පසුගිය බ්‍රහස්පතින්දා එනම් 8 වැනිදා ජනාධිපතිතුමාට වැඩ අධික දවසක්. වැඩසටහන් කිහිපයක් යෙදිලා තිබුණා. ගලගොඩඅත්තේ ඥානසාර හිමිගේ චීවරය ඉවත් කර, ගිහි වස්ත්‍ර සහිතව අධිකරණයට ඉදිරිපත් කිරීමට බන්ධනාගාර දෙපාර්තමේන්තුව කටයුතු කිරීම පාදක කරගනිමින් සමාජයේ ඇති වී තිබෙන ආන්දෝලනාත්මක තත්ත්වය හමුවේ ජනාධිපතිවරයා නාහිමිවරුන් සමඟ සාකච්ඡාවක් දාගෙන තිබුණේ පසුගිය බ්‍රහස්පතින්දා. ජනාධිපතිතුමා එහිදී නාහිමිවරුන්ට කීවේ, බන්ධනාගාර නීති සකස් කිරීමේදී භික්ෂූන් වහන්සේලා හෝ අනිකුත් ආගමික උතුමන්ලා කේන්ද්‍ර කරගෙන විශේෂ රෙගුලාසි සකස් වී නැති බවයි. එමෙන්ම සැම විටම පොදු සිරකරුවන් පිළිබඳ අවධානය යොමු කර තිබෙන බවත් කියා සිටියා.
බන්ධනාගාර නීතියට අනුව සිරකරුවන් බැහැරට රැගෙන ඒමේදී පැවති ක්‍රියාපටිපාටිය අනුගමනය කර ඇති බවත්, දැනට බන්ධනාගාරගතව සිටින භික්ෂූන් වහන්සේ 63ම වෙනත් නඩුවලට සම්බන්ධ නම් අධිකරණයට කැඳවීමේදී සිවුරු දරාගෙන උසාවියට රැගෙන ආවේ නැති බවත් කීවා.
“හැම විටම මේ නීති සකස් කර තිබෙන්නේ පොදු තත්ත්වයකදී මිස භික්ෂූන් වහන්සේ උදෙසා විශේෂ රෙගුලාසි අඩුයි. භික්ෂූන් වහන්සේ සිරගත වනු ඇති බව අපේක්ෂා නොකළ නිසා එවැනි රොගුලාසි ඇතුළත් කරන්න නැතිව ඇති. හැබැයි දැන් සමාජයේ ඇති වී තිබෙන බිඳවැටීමට යම් ප්‍රමාණයකට භික්ෂූන් වහන්සේලාද ගොදුරු වී සිටින බව පෙනෙන්නට තිබෙනවා. ඒ නිසා, බන්ධනාගාරගත වූ විට රැඳී සිටින ආකාරය සහ බන්ධනාගාරයෙන් බැහැරට ගෙන යන ආකාරය පිළිබඳ නව රීති සම්පාදනය කරගත යුතුයි. එය එක් හිමිනමක් ඉලක්ක කරගෙන නොව, පොදුවේ පද්ධතියටම අදාළ විය යුතුයි” ජනාධිපතිවරයා කියා සිටියා.
දැන් වැස්ස දැකලා සතුටු වෙන්න පුළුවන්
ලෝක ජනාවාස දිනයේ නිවාස පන්දහසක් පිරිනැමීමේ වැඩසටහනක් රට පුරා ක්‍රියාත්මක වුණා. මේ වැඩසටහන යටතේ ග්‍රාමසේවා වසම් මට්ටමින් ඉතා දිළිඳු පවුලක් තෝරාගෙන ලක්ෂ දහයක් ප්‍රතිපාදනවලින් ගමේ අයගේ ශ්‍රමදායකත්වයද ඇතිව ලක්ෂ 15ක පමණ වටිනාකමකින් යුතු නිවාස විශාල ප්‍රමාණයකුත් නිවෙස් හිමියන්ට භාර දුන්නා. නිවාසලාභීන් සහ ඔවුන්ගේ දරුවන් කරපු කියපු දේවල් හරිම සංවේදියි.
“මගේ අම්මයි තාත්තයි දෙන්නම වැඩට යනවා දවල් දවසට මම විතරයි ගෙදර ඉන්නේ. අපේ ගෙදර වැස්සට වහලින් තෙමෙනවා. ලෑලි බිත්ති දිරලා. ලොකු හුළඟක් ආවොත් ගලවගෙන යයි කියලා බය හිතෙනවා. කවුරුහරි ආවත් මේ දොරවල් අරගන්න එක අමාරු දෙයක් නෙවෙයි. ඉස්කෝලෙ ඇරිලා ගෙදර ආවට පස්සේ අම්මලා එනකම් මං ඉන්නේ පුදුම බයකින්.” එහි සිටි දියණියක් කියාගෙන ගියා.
