ලෝක පාපන්දු කිරුළ දිනූ ආර්ජන්ටිනාවේ සුපිරි ක්‍රීඩක ලයනල් මෙසීගේ Lionel Messi ශුද්ධ වත්කම අමෙරිකානු ඩොලර් මිලියන 650 (ශ්‍රී ලංකා රුපියල් කෝටි 19000ක්) පමණ වෙතැයි ගණන් බලා ඇත.
ස්පාඤ්ඤ කොටස් හුවමාරුවක මෙසීගේ සමාගමට අයිති දේපළ ලැයිස්තුගත කොට ඇති අතර, එහි තරු පහේ හෝටල් 7ක්, සාප්පු සංකීර්ණ 3ක්, ස්පාඤ්ඤයේ මහල් නිවාස පහක් මෙන්ම ලන්ඩන් සහ පැරිසියේ මහල් නිවාස ඇති බව ලේඛන උපුටා දක්වමින් මාධ්‍ය වාර්තා කළේය. මෙයට අමතරව බාර්සිලෝනා Barcelona නගරයෙන් පිටත කැස්ටල්ඩෙෆෙල්ස් castelldefels හි වෙරළබඩ මන්දිරයක් ඇතුළු සුඛෝපභෝගී නිවාස ඇතැයි සඳහන් වේ.
ඔහු සතු කෝටි ගණන් වාහනවලට අමතරව අමෙරිකානු ඩොලර් මිලියන 15ක් වටිනා ගල්ෆ්ස්ට්‍රීම් නම් වූ පුද්ගලික ජෙට් යානයක් ද ඇත. පැයට කිලෝමීටර් 940 දක්වා වේගයකින් පියාසර කිරීමට හැකි මගී ආසන 16ක් සහිත මේ පුද්ගලික ගුවන් යානයේ මුළුතැන්ගෙයක් සහ නාන කාමර දෙකක්ද ඇත.
වත්මන් ඉන්ටර්මියාමි Inter miami ක්‍රීඩා සමාජ‍ය හා සහ හිටපු බාසිලෝනා පුරාවෘත්තය වූ මෙසී තම සමාගම එඩිෆිසියෝ රෝස්ටවර් (Edificio Rostower) සමූහය ලෙස නම්කොට එහි සභාපති ලෙස පත්ව සිටී. ඔහුගේ බිරිඳ ඇන්ටොනෙල්ලා රොකියුසෝ Antonella Roccuzzo එම ව්‍යාපාර සමූහ‍යේ උප සභාපති වේ.
ස්පාඤ්ඤ බැංකුව විසින් අධීක්‍ෂණය කරන ලද විකල්ප වෙළඳපොළක් වන පෝර්ට්ෆොලියෝ කොටස් හුවමාරු වෙළෙඳපොළ (Portfolio Stock Exchange) අනුව මෙසීගේ සමාගමේ කොටසක වටිනාකම අමෙරිකානු ඩොලර් 60ක් (ශ්‍රී ලංකා රුපියල් 17538ක්) වන අතර, එය අමෙරිකානු ඩොලර් මිලියන 232.12ක (ශ්‍රී ලංකා රුපියල් කෝටි 6785ක) වෙළෙඳපොළ ප්‍රාග්ධනීකරණයකට පරිවර්තනයක් වේ.
