ශ්‍රී ලංකාවේ විස්තීර්ණ ණය පහසුකම (EFF) යටතේ සිදුකෙරෙන තුන්වන සමාලෝචනය පිළිබඳ සාකච්ඡා කිරීමට ජාත්‍යන්තර මූල්‍ය අරමුදලේ කණ්ඩායමක් නුදුරේදීම ශ්‍රී ලංකාවට පැමිණෙන බව IMF ආසියා පැසිෆික් කලාපයේ අධ්‍යක්ෂක ක්‍රිෂ්ණා ශ්‍රීනිවාසන් මහතා පැවසීය.
ජාත්‍යන්තර මූල්‍ය අරමුදල පසුගිය (01) වැනිදා පැවැත්වූ විශේෂ ප්‍රවෘත්ති සාකච්ඡාවේදී ඔහු වැඩිදුරටත් සඳහන් කළේ, නව රජය දිවුරුම් දීමෙන් පසු IMF නියෝජිතයින් ශ්‍රී ලංකාවට පැමිණ ජනාධිපතිවරයා සහ ඔහුගේ කණ්ඩායම සමග ඵලදායී සාකච්ඡා පැවැත්වූ බවයි.
අදාළ සාකච්ඡා සඳහා ශ්‍රී ලංකාවේ කණ්ඩායමක් වොෂින්ටන් වෙත පැමිණ සිටි බවත් ජාත්‍යන්තර මූල්‍ය අරමුදලේ (IMF) වැඩසටහනට ඇති කැපවීම ශ්‍රී ලංකාවේ නව රජය යළි තහවුරු කර ඇති බවද ක්‍රිෂ්ණා ශ්‍රීනිවාසන් මහතා වැඩිදුරටත් සඳහන් කළේය.
මේ අතර මුදල් අමාත්‍යංශයේ ලේකම්, මහින්ද සිරිවර්ධන, මහතා පසුගිය බදාදා කොළඹ පැවති උත්සවයකදී අදහස් දක්වමින් චීනය සිය ආර්ථික අභියෝග හරහා ශ්‍රී ලංකාවට සහාය දැක්වීම සඳහා ඉටු කර ඇති වැදගත් කාර්යභාරය ඇගයීමට ලක් කළේය. “විශේෂයෙන්ම අර්බුදකාරී කාලවලදී ශ්‍රී ලංකාවේ ආර්ථික අභියෝගවලට මුහුණ දීම සඳහා චීනය මූල්‍ය ආධාර සහ ණය ලබා දී ඇත,” ඔහු පැවසීය.
ආර්ථික වර්ධනය සහ නවීකරණය සඳහා ශ්‍රී ලංකාවේ අපේක්ෂාවන් සඳහා චීනයේ අඛණ්ඩ සහයෝගය ඉතා වැදගත් බව ඔහු එහිදී අවධාරණය කළේය.