“දැන් මොකද හිතෙන්නේ?”
“අම්මෝ! දැන් නම් පුදුම සතුටක්. මේ වගේ ගෙයක් කියන්න මට හීනයක්. මං හිතාගෙන හිටියේ ඉගෙනගෙන රස්සාවක් කරලා කොහොම හරි මුලින්ම ගෙයක් හදනවා කියලයි. ඉතින් ඒ හීනේ කලින්ම ඉෂ්ට කරලා දුන්නට මාමලාට ගොඩක් පින්.” අවුරුදු දොළහක් විතර වයසැති ඒ දියණිය ඇස්වල කදුළු පුරෝගෙන. කාගෙත් ඇස් තෙත් වුණා.
අලුත් නිවාස දෙනවා වගේම දීපු නිවාස ගැන හොයා බලන එකත් වගකීමක් කරගත්ත සමන්ත විද්‍යාරත්න ඇමැතිවරයා පූනාගල නිවාස බලන්න ගියා. ඒ නිවාසවල පදිංචිකරුවෝ ඇමැතිවරයා බොහොම ආදරෙන් පිළිගත්තා.
“ඉතිං කොහොමද අම්මලාගෙ අලුත් ගෙවල්?”
“අනේ මහත්තයෝ ජනාධිපතිතුමයි, ඔබතුමයි, මේ ආණ්ඩුවයි කතරගම දෙවියෝ බලාගන්න ඕනෑ.” ඒක අම්මා කෙනෙක් කතාවට මුල පිරුවා.
“අනේ ඔව් ඇමැතිතුමා. ඉස්සර අපි වැස්සක් වහින කොට පුදුම බයෙන් හිටියේ. ගෙවල් ගියාට පස්සේ අපිට පැක්ටරියට දැම්මනේ. එතන පුදුම දුකකින් ජීවත් වුණේ. හරියට කුකුල් කූඩුවක් වගේ. දැන් දෙයියනේ කියලා අත-පය දිගඇරගෙන ඉන්නවා.”
“කොහොම හරි ඔයාලා සතුටෙන් නම් එච්චරයි,” සමන්ත විද්‍යාරත්න ඇමැතිතුමා සතුටු සිතින් කතාබහ නිම කළා.
වටගලට කෝල් එකක්
පහුගිය බදාදා හැන්දෑවේ නොදන්න අංකයකින් සුනිල් වටගල නියෝජ්‍ය ඇමැතිවරයාට දුරකතන ඇමතුමක් ලැබුණා. අනිත් පැත්තෙන් කතා කළේ වෛද්‍යවරයෙක්. නම කිවුවට පස්සේ ඇමැතිතුමාට මතක් වුණා ඒ කවුද කියලා.
“ඇමැතිතුමා, අද විශේෂ දවසක්ද?”
“ඒ මොකද එහෙම අහන්නේ?”
“නෑ. අද හතේ නිව්ස් සම්පූර්ණයෙන්ම අත්අඩංගුවට ගැනීම්වලින් පිරිලා. මගේ යාළුවෙකුත් කතා කළා, ආණ්ඩුව මේ යන ගමන ගැන ගොඩාක් අය ඉන්නෙ පැහැදීමකින්,” වෛද්‍යවරයා කිවුවා.
“මේකයි ඩොක්ටර්, වැරදි කරපු අයට කොහොමත් බේරීමක් නෑ. වරදක් නොකළ අය බය වෙන්න ඕනත් නෑ. අපි නිකරුණේ කවුරුවත් අත්අඩංගුවට ගන්නෙත් නෑ; කාටවත් බොරු නඩු හදන්නෙත් නෑ. පොලීසිය තමන්ගේ රාජකාරිය හරියට කරනවා. අධිකරණය ඒ අයගේ රාජකාරිය කරනවා. අපි කරන්නේ ඒ අයට ස්වාධීනව වැඩ කරන්න පරිසරය හදලා දෙන එකයි,” වටගල ඇමැතිවරයා කිවුවා.
