ජාත්යන්තර දේශපාලන කරළියේ සුවිශේෂී සන්ධිස්ථානයක් සනිටුහන් කරමින්, චීන කොමියුනිස්ට් පක්ෂ මධ්යම කාරක සභාවේ මහ ලේකම් සහ චීන ජනාධිපති ෂී ජින්පිං මහතා උතුරු කොරියාවේ දෙදින නිල රාජ්ය සංචාරයක නිරත විය. උතුරු කොරියානු නායක කිම් ජොන් උන් මහතාගේ විශේෂ ආරාධනයකට අනුව සිදුවන මෙම සංචාරය, වසර හතකට පසුව චීන ජනාධිපතිවරයෙකු උතුරු කොරියාවට පැමිණි පළමු අවස්ථාව ලෙස ඉතිහාසයට එක්වේ.
පසුගිය (08)වැනිදා පෙරවරුවේ විශේෂ ගුවන් යානයකින් බෙයිජිං නුවරින් පිටත් වූ ජනාධිපති ෂී ජින්පිං මහතා සහ එම ආර්යාව වන Peng Liyuan පියොංග්යැංග් අගනුවර වෙත ළඟා වූහ. ඔවුන් පිළිගැනීම සඳහා උතුරු කොරියානු නායක කිම් ජොන් උන් මහතා සහ එම ආර්යාව වන Ri Sol Ju ද එක්ව සිටියහ.
එදින රාත්රියේ පියොංග්යැංග් ක්රීඩාංගනයේදී චීන නායකයා වෙනුවෙන් උත්කර්ෂවත් සංස්කෘතික ප්රසංගයක් සංවිධානය කර තිබුණි. රාත්රී 9:00 ට පමණ නායකයන් දෙපළ සහ ඔවුන්ගේ ආර්යාවන් වේදිකාවට පිවිසෙන විට රැස්ව සිටි දහස් සංඛ්යාත ජනතාව සහ රංගන ශිල්පීන් උද්යෝගිමත්ව අත්පොළසන් දෙමින් ඔවුන් පිළිගත් බව මූලාශ්ර සඳහන් කරයි. චීනය සහ උතුරු කොරියාව අතර පවතින ගැඹුරු මිත්රත්වය විදහා දැක්වූ මෙම ප්රසංගය සැබවින්ම විශිෂ්ට අවස්ථාවක් විය.
මෙම සංචාරය අතරතුර පැවති ද්විපාර්ශ්වික සාකච්ඡාවලදී ෂී ජින්පිං මහතා අවධාරණය කළේ, ජාත්යන්තර දේශපාලන තත්ත්වය කෙතරම් වෙනස් වුවද, චීනය සහ උතුරු කොරියාව අතර පවතින පොදු උපායමාර්ගික අවශ්යතා සහ මිත්රත්වය නොවෙනස්ව පවතින බවයි. කොමියුනිස්ට් පක්ෂවල නායකත්වය යටතේ ක්රියාත්මක වන මෙම සමාජවාදී රටවල් දෙක අතර ඇත්තේ දීර්ඝකාලීන සාම්ප්රදායික මිත්රත්වයකි. කිම් ජොන් උන් මහතාගේ නායකත්වය යටතේ උතුරු කොරියාව ක්රියාත්මක කරන සමාජවාදී ක්රමයට චීනය සැමවිටම සහාය දක්වන බවද ෂී ජින්පිං මහතා මෙහිදී යළිත් තහවුරු කළේය.
උතුරු කොරියානු නායක කිම් ජොන් උන් මහතා ප්රකාශ කළේ, නව යුගයේ අභියෝග හමුවේ චීනය සමඟ පවතින සබඳතා ශක්තිමත් කිරීම උතුරු කොරියාවේ “වෙනස් නොවන උපායමාර්ගික තෝරා ගැනීමක්” බවයි. විශේෂයෙන්ම මේ වසරේ චීන ජනාධිපතිවරයාගේ පළමු විදේශ සංචාරය සඳහා තම රට තෝරා ගැනීම උතුරු කොරියාවට මහත් ගෞරවයක් බවද ඔහු සඳහන් කළේය.
