විම්බ්ල්ඩන් ටෙනිස් තරගාවලියේ කාන්තා කේවල ඉසව්වේ අවසන් පූර්ව වටයේ ස්ථානයක් වෙන්කර ගැනීමට ලොව අංක එකේ ටෙනිස් ක්‍රීඩිකාව වන බෙලරුසියාවේ අර්යානා සබලෙන්කා සමත් වූවාය.
අර්ධ අවසන් පූර්ව වටයේදී ජර්මනියේ ලෝරා සීග්මන්ඩ් සමඟ තරගවැදුණු සබලෙන්කා වට 2-1ක ජයක් හිමිකර ගනිමින් ඉදිරි වටයට පිවිසියාය. එම තරගයේ පළමු වටය ජය ගැනීමට ලෝරා සමත් වූයේ ලකුණු 6-4ක් ලෙසිනි. කෙසේ වෙතත් දෙවැනි සහ තෙවැනි වටයන් පිළිවෙළින් ලකුණු 6-2ක් සහ 6-4ක් ලෙස ජය ගැනීමට සබලෙන්කාට හැකි විණි.
මේ අතර අමෙරිකා එක්සත් ජනපද ක්‍රීඩිකා අමන්දා අනිසමෝවා සහ රුසියානු ක්‍රීඩිකා ඇනස්ටේෂියා පව්ලියුචෙන්කෝවා අතර පැවති අනෙක් අර්ධ අවසන් තරගයෙන් 2-0ක ජයක් හිමිකර ගැනීමට අමන්දා සමත් වූවාය. ඒ අනුව ලොව අංක එකේ ක්‍රීඩිකා අර්යානා සබලෙන්කා සහ ශ්‍රේණිගත කිරීම් අනුව 13 වැනි ස්ථානයේ පසුවන අමන්දා අනිසමෝවා අතර පළමු අවසන් පූර්ව තරගය අද (10) පැවැත්වීමට නියමිතය.
පිරිමි කේවල ඉසව්වෙන් අවසන් පූර්ව වටයට එක්වීමට අමෙරිකානු ක්‍රීඩක ටේලර් ෆ්‍රිට්ස් සහ ස්පාඤ්ඤ ක්‍රීඩක කාලෝස් අල්කරාස් සමත්ව වූහ. ඔවුන් දෙදෙනා අතර අවසන් පූර්ව තරගය හෙට පැවැත්වේ. අල්කරාස් ලෝක ශ්‍රේණිගත කිරීම්වල 2 වැනි ස්ථානයෙත්, ෆ්‍රිට්ස් 5 වැනි ස්ථානයෙත් පසුවෙති.