ඥානසාර හාමුදුරුවන්ට සිවිල් ඇඳුමක් අන්දපු එක ගැන සමාජයේ තිබෙන කතාබහ ගැනත් මෙතනදි කතා වුණා. සුනිල් වටගල නියෝජ්‍ය ඇමැතිවරයා කිවුවේ “ඒක බන්ධනාගාරයේ ක්‍රමවේදය සහ නීති රීති කියලයි. ඒවල ප්‍රශ්න තියෙනව නම් අපි සාකච්ඡා කරලා ඒවා නිවැරදි කරනවා. නායක හිමිවරුන්ගේ අදහස්වලට අපි ගරු කරනවා.”
සජබය අලුත්ම ගේම පටන් ගනියි
පසුගිය දවස්වල පාර්ලිමේන්තු කොරිඩෝව පැත්තේ ලොකු ලොකු කසුකුසු ටිකක් පටන් අරන් තියෙනවා කියලයි ආරංචිය. කාරණය වෙන මුකුත් නෙවෙයි, කථානායකවරයාට එරෙහිව සජබෙන් ගෙන එන්න හදන විශ්වාසභංග යෝජනාව.
“මීට කලිනුත් මේ විශ්වාසභංගය ගැන කතා වුණත්, මොකක්දෝ හේතුවකට ඒක දෙපාරක්ම අකුළාගන්න වුණා. හැබැයි මේ සැරේ නම් වැඩේ ටිකක් සීරියස් කරන්න යනවා වගේ. සජබ මන්ත්‍රී කණ්ඩායම් රැස්වීමේදී ගත්ත තීරණේකට අනුව, පසුගිය 8 වැනිදා මන්ත්‍රීවරුන්ගේ අත්සන් එකතු කරන්න පටන් අරන්. මේ හැම දේකටම මූලික වෙලා වැඩ කරන්නේ දයාසිරි ජයසේකර මන්ත්‍රීතුමායි කියනවා.
මේ විශ්වාසභංගයේ චෝදනා හැටියට මේකට මුල් වෙලා තියෙන්නේ වැඩ තහනමකට ලක් වුණු පාර්ලිමේන්තු නියෝජ්‍ය මහ ලේකම් චමින්ද කුමාර කුලරත්න සම්බන්ධ කතාවක්. ව්‍යාජ තොරතුරු දීලා තනතුර ස්ථීර කරගන්න හැදුවා කියලයි, අනුමත වැටුප් තලයට වඩා වැඩි වැටුපක් අරන් රජයට මූල්‍ය අලාභයක් කළා කියලයි කියන චෝදනා මත මූලික විනය පරීක්ෂණයකින් ඔහු වැරදිකරු වුණාට පස්සේ තමයි මේ වසරේ පෙබරවාරිවල ඔහුගේ වැඩ තහනම් වුණේ. ඉතින්, වැඩ තහනමෙන් පස්සේ ඔහු ඉදිරිපත් කරපු චෝදනා මත පදනම් වෙලා තමයි මේ අලුත් විශ්වාසභංගයේ තියෙන්නේ කියලයි ආරංචි මාර්ග කියන්නේ.
ඒත්, මේ දවස්වල ආණ්ඩුවට එරෙහිව ශක්තිමත් ජනතා මතයක් හදාගන්න විපක්ෂය ලොකු අභියෝගයකට මුහුණ දීලා ඉන්න නිසා, මේ විශ්වාසභංගය හරහා මොකක් හරි මහජන මතයක් ගොඩනගාගන්න උත්සාහ කරනවද කියලත් මාධ්‍යවල නම් ලොකු කතාවක් යනවා.
කහඳගම පොහොට්ටුවෙ නෙවෙයිලු!
කොළඹ මහා නගර සභාවේ හිටපු පොහොට්ටු නාගරික මන්ත්‍රී මහින්ද කහඳගම අයිස් මත්ද්‍රව්‍ය සමග කොළඹ මධ්‍යම අපරාධ විමර්ශන කාර්යංශය විසින් පසුගියදා මිරිහාන ප්‍රදේශයේ අවන්හලක් අසලදී අත්අඩංගුවට ගත්තානේ. අත්අඩංගුවට ගත් සැකකාර මහින්ද කහඳගම සතුව තිබී අයිස් මත්ද්‍රව්‍ය තොගයක් ද සොයාගෙන තියෙනවා කියලත් කීවනෙ.
මහින්ද කහඳගම කාලයක සිට මත්ද්‍රව්‍ය ජාවාරම් කර ඇති බව මූලික විමර්ශනවලින් අනාවරණය වී ඇති බවත් මේ සැකකරුගේ මත්ද්‍රව්‍ය ජාවාරමට සම්බන්ධ තවත් පුද්ගලයෙකු ද කොළඹ මධ්‍යම අපරාධ විමර්ශන කාර්යංශය විසින් අයිස් මත්ද්‍රව්‍ය සමඟ අත්අඩංගුවට අරගෙන.
