රජයේ රැකියාව
ලැබිලා රැකියාව රජයේ, පෙර පිනට
ජීවන ගමන ගෙවුණා හර බර ලෙසට
හැට පිරිලා වැඩ වරලා ගිය දිනට
සැලකිලි මොටද යනවිට සොඳුරු නිවසට
අටලෝ දහම නොදැනද සිරවී ඉන්නේ
ලෙඩදුක් නැතිව සසරේ නැත සැප දෙන්නේ
අතමිට හිග වුනත් ගැම්මෙන් නොව ඉන්නේ
සේවය නොදුන්නත් පඩිපත ගෙට එන්නේ
පොදු අරමුණට එක්රොක්වී වැඩ පෙන්නා
ගලපා ගමින් හැකි තරමට රඟ දුන්නා
තනතුරු වලට නිල බලයට සිත බැඳුණා
අපගෙන් සේවෙ ගන්නට පිරිසක් උන්නා
සැමදා සැමදේම නැහැ නොවැ පවතින්නේ
තිරවූ කිසිත් නැහැ වෙනසයි සිදුවන්නේ
එන එන හොඳ නරක සතුටින් පිළිගන්නේ
යහලෙස ගෙවන දිවියේ නැහැ තනිවෙන්නේ
දින සති ගෙවී කාලය පියඹා යනවා
කලකී හැමදේම පසු කරමින් යනවා
මිතුරන් කළණ කවදත් සිත පිනවනවා
මිය යන තුරා සැනසිල්ලේ වැජඹෙනවා
ඉන්ද්රා මැණිකේ
ජීවිතේ මල් පොතේ සුන්දරම පෙරවදන….
නිදිකිරන සදකිරණ , තරු අතර ඉගිමරන
මතකයේ තවම ඔබ ඉන්නවා
අඩසදට පෙම්කරන , පිනි මතින් ඇවිදයන
මතකයේ තවම ඔබ ඉන්නවා
තෙරපෙනා දුම්රියේ කවුළුවෙන් කවුළුවට
මගේ ඇස් තවම ඔබ හොයනවා
පෙම්මුල්ලේ තුරුළුවී හීන් වදනක් දොඩන
ඔබේ රුව තවම මම හොයනවා
ජීවිතේ මල් පොතේ , සුන්දරම පෙරවදන
හදවතේ තවම තව තියෙනවා
පිටු අතර පෙරලිලා , ජීවිතය ගිලිහිලා
පසුවදන දැන් මමම ලියනවා
රුවන් හරිස්චන්ද්ර
Toronto – Canada
නුඹය මගෙ කවිමල්ල
රහසින බාල කාලේ සිට පෙම් බැන්ද
සිතිවිලි ගඟේ පිහිනා සතුටකි වින්ද
සහසකි පැතුම් ගොනුකල නොමැ තිව නින්ද
නුඹ හද රිදී මා මඟහැර යනු මන්ද
කෙළිලොල් වියේ සිටි ඔබ හරි දඟමල්ල
නව යෞවනය එලබී වුනෙ හැඩමල්ල
විසිතුරු වදන් සැමටම බෙදු රසමල්ල
සිතුනෙම මෙමට ලැබුනා යැයි ජයමල්ල
හද තුල නිමක් නෑ සෙනෙහේ ඉතිරිල්ල
වලකනු කෙලෙස හද දවනා මැසිවිල්ල
පෙර ලෙස නොවේ දැන් නුඹ ගේ සැලකිල්ල
නෙතු යුග බොඳ කරයි නැගෙනා කදුලැල්ල
දර්ශනි රූපසිංහ
Hamilton – Canada
ජීවිතය බැරි ගැහෙනවා
අදත් හිරු ඇහැරවා ගෙන මම
වැඩට දිව්වා කලබලයෙන්,
ගතේ හයියට වඩා තිබුනේ
හිතේ හයිය යි මා ලගින්,
රිදී පාටට මහ උජාරුවට
රීදී කෙස් මතුවී ඇවිත්
සිහින පස්සේ ම දුවලා දුවලා
මමත් දැන් වයසට ගිහින්,
බොහොම වේගයෙන් ඇවිද ගෙන ගිය
පා යුග පටලැවෙනවා,
හමේ දිලිසෙන පාට පරදා රැලි
මතුපිට්න් පෙනෙනවා.
මගේ කරදඩු වලට ඉහලින්
දරුවො මුදුනට ඇදෙනවා.
හිතේ හයියට කොහොම
හිතුවත් ජීවිතය ය බැරි ගැහෙනවා.
නයනා සුමිත්රාරච්ච්ගේ
මිසසාගා
~~~~~~~~~~
