විස්සයි 20 ලෝක කුසලාන ක්‍රිකට් තරගාවලිය සඳහා සහභාගිවීමට දිවයිනෙන් පිටත්ව යන ශ්‍රී ලංකා ක්‍රිකට් කණ්ඩායම පසුගියදා ජනාධිපති කාර්යාලයේදී ජනාධිපති රනිල් වික්‍රමසිංහ මහතා හමුවුනා.ක්‍රීඩකයන් දිරිමත් කරමින් ඔවුන් සමඟ සුහද කතා බහක නිරත වූ ජනාධිපතිවරයා රට වෙනුවෙන් විශිෂ්ට ජයග්‍රහණයක් අත්කරගැනීමට සිය සුබපැතුම් ද පිරිනැමුවා.
වනිඳු හසරංගගේ නායකත්වයෙන් යුත් ක්‍රීඩකයින් 15 දෙනෙකුගෙන් සමන්විත ශ්‍රී ලංකා ක්‍රිකට් කණ්ඩායම පසුගිය 14 වැනිදා උදෑසන අමෙරිකාව බලා පිටත්ව ගියා.පන්දුවාර විස්සයි 20 ලෝක කුසලාන ක්‍රිකට් තරගාවලිය ජුනි 01 වනදා සිට ජූනි 29 වනදා දක්වා අමෙරිකාවේ සහ බටහිර ඉන්දීය කොදෙව්හිදී පැවැත්වීමට නියමියි.
මේ අතර 20යි 20 ලෝක කුසලානය සඳහා සහභාගිවන ශ්‍රී ලංකා කණ්ඩායම ඕනෑම අභියෝගයක් භාරගත හැකි ආකාරයේ කණ්ඩායමක් බව ශ්‍රී ලංකා ක්‍රිකට් තේරීම් කමිටු සභාපති උපුල් තරංග පවසනවා.
තේරීම් කමිටු සභාපතිවරයා මෙම අදහස් පළකළේ 20යි 20 ලෝක කුසලාන සංචිතය පිළිබඳ දැනුවත් කිරීමේ ප්‍රවෘත්ති සාකච්ඡාවකට පසුගියදා එක්වෙමින්.
එහිදී වැඩිදුරටත් අදහස් දැක්වූ ශ්‍රී ලංකා ක්‍රිකට් තේරීම් කමිටුවේ සභාපති උපුල් තරංග,
“අමෙරිකාවේ ඇති තණතිලි පිළිබඳව අපිට එන පණිවිඩ අනුව විශේෂයෙන් නිව්යෝක් සහ ඩලස්වලත් ඩ්‍රොපින් පිච් වල තමයි ක්‍රිඩා කරන්නේ. මොකද ඒවා තියෙන්නේ ඕස්‍ට්‍රේලියාවේ. ගිය අවුරුද්දේ මේජර් ලීග් එක ක්‍රීඩා කරලා තියෙන්නේ ඩලස්වල ඒවත් ඩ්‍රොපින් පිච්වල තමයි ක්‍රීඩා කරන්නේ. ඒ පිචස් ගත්තාම ගොඩක්… ඔස්ට්‍රේලියාවෙන් ආවත් කියන්නේ අර අන්ඉවන් විකට් කියලා. ඒ වගේ විකට් එක පොඩ්ඩක් ස්ලෝ ගතියක් තියෙනවා කියලා. විශේෂයෙන්ම එහේ කන්ඩිෂන් එක්ක බලද්දී අමෙරිකාවේ ඒ වගේම බටහිර ඉන්දීය කොදෙව්වල. ගොඩක් විදියහට එන නිව්ස් එක්ක තියෙන විකට්ස් ටිකක් ස්ලෝ වෙයි කියලා.”
“අපි අන්තිම කාලේ ක්‍රීඩා කළේ දඟ පන්දුයවන්නන් දෙනෙකුගෙන්. හැබැයි සමහරක් වෙලාවට ලෝක කුසලානෙදී අපට දඟපන්දු යවන්නන් තුන්දෙනෙකු එක්ක යන්න අවස්ථාවක් එයි සමහර වෙලාවට. අපි ඒ හින්දා තමයි ඒ ඔප්ෂන් එකට දුනිත්ව ගත්තේ. මොකද ඔහුගේ පිතිකරණය දිහා බලලා. අපට සමහර වෙලාවට ෆාස් බොල් ඕල්රවුන්ඩින් නැතුව ස්පිනින් ඕල්රවුන්ඩ්ලට යන්න පුළුවන්.”යනුවෙන් ප්‍රකාශ කලා.