ඒ අස්සේ කහඳගම මත්ද්‍රව්‍ය ජාවාරම්වලට සම්බන්ධයි කියලා ඔප්පු වෙන වීඩියෝ පටත් එළියට ඇවිත්. එක වීඩියෝ පටයක තියෙන්නේ කහඳගම ඩුබායි ගිහිල්ලා ඩුබායිවල ඉන්න මෝදර චතුරයි, කෙසෙල්වත්තේ
දිනූෂයි එක්ක දාන පොඩි රංගනයක්. ඔක්කොම කහඳගමට කියන්නේ ඩඩා කියලනේ. ඔය වීඩියෝපට වෙනම යන අස්සේ තව හඬ පට දෙකකුත් ඇවිල්ලා එළියට.
මහින්ද කහඳගම කියන්නේ පොහොට්ටුවේ හිටපු නාගරික මන්ත්‍රී කෙනෙක්. ඔහුට මත්ද්‍රව්‍ය චෝදනා එල්ල වෙද්දි මාධ්‍යවේදියෙක් පසුගියදා පොහොට්ටුවේ ලේකම් සාගරගෙන් ඇහුවේ, “ආණ්ඩු පාර්ශ්වය පොහොට්ටුව ඉතා දූෂිත පක්ෂයක් බව කියනවා. මත්ද්‍රව්‍ය චෝදනා මත මහින්ද කහඳගම අත්අඩංගුවට අරන්. ඔහු ශ්‍රී ලංකා පොදුජන පෙරමුණේ හිටපු මන්ත්‍රී කෙනෙක්. මෙහෙම කට්ටිය එක්කද ඔබතුමාලත් එක්ක ඉන්නේ?” කියලා.
ඒ වෙලාවේ සාගර කීවේ, “කහඳගම කියන පුද්ගලයා කවදාවත් ශ්‍රී ලංකා පොදු ජන පෙරමුණේ සාමාජිකයෙක් නෙවෙයි. පහුගිය පළාත් පාලන ඡන්ද විමසීමේදීත් ඊට පෙර ඡන්ද විමසීමේදීත් අපි වමේ දේශපාලන පක්ෂ සමඟ සංධානයකට එකතු වුණා. ඒ අවස්ථාවේදී වාසුදේව නානායක්කාර මැතිතුමාගේ නව සම සමාජ පක්ෂයේ සාමාජිකයෙක් හැටියට තමයි ඔහු ඉදිරිපත් වුණේ. නව සම සමාජ පක්ෂයේ ඉල්ලීමක් මත තමයි නාමයෝජනා දුන්නේ. මහින්ද කහඳගම කියන පුද්ගලයා ශ්‍රී ලංකා පොදු ජන පෙරමුණේ සාමාජිකයෙක් කියන එක දැඩිව ප්‍රතික්ෂේප කරනවා.”
අරගල කාලේ මහින්දට හයිය දෙන්න ගෝල්ෆේස් ගිහිල්ලා අන්තිමේදී ගුටිකාලා යට ඇඳුම පිටින් වැටිලා “අනේ මාව හොස්පිටල් ගිහින් දාන්න… අයියෝ…” කියමින් කෙඳිරිගාමින් හිටපු මහින්ද කහඳගම අපේ පොහොට්ටු පක්ෂෙ නෙවෙයි කියපු එක නම් ගුණමකුකමක් කියලා සාමාජ මාධ්‍ය ජාලාවල හරි හරියට කතා වෙලා තිබුණා.
ශිරන්තිත් පොහොට්ටුවේ නෙවෙයිද?
පසුගියදා පොහොට්ටුවේ මාධ්‍ය සාකච්ඡාවකදී “මහින්ද කහඳගමගේ තමන්ගේ පක්ෂයේ කෙනෙක් නෙවෙයි කියලා ප්‍රකාශ කළා වගේ ඉදිරියේදී නාමල් රාජපක්ෂ, ශිරන්ති රාජපක්ෂ වැරදිකරුවන් වුණොත් ඒ අයත් ඔබගේ පක්ෂෙ නෙවෙයි කියලා කියනවද?” කියලා සාගරගෙන් මාධ්‍යවේදියෙක් අහපු ප්‍රශ්නයට සාගර දුන්නේ රට පටලපු උත්තරයක්.