දෙරටේ නායකයන් අතර පැවති සාකච්ඡාවලදී වැදගත් එකඟතා රැසකට එළඹුණු බව වාර්තා වේ. දෙරටේ ඉහළ මට්ටමේ හුවමාරු ශක්තිමත් කිරීම, ප්රායෝගික සහයෝගිතාව පුළුල් කිරීම සහ ජනතාව අතර සබඳතා වැඩිදියුණු කිරීම පිළිබඳව මෙහිදී අවධානය යොමු විය. මානව සමාජය අඛණ්ඩව දියුණු කිරීම සහ දෙරටේ සමාජවාදී මෙහෙවරෙහි සුන්දර අනාගතයක් නිර්මාණය කිරීම සඳහා එක්ව කටයුතු කිරීමට දෙපාර්ශවයම එකඟ වී ඇත.
උතුරු කොරියානු කම්කරු පක්ෂයේ 9 වැනි නියෝජිත සම්මේලනයේදී ඉදිරිපත් කළ ඉලක්කයන් සාර්ථක කර ගනිමින් උතුරු කොරියාවේ සමාජවාදී ගමනේ නව පරිච්ඡේදයක් ආරම්භ කිරීමට චීනයේ සුබපැතුම් එක් කරන බව ජනාධිපති ෂී ජින්පිං ප්රකාශ කළේය. එමෙන්ම, ෂී ජින්පිං මහතාගේ නායකත්වය යටතේ චීන ජනතාව සමාජවාදී නවීකරණය, මහා ජාතික පුනර්ජීවනය සහ දෙවැනි සියවසේ ඉලක්කයන් සාක්ෂාත් කර ගැනීමට සමත්ව ඇති බව උතුරු කොරියාව විශ්වාස කරන බව කිම් ජොන් උන් මහතා පැවසීය.
මූලාශ්රවලට අනුව, පසුගිය සති කිහිපය තුළ අමෙරිකානු ජනාධිපති ට්රම්ප් සහ රුසියානු ජනාධිපති පුටින් චීනයට පැමිණි පසුබිමක චීන ජනාධිපතිවරයාගේ මෙම සංචාරය ඉතා සුවිශේෂී වේ. දෙරටේ නායකයන් ජගත් සහ කලාපීය කරුණු පිළිබඳව පුළුල් ලෙස අදහස් හුවමාරු කර ගත් අතර, කලාපීය සහ ලෝක සාමයේ ස්ථාවරත්වයට දායකත්වය ලබා දීම සඳහා දෙරටේ මිත්රත්වය තවදුරටත් වේගවත් කිරීමට තීරණය කළහ.
මෙම සංචාරය සඳහා චීන පාර්ශවයෙන් ඉහළ මට්ටමේ දූත පිරිසක් එක්ව සිටියහ. ඒ අතර චීන කොමියුනිස්ට් පක්ෂ මධ්යම කාරක සභාවේ දේශපාලන කාර්යාංශයේ ස්ථාවර කමිටු සාමාජික ත්සයි චී සහ විදේශ අමාත්ය වං යී ඇතුළු පිරිසක් වූහ.
රාත්රී සාකච්ඡාවලින් අනතුරුව කිම් ජොන් උන් මහතා විසින් චීන ජනාධිපතිවරයා සහ එම ආර්යාව වෙනුවෙන් විශේෂ රාත්රී භෝජන සංග්රහයක් ද පවත්වන ලදී. එහිදී නායකයන් දෙපළ තම රටවල් අතර පවතින ගැඹුරු සහෝදරත්වය සහ අනාගත සහයෝගිතාව පිළිබඳව සුබවාදී අදහස් හුවමාරු කර ගත්හ.
මෙම සංචාරය චීන-උතුරු කොරියානු සබඳතාවල නව යුගයක් සනිටුහන් කරන අතර, එය කලාපීය දේශපාලනයේ මෙන්ම සමාජවාදී රටවල් අතර සහයෝගිතාවේ නව පරිච්ඡේදයක් බව විචාරකයින් පෙන්වා දෙති.
