, ඒ තුළින් මම ලබපු පන්නරයත් නිසා මට ඒ සියලු අභියෝග ජයගන්න පුළුවන් වුණා. “ඒත් එක්කම මගේ අත්දැකීම් මත මාගේ පළමු පියාසර ගමන සාර්ථක කරගැනීමට මහත් රුකුලක් වුණා. ඒ එක්කම කියන්න ඕනෑ මාත් එක්ක මගේ පියාසර ඉංජිනේරු නිලධාරිතුමන් සහ පියාසර පුහුණු උපදේශකතුමා මා සමඟ පළමු ගුවන් ගමනට එක් වූ නිසා මගේ ශක්තිය ධෛර්යය තවත් වැඩි වුණා.
“අද මට ගොඩක් සතුටුයි ගුවන් හමුදා ඉතිහාසයේ පළමු ගුවන්යානා කාන්තා පියාසර ඉංජිනේරුවරිය වීම ගැන මම ගුවන් හමුදාවට බැඳෙනකොට හිටපු තැනයි දැන් ඉන්න තැනයි එක්ක බලනකොට මම ගොඩාක් ඉදිරියෙන් ඉන්නවා. ඒ ගැන මට ලොකු සතුටක් දැනෙනවා. ඒ වගේම මගේ මවුපියන්ටත් මා ඉගෙනගත් පාසලටත් මා ගැන ලොකු අභිමානයක් සහ ආඩම්බරයක් තියෙනවා ගුවන් හමුදාවේ පළමු කාන්තා පියාසර ඉංජිනේරුවරිය වීම ගැන. “ඒත් එක්කම කියන්න ඕනෑ මේක මම තනියම ආපු ගමනක් නෙවෙයි. හිටපු ගුවන් හමුදාපතිවරුන්, වත්මන් ගුවන් හමුදාපතිතුමන්, හිටපු ගුවන්යානා ඉංජිනේරු අධ්යක්ෂ ජනරාල්වරුන්, වත්මන් ගුවන්යානා ඉංජිනේරු අධ්යක්ෂකතුමන්, කඳවුරු සහ බළගණවල අණ දෙන නිලධාරීන්, පියාසර පුහුණු උපදේශකවරුන්, ජ්යෙෂ්ඨ පියාසර ඉංජිනේරුවරුන් ඇතුළු සියලු ජ්යෙෂ්ඨ නිලධාරීන් සහ නිලධාරිනියන්ගේ සහයෝගය මත පියාසර ඉංජිනේරුවරියක් ලෙස මගේ ගමන එන්න හැකි වුණා.
“ඒ වගේම මාගේ පවුලේ සාමාජිකයන් – විශේෂයෙන්ම මගේ අම්මා, තාත්තා වගේම බාල සොහොයුරාත් – පාසලේ සියලු ගුරුවරුන්ගේ සහ මිතුරු මිතුරියන්ගේ ආශීර්වාදය මට නිරන්තරයෙන් ලැබුණා. මම මගේ හද පිරි ආදරය වගේම ගෞරවය ඒ සියලු දෙනාටම පිරිනමනවා.
“මට ගුවන් හමුදාවෙන් ලැබුණු මේ අවස්ථාවෙන් උපරිම සේවයක් ගුවන් හමුදාවටත් රටටත් කරන්නයි මගේ බලාපොරොත්තුව. ඒ වගේම මගෙන් පසුව කාන්තා පියාසර ගුවන්යානා ඉංජිනේරුවරියන් වීමට බලාපොරොත්තුවෙන් ඉන්න සියලු කාන්තා නිලධාරීන්ට මගේ අත්දැකීම් මෙන්ම දැනුම ලබා දෙමින් ගුවන් හමුදාවට සහ රටට සේවය කීරීමට හැකි කාන්තා ඉංජිනේරුවරියන් බිහි කරමින් උපදේශකවරියක ලෙස කටයුතු කරන්නත් මම බලාපොරොත්තු වෙනවා.”
පාසල් කාලයේදි බටහිර සංගීතය විෂය හැදැරූ පූර්ණිමා ගුවනේ මෙන්ම දියඹේද තම හැකියාවන් පෙන්වන්නීය. ඇය පිහිනුම් ශූරියක්ද වන්නීය. පසුගියදා පැවති ආරක්ෂක සේවා ජල ක්රීඩාවන්ගෙන්ද ඇය ජයග්රහණය ලැබුවාය. ඇයගේ අනාගත බලාපොරොත්තු දෙස බැලීමේදී අපට පෙනී යන්නේ ඇය තමන් උගත් දේ අනෙක් අය හා බෙදාගෙන රටට වඩාත් වැඩදායක අයකු වන්නට වෙර දරන්නියක බවයි.
අද ශ්රී ලංකා ගුවන් හමුදාවේ ෆ්ලයිට් ලෙෆ්ටිනන්ට් තනතුර හොබවන පූර්ණිමා අනුරංගි හෙට දිනයේ මීටත් වඩා දුර ගමනක් යන්නට පෙරුම් පුරන්නීය.
ගුවන් හමුදාව යනු කාන්තාවන් හට තම බලාපොරොත්තු ඉටු කරගැනීමට හැකි ස්ථානයක් බව පවසන පූර්ණිමා ගුවන් හමුදාවට එක් වී ගුවන් නියමුවරියන් මෙන්ම අනෙකුත් සියලු වෘත්තීන් සමඟ සම්බන්ධ වී වෘත්තීය දැනුම තුළින් මෙන්ම සැඟවුණු දස්කම් තුළින් ගෞරවාන්විතව මවුබිමට සේවය කිරීමට පැමිණෙන ලෙස මෙරට තරුණියන්ගෙන් ඉල්ලීමක් කරන්නීය.