“නාමල් රාපක්ෂ කියන්නේ අපේ පක්ෂයේ ජාතික සංවිධායකයා, අපේ පක්ෂයේ නෙවෙයි කියන්න බෑ. ශිරන්ති රාජපක්ෂ මැතිනිය කියන්නේ අපේ පක්ෂයේ නායකයාගේ බිරිඳ. එතුමිය ඍජුව පක්ෂයේ සාමාජිකයෙක් නොවුණත් එතුමිය ජනාධිපති ආර්යාව හැටියට සිදු කරපු ක්‍රියාකාරකම් සම්බන්ධයෙන් පක්ෂයක් විදිහට අපිට අදාළ නෑ වගේ බොළඳ , බොරු කියන පක්ෂයක් නෙවෙයි අපි.”
නාමල්ගෙ දිනපතා රූටීන් එක
පොහොට්ටුවේ කණ්ඩායමක් පසුගියදා නාමල් හමු වීමට පාර්ලිමේන්තුවට ආවා. ඒ, ජොන්ස්ටන් ප්‍රනාන්දු, සාගර කාරියවසම්, ඩී.වී චානක, චානක මාදුගොඩ, සංජීව එදිරිමාන්න, ඉන්දික අනුරුද්ධ, ජානක වක්කුඹුර, යූ.කේ. සුමිත්. පසුගිය සතියෙ කොට්ඨාස රැස්වීම් ටික ආපහු ආරම්භ කළා කියලා නාමල්ට ඒ වෙලාවේ ජොනී කීවා. ඒවායේ විශාල ප්‍රගතියක් තියෙනවා කියලත් සංජීව එදිරිමාන්න කීවා.
අපේ රැලිය ගැන අනෙක් පක්ෂ නායකයන් එක්ක කතා කරලා සුදුසු දිනයක් දාගන්න කියලත් නාමල් මතක් කළා.
මේ අතර එදිනම රිමාන්ඩ් බන්ධනාගාරගත කළ රෝහිත බෝගොල්ලාගමද දැමුණේ නාමල්ගේ සිර මැදිරියටයි.
සාගරට ඉඟුරු ප්ලේන්ටිම දෙකක්
‘යුක්තිය වෙනුවෙන් නැඟිටිමු’ නමින් සම්මන්ත්‍රණ මාලාවක් රට පුරා පැවැත්වීමට ශ්‍රී ලංකා පොදුජන පෙරමුණ තීරණය කරලා. නාමල්ගෙ උපදෙස් අනුව තමයි වැඩේ පටන් ගන්නෙ කියලා පොහොට්ටුවෙ ලොක්කෝ කියන්නේ.
එයින් පළමුවැනි එක කළුතර කණ්ඩායම කරන්නම් කියලා සංජිව එදිරිමාන්න සමාරම්භක සම්මන්ත්‍රණයේ වගකීම භාරගත්තා. සම්මන්ත්‍රණය තිබුණේ හොරණට කිට්ටුව මදුරාවල උත්සව ශාලාවක. මහලේකම් සාගර කාරිවසම්, නීතිඥ සංජීව වීරවික්‍රම සහ ඩී.වී. චානක සම්මන්ත්‍රණය ඇමතුවා. දිස්ත්‍රික්කය වෙනුවෙන් ස්වාමීන් වහන්සේ නමක් සහ නීතීඥවරයෙක් සභාව ඇමතුවා
“සංජීව අයිය වැඩේ මරු ආ!” ඩී.වී චානක එදිරිමාන්නගෙ අත්දෙක තදින් අල්ලගෙන කීවා. “අපි යමු තේ එකක් බොන්න අපේ ගේ තියෙන්නෙ මේ ළඟ නෙ.”
ආරාධිතයන් හැමෝම ප්‍රධාන පාරෙන් ඇතුලෙ ගම මැද්දෙ තියෙන සංජීව එදිරිමාන්නගේ නිවෙසට ගියා. ආප්ප, වඩේ, පොල් රොටි, සම්බෝල එක්ක, මඤ්ඤොක්කා, රෝස් පාන් සහ තවත් කෑම එක්ක පුංචි තේ මේසයක් ලෑස්ති කර තිබුණා. වැඩිපුරම ඉල්ලුම තිබුණේ මඤ්ඤොක්කා සහ සම්බෝලයට.
“මට දෙන්නකො තව ඉගුරු ප්ලේන්ටි එකක්. ඒක මාරම රසයි…” කියමින් සාගර ඉගුරු ප්ලේන්ටි දෙකක්ම බිවුවා.
